ޓްރާންސިޝަން ކޮމިޓީން އިސްލާމިކް މިނިސްޓްރީއާ ބައްދަލުކޮށްފި

ސަރުކާރު ބަދަލުވުމުގެ މަރުހަލާގެ މަސައްކަތްތައް ކުރިއަށް ގެންދިއުމަށް ކުރަމުންގެންދާ މަސައްކަތުގައި ޓްރާންސިޝަން ކޮމިޓީތަކުން ސަރުކާރުގެ ކުންފުނިތަކާއި ކޯޕަރޭޝަންތަކާ ބައްދަލުކުރަމުންދާ ސިލްސިލާ ބައްދަލުވުންތަކުގެ ތެރެއިން އިސްލާމިކް މިނިސްޓްރީގެ މުވައްޒިފުންނާއި ބައްދަލުކޮށްފިއެވެ.

މިއަދު ކުރިއަށް ދިޔަ މި ބައްދަލުވުމުގައި ގުޅިފައިވާ ޕާޓީތަކުގެ ޓީމްތަކުގެ ބައްދަލުކޮށްފައިވަނީ އިސްލާމިކް މިނިސްޓްރީގެ ވަކި ވަކި ސެކްޝަންތަކުގެ މުވައްޒިފުންނާއެވެ.

އިސްލާމިކް މިނިސްޓްރީގެ ހުރިހާ މުވައްޒިފުންގެ ފަރާތުންވެސް ވަރަށް ބޮޑު އެއްބާރުލުމެއް ލިބިފައިވާ ކަމަށް ގުޅިފައިވާ ޕާޓީތަކުގެ ޓީމުންވަނީ ބުނެފައެވެ.

ވެރިކަން ބަދަލުވުމުގެ މަރުހަލާގެ ކަންކަން ވިހާ ވެސް އަމާން އޮމާން ކަމާ އެކު ކުރިއަށް ގެންދިއުމަށްޓަކައި ކުރަމުން ގެންދާ މަސައްކަތުގައި ޑައިރެކްޓާ އޮފް ޓްރާންސިޝަން އައްޔަން ކުރެވުމާ އެކު، ސަރުކާރުގެ އެކި އޮފީސްތަކާއި، މިނިވަން މުއައްސަސާތަކާއި، އަދި ކުންފުނިތަކާ އެކު ދަނީ ބައްދަލުވުންތައް ބާއްވަމުންނެވެ.

އެމްޑީޕީގެ ޗެއާޕާސަން ހަސަން ލަތީފު ވިދާޅުވި ގޮތުގައި އެގޮތަށް އެ ބައްދަލުވުންތައް ކުރިއަށް ގެންދަނީ، ވެރިކަން ބަދަލުވުމުގެ މަރުހަލާގައި އެ ތަންތަނުން ރައްޔިތުންނަށް ދެމުން ގެންދާ އެއްވެސް ޚިދުމަތެއް ނުހުއްޓި ދެވޭނެ ފަދަ ގޮތަށް އިންތިޒާމުތައް ހަމަޖެއްސުމަށެވެ. އަދި ވެރިކަން ބަދަލުވުމުގެ މި ދަނޑިވަޅުގައި ވަޒީފާތަކަށް މީހުން ނެގުމާއި ޕްރޮމޯޝަން ދިނުން ފަދަ ކަންކަން ކުރިއަށް ނުގެންދެވުމަށް އެދުމާއިއެކު އެތަންތަނުގެ މަސައްކަތްތައް ހުރި ނެތް ގޮތް ބެލުމަށެވެ.