ޖުމުހޫރީ ޕާޓީގެ ލީޑަރުގެ އެޑްވައިޒަރުގެ މަގާމަށް އެޕާޓީގެ ކުރީގެ ނައިބު ލީޑަރު އަދި ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަބުދުﷲ ރިޔާޒު އައްޔަނު ކުރައްވައިފިއެވެ.
ޖުމްހޫރީ ޕާޓީން ބުނީ އެމަގާމަށް ރިޔާޒު އައްޔަނު ކުރައްވާފައި ވަނީ އެޕާޓީގެ އަސާސީ ގަވާއިދުގެ 22 ވަނަ މާއްދާގެ (ނ)ގައިވާ ގޮތުގެ މަތިން ކަމަށެވެ.
ޖުމްހޫރީ ޕާޓީން ބުނީ އެޕާޓީގެ ލީޑަރުގެ އެޑްވައިޒަރަކީ ޕާޓީ ތަރައްގީކޮށް ކުރިއެރުވުމުގަޔާއި ޕާޓީއަށް ސިޔާސީ ކުރިއެރުން ހޯދުމުގައި ޕާޓީގެ ލީޑަރަށް ބޭނުންވާ ލަފަޔާއި އިރުޝާދާއި އެހީތެރިކަން ފޯރުކޮށް ދެއްވާ އަދި މަގާމްގެ ހައިސިއްޔަތުން ޕާޓީގެ ކައުންސިލްގައި ހިމެނިވަޑައިގަންނަވާ ޝަރަފްވެރި އިއްޒަތްތެރި މަގާމެއް ކަމަށެވެ.
އަދި އެމަގާމު ރިޔާޒު ގަބޫލު ކުރައްވާފައިވާ ކަމަށް ވެސް ޖުމުހޫރީ ޕާޓީން ވަނީ ބުނެފައެވެ. އަދި މިމަގާމު ގަބޫލުކުރެއްވުމާއި ގުޅިގެން ޕާޓީގެ ލީޑަރާއި ޕާޓީގެ ކައުންސިލާއި ޕާޓީގެ މެންބަރުންގެ ނަމުގައި މަރުހަބާއާއި ތަހުނިޔާ ވަނީ ދަންނަވާފައެވެ.
