ވާރލްޑްކަޕް ކޮލިފައިންގައި ސްޕެއިން މޮޅުވިއިރު، ވޭލްސް އާއި ސާބިއާ ބައްދަލުކުރި މެޗު އެއްވަރުވެގެން ނިމިއްޖެ އެވެ.

އާދީއްތަ ދުވަހުގެ  ރޭ ކުޅުނު މެޗުން ސްޕެއިން މޮޅުވީ މެސެޑޯނިއާއާ ވާދަކޮށް 1-2 ގެ ނަތީޖާއަކުންނެވެ.

މެސެޑޯނިއާގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ސްޕެއިން އެވެ. އެގޮތުން 15 ވަނަ މިނެޓުގައި ސްޕެއިން އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޑޭވިޑް ސިލްވާ އެވެ.

މި ލަނޑަށްފަހުވެސް ސްޕެއިން އިން ދިޔައީ މެސެޑޯނިއާގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތަކެއް ހޯދަމުންނެވެ. ސްޕެއިން އަށް މެޗުގެ ލީޑު ފުޅާކޮށްދިނީ 27 ވަނަ މިނެޓުގައި ޑިއެގޯ ކޯސްޓާ އެވެ.

ފުރަތަމަ ހަފް ނިމުނީ 0-2 ގެ ނަތީޖާއިން މެސެޑޯނިއާގެ މައްޗަށް ސްޕެއިން ކުރީގައި އޮވެގެންނެވެ.

ދެވަނަ ހާފް ފެށިގެން މެސެޑޯނިއާ އިން އެޓީމުގެ ކުޅުން ރަނގަޅުކޮށްފައިވާއިރު، އެޓީމުން ވަނީ މޮޅު ޑިފެންސެއްވެސް ކޮށްފައެވެ. އެގޮތުން ބައިކޮޅަށް އިތުރު ލަނޑެއް ވަނެ ނުދިނުމަށް މެސެޑޯނިއާ ވަނީ ބުރަ މަސައްކަތްތަކެއް ކޮށްފައެވެ.

މެޗުގައި މެސެޑޯނިއާ އަށް ފަރަގު ކުޑަކޮށްދިނީ 66 ރިސްޓޮވްސްކީ އެވެ. މި ލަނޑަށްފަހުވެސް އެޓީމަށް ވަނީ ނަތީޖާ ހަމަހަމަކުރަން ހުސް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ސްޕެއިން އޮތީ ކުޅުނު ހަ މެޗުން ލިބުނު 16 ޕޮއިންޓާއެކު ގްރޫޕްގެ އެއްވަނައިގަ އެވެ. މެޗުން ބަލިވި މެސެޑޯނިއާ އޮތީ ކުޅުނު ހަ މެޗުން ލިބުނު ނުވަ ޕޮއިންޓާއެކު ގްރޫޕްގެ ފަސްވަނައިގަ އެވެ.

ކޮލިފައިންގައި ސާބިއާ އާއި ވޭލްސް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ސާބިއާގައި ކުޅުނު މި މެޗުގައި ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، ފުރަތަމަ ލަނޑު ޖަހާ ލީޑު ނެގީ ވޭލްސް އެވެ. މި ލަނޑު އެޓީމަށް ކާމިޔާބުކޮށްދިނީ 35 ވަނަ މިނެޓުގައި އާރޮން ރަމްސީ އެވެ.

މި ލަނޑަށްފަހުވެސް އެޓީމަށް ވަނީ ލީޑު ފުޅާކުރަން ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފް ނިމުނީ 0-1 ގެ ނަތީޖާއިން ސާބިއާގެ މައްޗަށް ވޭލްސް ކުރީގައި އޮވެގެންނެވެ.

ދެވަނަ ހާފް ފެށިގެން ސާބިއާ އިން އެޓީމުގެ ކުޅުން ރަނގަޅުކޮށްފައިވާއިރު، ވޭލްސްގެ ހާފަށް ބާރުބޮޑުކޮށް އެޓީމުން ވަނީ ގިނަ ހަމަލާތަކެއް ފޮނުވާލާފައެވެ. ސާބިއާ އިން މެޗުގެ ނަތީޖާ ހަމަހަމަކުރީ 73 ވަނަ މިނެޓުގައި މިޓްރޮވިކް އެވެ.

މި ނަތީޖާއާއެކު ވޭލްސް އޮތީ ކުޅުނު ހަ މެޗުން ލިބުނު 8 ޕޮއިންޓާއެކު ގްރޫޕްގެ ތިންވަނައިގަ އެވެ. ސާބިއާ އޮތީ ކުޅުނު ހަ މެޗުން ލިބުނު 12 ޕޮއިންޓާއެކު ގްރޫޕްގެ އެއްވަނައިގަ އެވެ.