އެސްޓީއޯގެ މުދާ އުފުލާ ބޯޓަކުން ގިނަ އަދަދެއްގެ މަސްތުވާތަކެތި އަތުލައިގަނެފި

ސަރުކާރުގެ ވިޔަފާރި ކުންފުނި، އެސްޓީއޯގެ މުދާ އުފުލާ ބޯޓަކުން ގިނަ އަދަދެއްގެ މަސްތުވާތަކެތި އަތުލައިގަނެފި އެވެ.

ފުލުހުން ބުނީ، މަސްތުވާތަކެތި އަތުލައިގަނެފައިވަނީ، އިންޑިއާއިން ފުރައިގެން އައްޑޫ ސިޓީއަށް މުދާ ހިފައިގެން އަންނަ ބޯޓަކުން މަސްތުވާތަކެތި ގެންނަކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން ފުލުހުންގެ އިންޓެލިޖެންސާއި އައްޑޫ ސިޓީ ޕޮލިސްގައި މަސައްކަތްކުރާ ފުލުހުންނާއި ފާރަގެމަ ގުޅިގެން ކަސްޓަމްސްގެ އެހީތެރިކަމާއެކު މެއި 25 ވަނަ ދުވަހުގެރޭ ހިންގި އޮޕަރޭޝަނުގައި ކަމަށެވެ.

ފުލުހުން ބުނީ މި އޮޕަރޭޝަނުގައި ފާރަ ބޭނުންކޮށްގެން އެބޯޓް ބަލައިފާސްކޮށްފައިވާއިރު އެބޯޓުގެ އިންޖީން ރޫމްތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 500 ގްރާމުގެ ބޮޑު ރަބަރު ގަނޑެއް ފެނިފައިވާ ކަމަށެވެ.

އެނގިފައިވާގޮތުގައި އެ ބޯޓަކީ އެސްޓީއޯއަށް ނިސްބަތްވާ ބޯޓެކެވެ. އަދި އެއީ ރަމްޟާން މަހަށް ހާއްސަކޮށް މުދާ ހިފައިގެން ދަތުރުކުރި ބޯޓެއްކަން އެނގިފައިވެއެވެ. ނަމަވެސް އެކަމާއި ގުޅޭގޮތުން ފުލުހުންވެސް، އެސްޓީއޯއިންވެސް އެއްވެސް އެއްޗެއް ހާމަކޮށްފައެއް ނުވެއެވެ.