އެންމެ ފަހުން އެމްބަޕޭ އާއި ވެންގާ ބައްދަލުކޮށްފި

އެންމެ ފަހުން މޮނާކޯ އަށް ކުޅެމުން އަންނަ ފްރާންސްގެ ސްޓްރައިކާ ކީލިއަން އެމްބަޕޭ އާއި އާސެނަލްގެ ކޯޗު އާސެން ވެންގާ ބައްދަލުކޮށްފި ކަމަށް ރިޕޯޓްތައް ބުނެފި އެވެ.

ފްރާންސްގެ ބައެއް ރިޕޯޓްތައް ބުނާގޮތުން މިދިޔަ މަހުގެ 14 ވަނަ ދުވަހު އެމްބަޕޭ އަދި ވެންގާ ވަނީ ބައްދަލުކޮށްފައެވެ. އެ ބައްދަލުވުމުގައި އާސެނަލް އަށް ބަދަލުވުމަށް އެމްބަޕޭ ކައިރީ ވެންގާ އެދިފައިވާ ކަމަށް ވެސް ރިޕޯޓްތައް ބުނެއެވެ.

ރިޕޯޓްތައް ބުނާ ގޮތުން އެމްބަޕޭ ހޯދުމަށް އާސެނަލް އިން ވަނީ 87 މިލިއަން ޕައުންޑް ހުށަހާޅާފައެވެ. އަދި ރެއާލް އިން ވަނީ އޭނާ ހޯދުމަށް 100 މިލިއަނަށް ވުރެ އަގުހުރި ހުށަހެޅުމެއް ހުށަހަޅާފައެވެ. އާސެނަލް އަދި ރެއާލް އިން ވެސް ވަނީ އެމްބަޕޭ ހޯދުމަށް މަސައްކަތްކުރަމުން އަންނަކަން ކަށަވަރުކޮށްދީފައެވެ.

އުމުރުން 18 އަހަރުގެ އެމްބަޕޭ ހޯދުމަށް ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި މެންޗެސްޓާ ޔުނައިޓެޑް، އަދި ޕެރިސް ސެއިންޓް ޖާމަން (ޕީއެސްޖީ) ހިމެނެއެވެ.

މިދިޔަ އަހަރު މޮނާކޯއާ އެކު ތިން އަހަރު ދުވަހުގެ އެއްބަސްވުމެއް ހަދާފައިވާ އެމްބަޕޭ ޓްރާންސްފާ ބާޒާރުގައި ކްލަބް ބަދަލުކުރާނެ ކަމަށް ވަނީ ބެލެވިފައެވެ. އެހެން ނަމަވެސް އޭނާ ބަދަލުވާނީ ކޮން ކްލަބަކަށް ކަން އަދި ކަށަވަރެއް ނުވެއެވެ.

އުމުރުން 18 އަހަރުގެ އެމްބަޕޭ މޮނާކޯއާ އެކު އޭނާގެ ސީނިއާ ކެރިޔަރު ފަށާފައިވާއިރު، މިހާތަނަށް އޭނާ ވަނީ އެޓީމާއެކު ހޭދަކުރި ދެ ސީޒަނުގައި ކުޅުނު 58 މެޗުގައި 27 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު މި ސީޒަނުގައި ލީގު ވެސް ކާމިޔާބުކޮށްފައެވެ.

ފްރާންސްގެ ސީނިއާ ޓީމަށް ހަތަރު މެޗު ކުޅެފައިވާ އެމްބަޕޭ ވަނީ ފްރާންސްގެ 19 އަހަރުން ދަށުގެ ޓީމާއެކު މިދިޔަ އަހަރު 19 އަހަރުން ދަށުގެ ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްފައެވެ. އޭނާ ވަނީ މިދިޔަ ސީޒަނުގެ ފްރާންސްގެ އެންމެ މޮޅު ޒުވާން ކުޅުންތެރިޔާގެ މަގާމު ވެސް ހޯދާފައެވެ.