އެމްއޯސީގެ ހިންގާ ކޮމިޓީން ދުވަހަކުވެސް ބައްދަލެއް ނުކުރޭ: މަޙްލޫފް

މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި ކުޅިވަރާ ބެހޭ ވުޒާރާއާ އެއްވެސް ވަރަކަށް މުއާމަލާތް ނުކުރެވޭ ކަމަށާއި ކުޅިވަރުގެ އެހާ މުހިންމު މުއައްސަސާއެއްގެ ގޮތުގައި އޮތްއިރު އެމްއޯސީއާ އެއްވެސް ގުޅުމެއް ނެތް ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަމުން ވަޒީރު ވިދާޅުވީ މިހާރު މިއޮތް ސަރުކާރު އެކުލަވާލާ މިއަދާ ހަމަޔަށް އައިއިރު އެމްއޯސީން ބައްދަލުކުރުމަށް ފޮނުވާފައިވަނީ އެންމެ ސިޓީއެއް ކަމަށާއި، އެ ސިޓީވެސް ފޮނުވާފައިވަނީ މި ހަފުތާގައި ކަމަށެވެ. އަދި ވަޒީރުކަމާ ހަވާލުވީ ފަހުން ފުރަތަމަ ފަހަރަށް އެމްއޯސީން ލިބުނު ސިޓީ އަކީ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާ ބެހޭ ގޮތުން މަޝްވަރާ ކުރުމަށް އެދި ފޮނުވި ސިޓީއެއް ކަމަށްވެސް ވަޒީރު ވިދާޅުވިއެބެ.

އެމްއޯސީން ލިބުނު ސިޓީއާއެކު އަންގާރަ ދުވަހު އެމްއޯސީގެ ހިންގާ ކޮމިޓީއާ ބައްދަލުކުރުމަށް ފުރުސަތު ދިން ނަމަވެސް، އެމްއޯސީން ފަހުން ވަނީ އެ ބައްދަލުވުން ކެންސަލް ކޮށްފައެވެ. އެހެންކަމުން ފުރަތަމަ ފަހަރަށް ބައްދަލުކުރަން ވަޒީރު ފުރުސަތު ދިން ނަމަވެސް އެ ބައްދަލުވުން ކުރިއަކަށް ނުދެއެވެ.

އެކަމަކު ވަޒީރު ވިދާޅުވީ އެމްއޯސީއާ އެއްވެސް ގުޅުމެއް ނެތް ނަމަވެސް، އެއްވެސް ފަޅުކަމެއް ނެތް ކަމަށާއި، ކުޅިވަރާ ބެހޭ ވުޒާރާ އާއި ވަޒީރާ ދެމެދު ކުޅިވަރު އެސޯސިއޭޝަންތަކުން ވަރަށް ގާތް ގުޅުމެއް ބާއްވާ ކަމަށެވެ.

ވަޒީރު ވިދާޅުވީ އެމްއޯސީ އާއި ކުޅިވަރާ ބެހޭ ވުޒާރާއާ ރަނގަޅު ގުޅުމެއް އޮންނަ ނަމަ، އެކީ މަސައްކަތް ކުރެވޭނެ ނަމަ، އިތުރަށް ކުރިއެރުންތަކެއް ލިބިގެންދާނެ ކަމަށެވެ.

އެމްއޯސީގެ ޒިންމާ އަދާނުކުރަނީތޯ ނޫނީ ނުކުރެވެނީތޯ ކުރެވުނު ސުވާލަކަށް ޖަވާބު ދެއްވަމުން ވަޒީރު ވިދާޅުވީ އެމްއޯސީގެ ރައީސް މުޙައްމަދު ޝަވީދުގެ ޝައުގުވެރިކަން މިހާރު ފެނިގެންދަނީ ވަރަށް ކުޑަކޮށް ކަމަށާއި، އެހެންކަމުން ޝަވީދު މިހާރު މަސައްކަތް ކުރައްވަނީވެސް ކުޅިވަރާ ވަރަށް ދުރުކޮށް ކަމަށެވެ.

އެމްއޯސީގެ ރައީސްގެ ޒިންމާ އަދާނުކުރާއިރު، ދެން އެ މަސައްކަތް ކުރަން ހުންނަ ފަރާތަކީ ޖެނަރަލް ސެކްރެޓަރީ އަޙްމަދު މަރުޒޫގް ކަމަށާއި، ވުޒާރާއާއެކު ގުޅިގެން މަސައްކަތް ކުރުމަކީ މަރުޒޫގުގެ ވަރަށް ބޮޑު ޒިންމާއެއް ކަމަށް ގަބޫލުކުރައްވާ ކަމަށްވެސް ވަޒީރު ވިދާޅުވިއެވެ.

އެމްއޯސީ އަކީ ވުޒާރާއާއެކު އަދި ސަރުކާރާ ގުޅިގެން ކުޅިވަރަށް ގިނަ މަސައްކަތްތަކެއް ކުރެވޭނެ ބޮޑީއަކަށް ވާއިރު، އެކަންތައްތައް ރަނގަޅުވެގެންދާނެ ކަމަށް ގަބޫލުކުރެވެނީ ކުރިއަށް އޮތް އެމްއޯސީގެ އިންތިޚާބާއެކު ކަމަށް ވަޒީރު ވިދާޅުވިއެވެ.

ރާއްޖެއިން ބޭރުގެ އެއްވެސް ކުޅިވަރު ހަރަކާތެއްގައި ވާދަކުރާއިރު އެކަން ކުރަން އޮންނަ ބޮޑީ އަކީ އެމްއޯސީ ކަމަށް ވާއިރު، ބޭރު ގައުމުތަކުން އެހީތެރިކަން ހޯދުމަށްވެސް އެމްއޯސީގެ ދައުރު އޮންނަ ނަމަ އެކަންކަން ފަސޭހަ ވެގެންދާނެ ކަމަށް ވަޒީރު ވިދާޅުވިއެވެ.

ދެވަނަ ދައުރެއް އަދާކުރަމުންދާ މިހާރުގެ އެމްއޯސީގެ ރައީސް މުޙައްމަދު ޝަވީދު 2017 ވަނަ އަހަރުގެ މެއި މަހު ބޭއްވި އިންތިޚާބު ކާމިޔާބު ކުރެއްވުމަށް ފަހު ވިދާޅުވެފައި ވަނީ އިތުރު ދައުރަކަށް ދެން ކުރިމަތި ނުލައްވާނެ ކަމަށެވެ. ދައުރު ނިންމާލުމަށް ފަހު އައު ލީޑާޝިޕާ ތަން ހަވާލުކުރާނީ މިނިވަންތަނެއްގެ ގޮތުގައި ކަމަށް ޝަވީދު އޭރު ވިދާޅުވިއެވެ.

އަދި މިހާރު މި ހިނގާ ދައުރާއެކު އެމްއޯސީ އަކީ ހަމަ އިސްކޮޅަށް ދެމިލެވޭނެ ތަނަކަށް ހަދާނެ ކަމަށާއި، ވަކި ބަޔަކު ފައިސާ ދީގެން ނުވަތަ ނުދީގެން ކުރިއަށް ދެވިފައި ނުވަތަ ނުދެވިފައި އޮންނަ ތަނަކަށް އެމްއޯސީ ވާން ބޭނުން ނޫން ކަމަށްވެސް ޝަވީދު ވަނީ ވިދާޅުވެފައެވެ.