އިންތިޚާބުގެ ކާމިޔާބީ ފާހަގަކުރަން މާލޭގައި ދިރިއުޅޭ އައްޑޫ ރައްޔިތުން ހަރަކާތެއް ބާއްވައިފި
މި ހަރަކާތު ގައި އިންތިޚާބީ ނާއިބު ރައީސް ވެސް ބައިވެރިވެ ވަޑައިގެންނެވި
ގުޅިފައިވާ ކޯލިޝަނުން އިންތިޚާބު ކާމިޔާބު ކުރުމުގެ އުފާ ފާޅުކުރުމަށް އައްޑޫ ސިޓީގެ ރައްޔިތުންބޭއްވި ހަފްލާގައި އިންތިހާބީ ރައީސް ސޯލިހް ހަފްލާއަށް ހާޒިރުވި ފަރާތަކާއެކު ފޮޓޯއަކަށް ހުއްޓިވަޑައިގެން
ނިމިދިޔަ ރިޔާސީ އިންތިޚާބު ގުޅިފައިވާ ޕާޓީތަކަށް ކާމިޔާބު ކުރެވުނީތީ އެކަމުގެ އުފާ ފާޅު ކުރުމަށް ހާއްސަ ހަފްލާއެއް ބާއްވައިފިއެވެ.
އާދިއްތަ ދުވަހުގެ ރޭ މީރުބަހުރު ބަނދަރު (ނޯތު ހާބަރު) ސަރަހައްދުގައި ބޭއްވި މި ހާއްސަ ހަރަކާތް ފެށުނީ އިންތިޚާބީ ރައީސް އިބްރާހީމް މުހައްމަދު ސޯލިހާއި އިންތިޚާބީ ނައިބު ރައީސް ފައިސަލް ނަސީމް އެ ސަރަހައްދަށް ވަޑައިގެންނެވުމުންނެވެ.
އިންތިހާބީ ރައީސް ސޯލިހާއި އިންތިޚާބީ ނައިބު ރައީސް ފައިސަލް ނަސީމް އެ ސަރަހައްދަށް ވަޑައިގެންނެވުމުން މަރުޙަބާ ދެންނެވީ އައްޑޫ ސިޓީއަށް ނިސްބަތްވާ ރައްޔިތުންނާއި ރައްޔިތުން މަޖިލީހުގެ މެމްބަރުންނާއި ގުޅިފައިވާ ޕާޓީތަކަށް ނިސްބަތްވާ ބައެއް އިސްބޭފުޅުންނެވެ.
އިންތިޚާބީ ރައީސް އިބްރާހީމް މުހައްމަދު ސޯލިހާއި އިންތިޚާބީ ނައިބު ރައީސް ފައިސަލް ނަސީމް ވަނީ މި ހަފްލާއަށް ހާޒިރުވި ފަރާތްތަކާ ވަކިވަކިން ބައްދަލުކުރައްވައި އެފަރާތްތަކާއި އެކު ފޮޓޯ ނަންގަވާފައެވެ.
ނިމިދިޔަ ރިޔާސީ އިންތިޚާބުގައި ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހާއި ރަނިންގމޭޓް ފައިސަލް ނަސީމަށް އިންތިޚާބު ކާމިޔާބު ކުރެއްވުމުގެ އުފާ ފާޅުކުރުމުގެ ގޮތުން މާލެ އާއި ރަށްރަށުގައި ދަނީ އެކި ހަރަކާތްތައް ބާއްވަމުންނެވެ.
އިންތިޚާބުން ނާކާމިޔާބުވި ކެންޑިޑޭޓް އަބްދުﷲ ޔާމީން އިންތިޚާބު ބާތިލުކުރަން ކޯޓަށް ހުށަހެޅުއްވީ ބަލި ގަބޫލުކުރައްވައި އެކަން އިއުލާނު ކުރެއްވުމަށް ފަހުއެވެ. މި އިންތިޚާބުގައި އިބްރާހިމް މުހައްމަދު ސޯލިހް ވަނީ ވޯޓުގެ 58.4 އިންސައްތަ ކާމިޔާބު ކުރައްވާފައެވެ. ރައީސް ޔާމީނަށް ލިބިވަޑައިގަތީ 41.6 އިންސައްތައެވެ.
