ޖެނޯއާގެ ބްރިޖެއް ވެއްޓި މަރުވި މީހުންގެ ހަނދާންތައް އާކުރި، އެކުވެރިކަމުގެ މެޗެއްގައި ރޭ އިޓަލީ އާއި ޔޫކްރޭން 1-1 އިން އެއްވަރުވެއްޖެއެވެ.

މެޗުގައި ލީޑު ހޯދީ އިޓަލީންނެވެ. އެ ގޯލް 55 ވަނަ މިނެޓުގައި ޖެހީ އަލެސަންދްރޯ ފްލޮރެންޒީ ދިން ޕާހަކުން ފެޑެރިކޯ ބާނަޑެސްކީއެވެ.

އިޓަލީން ލަނޑު ޖެހިތާ ހަތް މިނެޓު ފަހުން ޔޫކްރޭނަށް އެއްވަރުކޮށްދިނީ ރުސްލަން މަލިނޮވްސްކީއެވެ.

މި ނަތީޖާއާ އެކު އިޓަލީން މިދިޔަ 12 މެޗުން އެ ލިބުނީ އެންމެ ދެ މޮޅެވެ. އާ ކޯޗު ރޮބާޓޯ މަންޗިނީއާ އެކު ވެސް އަދި މުޅިން ހަމަޔަކަށް ނޭޅެއެވެ.

އިޓަލީ އަށް މޮޅެއް ނުލިބި ފަސް މެޗު ވެފައިވާ އިރު އެޓީމަށް އެންމެ ފަހުން މޮޅެއް ހޯދިފައި ވަނީ މިއަހަރުގެ މޭ މަހުގެ 28 ވަނަ ދުވަހުއެވެ.

އިޓަލީން ދެން އެންމެ އަވަހަށް ކުޅެނީ ޔުއެފާ ނޭޝަންސް ލީގުގެ މެޗެކެވެ. އެ މެޗުގައި އެޓީމު ނިކުންނާނީ ޕޮލެންޑާ ދެކޮޅަށެވެ.

އިޓަލީ އާ ޔޫކްރޭންގެ މެޗު ޚާއްސަކޮށްފައިވަނީ މިދިޔަ އޮގަސްޓް މަހު ޖެނޯއާގެ މޮރާންޑީ މޮޓޯވޭގެ ބައެއް ވެއްޓި 43 މީހުން މަރުވެ އެތައް ބަޔަކަށް އަނިޔާވި ހާދިސާއަށެވެ.

ސްޓޭޑިއޯ ލުއިޖީ ފެރާރިސްގައި ކުޅުނު މިމެޗުގައި މަރުވި މީހުންގެ ހަނދާނުގައި، މެޗުގެ 43 ވަނަ މިނެޓުގައި މެޗު މެދުކަނޑާލައި ކުޅުންތެރިންނާއި އޮފިޝަލުން އަދި ސަޕޯޓަރުން ވަނީ ހަނދާންތައް އާކޮށްފައެވެ.

ސަމްޕްޑޯރިއާ އަށް 15 އަހަރު ކުޅެފައިވާ އިޓަލީގެ ކޯޗު ރޮބާޓޯ މަންޗިނީ ބުނީ އެ ހާދިސާ އަކީ ވަރަށް އެހެން ކަހަލަ އިހުސާސްތަކެއް ކުރުވި ހާދިސާއެއް ކަމަށެވެ.

ޔޫކްރޭނުގެ ކޯޗު އަދި ކުރިން އިޓަލީގެ އޭސީ މިލާނަށް ކުޅުނު އެންޑްރީ ޝެވްޗެންކޯ ބުނީ މިވަރުގެ ހިތާމައެއް ސިފަކުރާނެ ބަސްތަކެއް ހޯދަން އުނދަގޫ ކަމަށެވެ.