މުއައްސަސާތައް މިވަނީ ދައުލަތުގެ އެންމެމަތީ ވެރިޔާގެ ނުފޫޒުން ސަލާމަތް ވެފައި: ސައުދު
7 އޮކްޓޯބަރު 2018 | އާދީއްތަ 00:50މުއައްސަސާތަކުން ޤާނޫނާ އެއްގޮތައް ކަންކަން ކުރަންވީ އަވަހަށް
މެމްބަރު ސައުދު ހުސައިން
މުއައްސަސާތައް ދައުލަތުގެ އެންމެމަތީ ވެރިޔާގެ ނުފޫޒުން މިނިވަން ވެފައި ކަމަށާއި މުއައްސަސާތަކުން ޤާނޫން އަސާސީއާއި ޤާނޫންތަކާއި އެއްގޮތަށް ކުރިއަށް ދާންވީކަމަށް، ގޮނޑި ގެއްލިފައިވާ ކަމަށް ކަނޑައަޅާފައިވާ ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވެއްޖެއެވެ.
އިސްލާހީ މަސައްކަތާއި ގުޅިވަޑައިގަތުމުން ގޮނޑި ގެއްލުވާލުމުގެ އިތުރުން ޓެރަރިޒަމްގެ ތުހުމަތުގައި ޖަލުގައިވެސް ހައްޔަރުކުރި ސައުދު ، ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ހޮނިހިރު ދުވަހުގެރޭ ވިދާޅުވީ ރާއްޖެއަށް ކުރިމަތިވެފައިވާ އެންމެ ބޮޑު މައްސަލައަކީ ދައުލަތުގެ މުއައްސަސާތަކުގެ މައްޗަށް ދައުލަތުގެ އެންމެ މަތީ ވެރިޔާ ރައީސުލް ޖުމްހޫރިއްޔާ ބާރުފޯރުވުން ކަމަށާއި އެކަމަށް ޚުދު ރައީސް ޔާމީން އިއުތިރާފްވެވަޑައިގެންނެވި ކަމަށެވެ. އެގޮތުން ރައްޔިތުންގެ މަޖިލީހުގެ 12 މެމްބަރުންގެ ގޮނޑި ގެއްލުވާލީ ތިމަން މަނިކުފާނު ކަމަށް ޚުދު އެމަނިކުފާނު ވިދާޅުވި ވިދާޅުވުން ސައުދު ފާހަގަ ކުރެއްވިއެވެ.
ދައުލަތުގެ މުއައްސަސާތަކަށް ރައީސުލްޖުމްހޫރިއްޔާގެ ނުފޫޒު އޮތް މިންވަރު ހާމަވާކަން ފާހަގަ ކުރައްވަމުން ސައުދު ވިދާޅުވީ މިއަދު މިވަނީ އެމައްސަލަ ހައްލުވެފައި ކަމަށާއި މުއައްސަސާތަކުން މިއަދު ކުރަންވީ ކަމަކީ ޤާނޫނާ ޚިލާފަށް ކުރެވިފައިހުރި ކަންކަން ހައްލުކޮށްދިނުން ކަމަށެވެ.
"އަޅުގަނޑުމެން އަބަދުވެސް އުއްމީދު ކުރަނީ އެންމެއަވަހަށް ފަށާ ޖަލްސާއެއްގައި ބައިވެރިވެވޭނެ ކަމަށް. އެގޮތަށް އުއްމީދު ކުރަމުން މިއަދާހަމައަށްވެސް މިއައީ. އަޅުގަނޑުމެން ޓްރައިކުރަން ކޮންމެ ޖަލްސާއަކަށްވެސް ވަންނަން. އެހެންނަމަވެސް ދައުލަތުގެ ބާރާއި ނުފޫޒް ބޭނުން ކުރައްވައިގެން އަޅުގަނޑުމެން ރައްޔިތުންގެ މަޖިލީހަށް ވަނުމަށް ހުރަސްއަޅާފައި މިވަނީ. ފެނިވަޑައިގަންނަވާނެ ރައްޔިތުންގެ މަޖިލީހުގެ މެމްބަރުން ކަންނެލި އުކާހެން ހަމަ ބޭރުކޮށްލާތަން ދައުލަތުގެ ދިފާއީ ބާރުތައް ބޭނުންކޮށްގެން. މީ މިއަދު ދައުލަތުގެ ހާލަތަކީ. އެހެންނަމަވެސް ކޮންމެ ޖަލްސާއަކީވެސް އަޅުގަނޑުމެންނަށް އުއްމީދެއް. އެއީ އަޅުގަނޑުމެން އުއްމީދު ކުރަނީ ދިވެހިރާއްޖޭގައި އަދްލުގެ ނިޒާމް، ޖުޑިޝަރީއަކީ އިންސާފަށް ހުކުމްކުރާ ތަނެއް ކަމަށް. ޢަދްލަށް ހުކުމްކުރާ ތަނެއްކަމަށް. އެކަމަކު އަޅުގަނޑުމެންނަށް ފެނިގެންދިޔަ ދެއްތޯ ރައީސުލްޖުމްހޫރިއްޔާކަމުގެ މަޤާމުގައި މިއަދު ހުންނެވި ބޭފުޅާ ރައްޔިތުންގެ ކުރިމަތީގައި 12 މެމްބަރުންގެ ގޮނޑި ގެއްލުވާލީ ތިމަން މަނިކުފާނު ކަމަށް އިއުތިރާފްވެވަޑައިގެންނެވީ. ދިވެހިރާއްޖޭގެ މުއައްސަސާތަކުގެ މައްޗަށް ނުފޫޒް ފޯރާފައި އޮތް މިންވަރު މިއޮތީ ފެންނަން. ރައީސުލްޖުމްހޫރިއްޔާ ބޭނުންފުޅުވީމާ ކޮންމެ މުއައްސަސާއަކުން ހިތުހުރިހާ ގޮތަކަށް ކަންތައްތައް ކޮށްލާތަން ފެނިގެން ދިޔައީ. އަސްލު މައްސަލައަކީ ދައުލަތުގެ އެންމެމަތީ ވެރިޔާގެ މައްސަލަ. މިއަދު މިވަނީ އެކަން ހައްލުވެފައި. މިއަދު މިއޮތީ ދައުލަތުގެ މުއްސަސާތައް އެންމެމަތީ ވެރިޔާގެ ބާރާއި ނުފޫޒުން މިނިވަންވެފައި" ސައުދު ވިދާޅުވިއެވެ.
ސައުދު ވިދާޅުވީ މި ތާރީޚީ ބަދަލުގައި ރައީސް މައުމޫންގެ އިސްލާހީ އެޖެންޑާއާ އެކީގައި ނުކުންނެވުމުން ރައީސް ޔާމީންގެ އަނިޔާވެރިކަން ފެނިގެންދިޔަކަމަށާއި އޭގެތެރެއިން ސައުދު ނިސްބަތްވެވަޑައިގަންނަވާ ގއ ވިލިނގިއްޔަކީ ޚާއްޞަ ގޮތެއްގައި ފާހަގަ ކޮށްލެވޭ ރަށެއް ކަމަށެވެ.
ސައުދު ވިދާޅުވީ ވިލިނގިލީ މުއައްސަސާތައް ޖެހޭނީ ސާފުކޮށްލަން ކަމަށާއި ގުޅިފައިވާ ޕާޓީތަކުގެ ވެރިކަމުގައި ވިލިނގިއްޔަށް އިންސާފް ހޯދައިދޭނެ ކަމަށެވެ.
