ތެރީސާ މޭ އަށް ރަޝިއާ އިން ވަރުގަދަ ރައްދެއް!

ރަޝިއާ އިން އިންތިޚާބުތަކަށް ނުފޫޒު ފޯރުވައި، ޑިޖިޓަލް ފޯމެޓުގައި ހުންނަ މައުލޫމާތުން ވައްކަން ކުރާ ކަމަށް އިނގިރޭސި ބޮޑުވަޒީރު ތެރީސާ މޭ ކުރެއްވި ތުހުމަތުތައް ރަޝިއާގެ ސިޔާސީ އިސް ފަރާތްތަކުން ދޮގުކޮށްފިއެވެ.

އިނގިރޭސި ވިލާތުގެ ބައެއް ވިޔަފާރިވެރިންނާ ބައްދަލުކުރައްވައި ހޯމަ ދުވަހުގެ ރޭ އިނގިރޭސި ބޮޑުވަޒީރު މޭ ވިދާޅުވީ ހުޅަނގުގައި ހަމަނުޖެހުން އުފެއްދުމަށް ދޮގު ޚަބަރު ފެތުރުމަށް ރަޝިޔާއިން މަސައްކަތް ކުރާ ކަމަށެވެ.

ބޮޑުވަޒީރު މޭގެ ވާހަކަފުޅާ ގުޅިގެން ރަޝިއާގެ ގާނޫނު ހަދާ މަޖިލީހުގެ މެމްބަރެއް ކަމަށްވާ ފްރެންޓްސް ކްލިންޓްސެވިޗް ވިދާޅުވީ ތެރީސާ މޭ އަމިއްލަފުޅަށް ވަރަށް ގެއްލުން ހޯއްދަވައިފި ކަމަށާއި، "އަމިއްލަފުޅަށް މޮޔަފުޅުވަމުންދާ" ކަމަށެވެ. އަދި ކުރައްވާ ކަންކަމުން ބައިނަލްއަގްވާމީ މައިދާނުގައި ރަޝިއާގެ މަގުބޫލުކަން ބޮޑުވަމުން އަންނަ ކަމަށް ވެސް އޭނާ ވިދާޅުވިއެވެ.

ރަޝިއާގެ ގާނޫނު ހަދާ މަޖިލީހުގެ މެމްބަރެއް ކަމަށްވާ އެލެކްސީ ޕުޝްކޯވް ވިދާޅުވީ "އިރާގު އަޅުވެތި ކުރުމާއި، ލީބިއާގައި ހިނގާ ހަނގުރާމަ އާއި، ޔޫރަޕްގައި ޓެރަރިޒަމް ފެތުރެމުންދާ" ކަމަށެވެ. އަދި "ރަޝިއާ އަށް ހަމަލާދީގެން އެކަން ނުހުއްޓުވޭނެ" ކަމަށެވެ.

ހޯމަ ދުވަހުގެ ރޭ ބޮޑުވަޒީރު މޭ ވިދާޅުވީ ރަޝިއާއާ ކުރިމަތިލާން އިނގިރޭސިވިލާތުން ބޭނުން ނުވާ ކަމަށާއި، އެހެން ނަމަވެސް އިނގިރޭސީންގެ ސިޔާދަތު އެގައުމުން އަމިއްލައަށް ދިފާއުކުރާނެ ކަމަށެވެ. ރަޝިއާގެ ރައީސް ވްލާޑީމިއާ ޕުޓިން އަށް އިންޒާރު ދެއްވަމުން މޭ ވިދާޅުވީ ރަޝިއާ އިން މިހާރު ހިނގާ މަގު ނޫން އެހެން މަގަކުން ހިނގަން ޖެހޭ ކަމަށެވެ. ރަޝިއާ މިހާރު ހިނގާ މަގު ކަމަށް މޭ އިޝާރާތް ކުރެއްވީ ރަޝިއާ އިން ކްރައިމިއާ އަށް އަރައިގަތުމާއި، ޔޫކްރެއިންގެ މަސްރަހު ހަލަބޮލި ކުރުމަށް ކުރަމުންދާ މަސައްކަތުގެ އިތުރުން އެގައުމުން ޔޫރަޕްގެ ގައުމުތަކަށް ދެމުންދާ ސައިބަރ ހަމަލާތަކަށެވެ.

އިންތިޚާބުތަކަށް ރަޝިއާ އިން ނުފޫޒު ފޯރުވާ ކަމަށް އިނގިރޭސި ވިލާތުން ތުހުމަތުކުރާއިރު 2016 ވަނަ އަހަރު އެމެރިކާގައި ބޭއްވި ރިޔާސީ އިންތިޚާބަށް ވެސް ރަޝިއާއިން ނުފޫޒު ފޯރުވި ކަމަށް ތުހުމަތު ކުރެވެއެވެ. އެހެން ނަމަވެސް އިންތިޚާބަށް ނުފޫޒު ނުފޯރުވާ ކަމަށް ރަޝިއާގެ ރައީސް ޕޫޓިން ވިދާޅުވާ ވިދާޅުވުން ގަބޫލު ކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ދާދި ފަހުން ވިދާޅުވެފައި ވެއެވެ.

މޭގެ ވާހަކަފުޅާ ގުޅިގެން އިނގިރޭސި ވިލާތުގައި ހުންނަ ރަޝިއާ އެމްބަސީން ކޮށްފައިވާ ޓްވީޓެއްގައި ބުނެފައި ވަނީ އެކަމަނާގެ ވާހަކަފުޅު ސިފަކުރައްވާފައި ވަނީ "ފޭކް ޚަބަރެއްގެ" ގޮތުގައި ކަމަށެވެ.