މެދުކަނޑާލާފައިވާ ފުޓުބޯޅަ ސީޒަން އަލުން ފެށުމުގެ ފުރުސަތު ޔަގީނުން ވެސް އެބައޮތް ކަމަށް ޔުއެފާގެ މެޑިކަލް ކޮމިޓީން ބުނެފިއެވެ.
ނޮވެލް ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓުބޯޅަ ވަނީ ހުއްޓުމަކަށް އައިސްފައެވެ. މިހާތަނަށް ޔޫރަޕުން ލީގު ކެންސަލް ކޮށްފައިވަނީ ނެދަލެންޑްސް އިންނެވެ. އަދި ފްރެންޗު ލީގުވެސް ކެންސަލް ކުރަން ޖެހިފައިވާއިރު، ބެލްޖިއަމް އާއި ސްކޮޓްލެންޑުން އަންނަނީ ލީގު ކެންސަލް ކުރުމަށް މަސައްކަތް ކުރަމުންނެވެ.
އެހެންނަމަވެސް، ޔޫރަޕުގެ ގަދަ ފަސް ލީގުގެ ތެރެއިން އިނގިރޭސި ޕްރިމިއަރ ލީގާއި، ސްޕެނިޝް ލީގާއި، އިޓާލިއަން ލީގުގެ އިތުރުން ޖަރުމަން ލީގު އަލުން ފެށުމަށް މިހާރު އަންނަނީ މަސައްކަތް ކުރަމުންނެވެ.
ޔުއެފާގެ މެޑިކަލް ކޮމިޓީގެ ޗެއަރމަން ޓިމް މޭޔާ ވިދާޅުވީ ލީގުތައް އަލުން ފަށަން ރާވަމުންދާ އެސޯސިއޭޝަންތަކުން، މެޗުތަކުގައި ބައިވެރިވާ ހުރިހާ އެންމެންގެ ސިއްހަތު ރައްކާތެރިކުރާނެ ކަމުގެ ޔަގީންކަން ލިބިދޭނެ ފުރިހަމަ އުސޫލުތަކެއް ގާއިމު ކުރާނެކަމަށެވެ. އެ ޝަރުތާއެކު، އަދި އެ ގައުމެއްގެ އާންމު ޞިއްޙަތުގެ ގާނޫނަށް އިހުތިރާމުކޮށްގެން، މެދުކަނޑާލާފައިވާ ލީގުތައް މި ސީޒަނުގެ ތެރޭގައި އަލުން ފަށަން ރޭވުމުގެ ފުރުސަތު ޔަގީނުން ވެސް އެބައޮތް ކަމަށް އޭނާ ވިދާޅުވިއެވެ.
ޔުއެފާގެ މެޑިކަލް ކޮމިޓީގެ ޗެއަރމަން ޓިމް މޭޔާ މިހެން ވިދާޅުވި ނަމަވެސް، ދާދި ފަހުން ފީފާގެ މެޑިކަލް ކޮމިޓީގެ ޗެއަރމަން ޑރ. މިކެލް ޑިހޫގޭ ވަނީ މި ސީޒަން އަލުން ފެށުމުގެ ބަދަލުގައި އަންނަ ސީޒަނަށް ތައްޔާރުވާން ގޮވާލައްވާފައެވެ.
ފީފާގެ ޗީފް ޑޮކްޓަރު ޑިހޫގޭ ވިދާޅުވީ މިފަދަ ދަނޑިވަޅެއްގައި ރިސްކު ނެގުމުގެ ބަދަލުގައި އެންމެ ރަނގަޅުވާނީ މެދުކަނޑާލާފައިވާ ލީގުތައް ކެންސަލްކުރުމެވެ. އެގޮތުން ހާލަތު ތަންދިނުމުން އަންނަ ސީޒަނަށް ތައްޔާރުވުން މާ ބުއްދިވެރި ކަމަށް އޭނާ ވިދާޅުވިއެވެ.
އެހެންނަމަވެސް، ޔުއެފާ އިން މީގެ ކުރިން ވަނީ ޔޫރަޕިއަން ލީގުތަކާ މެދު އަމަލުކުރާނެ ވަކި ގޮތެއް މެއި މަހުގެ 25 ގެ ކުރިން އެންގުމަށް އެދިފައެވެ. އަދި ޔުއެފާ ގެ ވިސްނުން ހުރީ އޮގަސްޓް މަހުގެ ކުރީކޮޅު ލީގުތައް އެއްކޮށް ފުރިހަމަ ކުރުމަށް ކަމަށް ރިޕޯޓުތައް ބުނެއެވެ.