މަގާމުން ފައިބާ ވަޑައިގަންނަވާ ރައީސް އަބްދުﷲ ޔާމީން އަބްދުލް ގައްޔޫމް ރައްޔިތުންގެ ނިންމުން ބަދަލުކުރެއްވުމަށް މަސައްކަތް ކުރައްވަމުން ގެންދަވާތީ ކަންބޮޑުވާ ކަމަށާއި ވެރިކަމުގެ ބާރުތައް ބަދަލުކުރަން ހުރަސްއަޅަން މަސައްކަތްކުރާ ކޮންމެ ފަރާތަކާ މެދު އަޅަންޖެހުނު ފިޔަވަޅެއް އެމެރިކާއިން އަޅާނެ ކަމަށް ބުނެ ދެ ވަނަ ފަހަރަށް އެގައުމުން އިންޒާރު ދީފިއެވެ.
އެމެރިކާގެ ސްޓޭޓް ޑިޕާޓްމަންޓުގެ ޑެޕިއުޓީ ސްޕޯކްސްޕަރސަން ރޮބަރޓް ޕައްލަޑީނޯ ވީޑިއޯ ބަޔާނަކާ އެކު ކުރައްވާފައިވާ ޓްވީޓެއްގައި ވިދާޅުވެފައި ވަނީ އިންތިޚާބާ ގުޅޭ މައްސަލައެއް، ޕީޕީއެމްގެ ކެންޑިޑޭޓު އަދި އެ އިންތިޚާބުގައި ބޮޑު ތަނުން ބަލިވި، ރައީސް ޔާމީންގެ ފަރާތްޕުޅުން ސުޕްރީމް ކޯޓަށް ހުށަހަޅުއްވައި، އިންތިޚާބު ބާތިލް ކުރެއްވުމަށް މަސައްކަތް ކުރައްވާއިރު، އިލެކްޝަންސް ކޮމިޝަންގެ މެމްބަރުންނަށް ވެސް އެކި ކަހަލަ އިންޒާރުތައް ދީ ބިރު ދައްކަމުން ދާ ކަމަށެވެ.
އޭނާ ވިދާޅުވެފައި ވަނީ ދާދި ފަހުން ރާއްޖޭގައި ބޭއްވި ރިޔާސީ އިންތިޚާބުގައި ރެކޯޑް މިންވަރަކަށް ރައްޔިތުން ނުކުމެ ކުރިޔަށް އޮތް ދައުރުގެ ރައީސަކަށް އިބްރާހިމް މުހައްމަދު ސާލިހުު ހޮވުމަށް ވޯޓްދީފައިވާ ކަމަށެވެ. އަދި އިލެކްޝަން ކޮމިޝަނުން އެ ނަތީޖާ އިއުލާނުކޮށްފައިވާ ކަމަށެވެ.
އޭނާ ވިދާޅުވީ އަންނަ މަހުގެ 17 ވަނަ ދުވަހަށް ތާވަލުކުރެވިފައިވާ، އިންތިޚާބީ ރައީސް އިބްރާހިމް މުހައްމަދު ސޯލިހު ހުވާ ކުރެއްވުން ހިމެނޭ ގޮތަށް މި ޕްރޮސެސް ލަސްކޮށް ނުވަތަ ހުރަސް އަޅާ ނަމަ އެމެރިކާ އިން އަޅަން ޖެހުނު ކޮންމެ ފިޔަވަޅެއް ވެސް އަޅާނެ ކަމަށެވެ.
The US is concerned by troubling actions by outgoing Pres Yameen that threaten to undermine the will of the Maldivian people, and will consider appropriate measures against anyone who undermines a peaceful transfer of power in #Maldives - @StateDept Dep. Spokesperson Palladino pic.twitter.com/COM1HLKdJZ
— State_SCA (@State_SCA) October 13, 2018
އެމެރިކާގެ އިސް ޑިޕްލޮމޭޓް, ސްޓޭޓް ޑިޕާޓްމަންޓްގެ ބިއުރޯ ފޯރ ސައުތު އެންޑް ސެންޓްރަލް އޭޝިއާގެ ޕްރިންސިޕަލް ޑެޕިއުޓީ އެސިސްޓަންޓް ސެކްރެޓަރީ އެލިސް ވެލްސް ރާއްޖޭގެ އިސްލީޑަރުންނާއިި އޮފިޝަލުންނާ އެކު ބޭއްވެވި ބައްދަލުވުންތަކުގައި ވެސް ވަނީ ރައްޔިތުންގެ ނިންމުން ބޮލާލާ ޖަހައި ޑިމޮކްރެޓިކް ނިޒާމް ގަޑުބަޑުކުރާ ނަމަ ފިޔަވަޅު އަޅާނެ ކަމަށް އިންޒާރު ދެއްވާފައެވެ.
ރާއްޖެ ޓީވީއަށް ދެއްވި އިންޓަވިއުގައި އެ ކަމަނާ ވަނީ ދިވެހި ރައްޔިތުންނަށް މަރުހަބާ ވިދާޅުވެ މި އިންތިޚާބަކީ ވަރަށް ފުރިހަމަ ޑިމޮކްރެޓިކް އެކްސްޕެރިމެންޓެއް ކަމަށާއި، މި ނިންމުމާ އެކު އެންމެހާ ދިވެހި ރައްޔިތުންނަށް އިތުރަށް ފާގަތިކަން ލިބިގެންދާނެ ކަމަށް އުއްމީދު ކުރައްވާ ކަމަށެވެ.
އެމްބެސެޑަރ އެލިސް ވެލްސް ރާއްޖެ އަށް ކުރެއްވި ދަތުރުފުޅުގައި ވަނީ ވެލާނާ އިންޓަރނޭޝަނަލްގެ ވީވީއައިޕީ ލޯންޖްގައި އިންތިޚާބީ ރައީސް ސޯލިހްއާ ބައްދަލު ކުރައްވާފައެވެ.
