ވިއްސާރައިގެ ސަބަބުން ލަންކާގައި މަރުވި މީހުންގެ އަދަދު 9 އަކަށް
9 އޮކްޓޯބަރު 2018 | އަންގާރަ 05:515000 އާއިލާއެއް ވަނީ ރައްކާތެރި ހިސާބަށް ބަދަލުކޮށްފައި
ސްރީލަންކާ ސްޓޭޓެއްގައި ފެންބޮޑުވެފައި
އަވައްޓެރި ސްރީލަންކާއަށް މޫސުން ގޯސްވެ މަރުވި މީހުންގެ އަދަދު ނުވައަކަށް އަރައިފިއެވެ.
ލަންކާގެ ބައެއް ސިޓީތަކަށް ވަނީ ރެޑް އެލާޓް ލެވެލް 3 ނެރެފައެވެ. ރެޑް އެލާޓް ނެރެފައިވާ ސިޓީތަކަކީ ލަންކާގެ ބަދުއްލާ އާއި ކަލުތަރަ އާއި ގޯލް އާއި ކޭގޯލްއަށެވެ.
ލަންކާގެ ޑިޒާސްޓަރ މެނޭޖްމެންޓް ސެންޓަރ (ޑީއެމްސީ)ގެ ތަރުޖަމާނު ޕްރަދީޕް ކޮޑިއްޕިލީ ވިދާޅުވީ ބައެއް ހިސާބުތަކަށް 100 މިލިމީޓަރަށްވުރެ ގިނަ ވާރޭ ވެހިފައިވާ ކަމަށާއި އަންގާރަ ދުވަހާއި ބުދަ ދުވަހުގެ ތެރޭގައި އިތުރަށް ވާރޭ ވެހޭނެ ކަމަށް ލަފާކުރެވޭ ކަމަށެވެ.
މި ވިއްސާރައިގައި 48،000 އަށް ވުރެ ގިނަ މީހުންނަށް ވިއްސާރައިގެ އަސަރު ކޮށްފައިވާއިރު 5000 އާއިލާއެއް ވަނީ ރައްކާތެރި ހިސާބަށް ބަދަލުކޮށްފައެވެ.
ލަންކާގެ ހޯމް މިނިސްޓަރ ވަޖިރާ އަބޭވަރްޑެނާ ވިދާޅުވީ ސަރުކާރުން ރެސްކިއު ޓީމާ ގުޅިގެން މަސައްކަތް ކުރަމުންދާ ކަމަށާއި ހާލުގައި ޖެހިފައިވާ ފަރާތްތަކަށް ފެނާއި ކާބޯތަކެތި ފޯރުކޮށްދެމުންދާ ކަމަށެވެ.
