އިންޑޮނީޝިއާގެ ޖާވާ އާއި ބާލީއަށް އައި ބިންހެލުމުގައި ތިން މީހުން މަރުވެއްޖެ

އިންޑޮނީޝިއާގެ ޖަވާ އާއި ބާލީއަށް ބުރާސްފަތި ދުވަހު އައި ބާރުގަދަ ބިންހެލުމުގައި ތިން މީހުން މަރުވެއްޖެއެވެ.

ހަ މެގްނިޓިއުޑް އައި އެ ބިންހެލުމުގައި ޖާވާގެ ގިނަ ގެތަކެއް ވެއްޓުމުގެ ބިރު ވަނީ ހީވެފައެވެ. ތިން މީހުން މަރުވީ ވެސް ޖާވާގައި ވެއްޓުނު ގެތަކުގެ ދަށުގައި ތާށިވެގެންނެވެ.

ބިންހެލުމާއި ގުޅިގެން ސުނާމީ އެއް އުފެދުމުގެ ބިރެއް ނެތެވެ.

މި ހަފްތާގައި އިންޓަނޭޝަނަލް މަނިޓަރީ ފަންޑުގެ އަހަރީ ޖަލްސާ ބޭއްވުމަށް ވެސް ހަމަޖެހިފައިވަނީ ބާލީގައެވެ. އެ ޖަލްސާއަށް ނަވާރަ ހާހަށް ވުރެ ގިނަ މީހުން ހާޒިރުވާނެއެވެ. އޭގެ ތެރޭގައި މިނިސްޓަރުންނާއި ދުނިޔޭގެ އެކިއެކި ބޭންކުތަކުގެ ވެރިން ހާޒިރުވާނެއެވެ.

އިންޑޮނީޝިއާގެ ސުލަވެސީ އަށް 7.5 މެގްނިޓިއުޑްގައި މިދިޔަ މަހު ފަހުކޮޅު އައި ބިންހެލުމުގައި 2،000 މީހުން މަރުވެ 5،000 އަށް ވުރެ ގިނަ މީހުން ގެއްލިފައެވެ. އެ ބިންހެލުމާއި ގުޅިގެން ސުނާމީ ވެސް ވަނީ އަރާފައެވެ.