ރައީސް ނަޝީދު ރާއްޖެ ވަޑައިގަންނަވަނީ މިނިވަނެއްގެ ގޮތުގައި: އެމްޑީޕީ
ގިނަ މީހުނަށް މަރުހަބާ ދެންނެވޭ ގޮތަށް އިންތިޒާމް މި ދަނީ ހަމަޖައްސަމުން
ރައީސް ނަޝީދު އެމްޑީޕީގެ އެއްވުމެއްގައި ބައިވެރިވެ ވަޑައިގަންނަވަނީ: -އެމަނިކުފާނު އަންނަ މަހު މާލެ ވަޑައިގަންނަވާނެ
އެމްޑީޕީގެ އެންމެ އިސް ލީޑަރު އަދި ކުރީގެ ރައީސް މުހައްމަދު ނަޝީދު ރާއްޖެ ވަޑައިގަންނަވަނީ މިނިވަނެއްގެ ގޮތުގައި ކަމަށާއި އެމަނިކުފާނަށް މަރުހަބާ ކިޔުމަށް ވީހާ ވެސް ގިނަ ބަޔަކު ނިކުތުމަށް އެމްޑީޕީން ގޮވާލައިފިއެވެ.
އެމްޑީޕީގެ ލީޑަރޝިޕްގެ ބޭފުޅުން އެ ޕާޓީގެ އޮފީހުގައި އަންގާރަ ދުވަހުގެ މެންދުރު ފަހު ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޗެއާޕާސަން ހަސަން ލަތީފު ވިދާޅުވީ ރައީސް ނަޝީދު ހައްޔަރުކޮށް އެމަނިކުފާނުގެ މައްޗަށް ޝަރީއަތް ހިންގައި ޖަލު ހުކުމް އިއްވުމަށް ފަހު އެ ހުކުމް ތަންފީޒު ކުރަމުން ދާއިރު އެ ހުރިހާ ކަމަކީ ގާނޫނުތަކާ ހިލާފަށް ކޮށްފައިވާ ކަންތައްކަން ދުނިޔޭގެ ޖަމިއްޔާ ޖަމާއަތްތަކުން ގަބޫލުކޮށް އެމަނިކުފާނު މިނިވަން ކުރުމަށް ގޮވާލާފައިވާ ކަމަށެވެ. އަދި އެމަނިކުފާނު ރާއްޖެ ވަޑައިގަންނަވާނީ ސިޔާސީ އަދި އިންސާނީ ހައްގުތައް ބޭނުން ކުރެވޭނެ ގޮތަށް މިނިވަން ކަމާ އެކު ކަމަށް އޭނާ ވިދާޅުވިއެވެ.
"މުޅި ދުނިޔެ ގަބޫލުކޮށްފި ރައީސް ނަޝީދާ ދޭތެރޭގައި ދިވެހި ސަރުކާރުން، ރައީސް ޔާމިން އަމަލު ކުރައްވާފައި ވަނީ މުޅިން ގާނޫނާ ހިލާފަށް ކަމަށް. އެކަން ދިވެހި ރައްޔިތުން ވެސް ދައްކަދީފި، މުޅި ބައިނަލް އަގުވާމީ މުޖުތަމައު ވެސް ދައްކައިދީފި. އަޅުގަނޑުމެން ގަބޫލުކުރާ ގޮތުގައި މިހާރު ވެސް އެމަނިކުފާނު އެ ހުންނެވީ މިނިވަނެއްގެ ގޮތުގައި. އަދި އެމަނިކުފާނު ސިޔާސީ އަދި މަދަނީ ހައްގެއް ބޭނުން ކުރުމަށް އެއްވެސް ހުރަހެއް ނޯންނާނެ ނޮވެމްބަރު އެކެއްގެ ފަހުން،" ހަސަން ލަތީފު ވިދާޅުވިއެވެ.
ހަސަން ލަތީފު ވަނީ ރާއްޖޭގެ އަތޮޅުތަކުން ވެސް އެމަނިކުފާނަށް މަރުހަބާ ދަންނަވަން ބޭނުންވާ ފަރާތަކުން އެ ދުވަހު މާލެ އައުމަށް ގޮވާލައްވާފައެވެ.
"ރައީސް ނަޝީދަށާއި މި އިސްލާހީ ހަރަކާތަށް ތާއީދުކުރައްވާ އެކި ބޭފުޅުން، އެކި ޖަމިއްޔާތަކުން އެ ވަޑައިގަންނަވަނީ މި ކަމުގެ އިންތިޒާމްތައް ހުރީ ކިހިނެއްތޯ ބައްލަވަމުން. އަޅުގަނޑުމެނަށް ފޯނުގެ ޒަރިއްޔާއިން، ޓެކްސް މެސެޖުގެ ޒަރިއްޔާ އިން، އަދި އެކި ގުރޫޕްތަކުގައި ދެކެވޭ ވާހަކައިން އަޅުގަނޑުމެން ގާތު އެދެމުން ދަނީ ވީހާ ވެސް ގިނަ ބަޔަކަށް މަރުހަބާ ދެންނެވޭނެ ގޮތަށް ޕާޓީން އިންތިޒާމްތައް ހަމަ ޖައްސާދިނުމަށް. އަޅުގަނޑުމެން ވޭތުވެދިޔަ ދެތިން ހަތަރު ދުވަހެއްގެ ތެރޭގައި މަޝްވަރާ މި ކުރީ އެކަން އެންމެ ރަނގަޅަށް ކުރެވޭނީ ކިހިނެއް ތޯ. އަދި އަމިއްލަ ގޮތުން މިކަމުގައި ބައިވެރިވާން ތިބި ފަރާތްތަކާ އެކީގައި މަޝްވަރާ ކުރާނަން،" ހަސަން ލަތީފު ވިދާޅުވިއެވެ.
އަންނަ ނޮވެމްބަރު މަހުގެ 1 ވަނަ ދުވަހު ރައީސް ނަޝީދު ރާއްޖެ ވަޑައިގަންނަވަން ހަމަ ޖެހިފައި ވާތީ އެމަނިކުފާނަށް މަރުހަބާ ދެންނެވުމުގެ އިންތިޒާމްތައް ހަމަ ޖެއްސުމަށް އެމްޑީޕީން މިހާރު ތައްޔާރުވަމުންދާ ކަމަށެވެ. އަދި އެ އިންތިޒާމްތައް ހަމަޖައްސާނީ ވީހާ ވެސް ގިނަ ބަޔަކަށް މަރުހަބާ ކިޔުމުގައި ބައިވެރިވެވޭނެ ގޮތަށް ކަމަށް ރައީސް ހަސަން ލަތީފު ވިދާޅުވިއެވެ.
"އަޅުގަނޑުމެން ރައީސް ނަޝީދަށް މަރުހަބާ ކިޔުމަށް ޕާޓީން ކުރަން ޖެހޭ އިންތިޒާމްކޮށް، ހަމަ އެހެންމެ ރައީސް ނަޝީދަށް ތާއިދުކުރައްވާ ބޭފުޅުންނާ ޕާޓީގެ މެމްބަރުން މިކަމުގައި ބައިވެރިވުގެ އިންތިޒާމްތައް މިހާރު ވަނީ ރާވަން ފެށިފައި," ހަސަން ލަތީފު ވިދާޅުވިއެވެ.
ރައީސް ނަޝީދު ރާއްޖެ ވަޑައިގަންނަވަން ހަމަ ޖެހިފައި ވަނީ ރައީސް ނަޝީދު ހައްޔަރިތާ ތިން އަހަރާއި ނުވަ މަހާއި 10 ދުވަސް ފަހުންނެވެ. އެމަނިކުފާނުގެ މައްޗަށް އިއްވުނު ހުކުމަށް ފަހު ބޭސްފަރުވާއަށް ރާއްޖެއިން ބޭރަށް ވަޑައިގެން ފަހުން ހުންނެވީ އިނގިރޭސިވިލާތުން ހިމާޔަތް ހޯދައްވައިގެންނެވެ.
