ގްރޭޓް މާޗް އޮފް ރިޓަރން: ކުޑަކުއްޖަކު ހިމެނޭ ގޮތުން ފަލަސްތީނުގެ ތިން މީހަކު މަރާލައިފި

އިސްރާއީލުން ހިސާރު ކޮށްފައިވާ ޣައްޒާ އާއި އިސްރާއީލުގެ ސަރަހައްދީ ރޮނގު ގުޅޭ ސަރަހައްދުގައި ފަލަސްތީނުގެ ރައްޔިތުން މާޗް މަހުން ފެށިގެން ކުރަމުންދާ މުޒާހަރާގައި މިދިޔަ ހުކުރު ދުވަހު އިސްރާއީލް ސިފައިން ފަލަސްތީނުގެ ކުޑަކުއްޖަކު ވެސް ހިމެނޭ ގޮތުން ފަލަސްތީނުގެ ތިން މީހަކު މަރާލައިފި ކަމަށް ޣައްޒާގެ ހެލްތު މިނިސްޓްރީން ބުނެފިއެވެ.

ޣައްޒާގެ ހެލްތު މިނިސްޓްރީން ބުނީ އުމުރުން 12 އަހަރުގެ ފާރިސް އަލް ސިރްސަވީ މަރާލީ އިސްރާއީލާއި ފަލަސްތީނު ގުޅޭ ސަރަހައްދީރޮނގު ކައިރިން އިސްރާއީލުގެ ސްނައިޕަރަކު ބަޑިޖަހައި ކަމަށެވެ.

އުމުރުން 24 އަހަރުގެ އަކްރަމް އަބޫ ސަމާން ވެސް ބަޑިޖަހައި މަރާލިއިރު އުމުރުން 28 އަހަރުގެ ހުސެއިން އަލް ރަގަބް މަރުވެފައި ވަނީ ވަޒަން އެރުމުން ޚާން ޔޫނިސްގެ ނައްސަރް ހޮސްޕިޓަލްގައި ފަރުވާ ދެމުންދަނިކޮށެވެ.

މިނިސްޓްރީގެ ތަރުޖަމާނު އައްޝަރު އަލް ޤިދްރާ ވިދާޅުވިގޮތުގައި އިތުރު 192 މީހަކު ޒަޚަމްވެފައިވާއިރު ޕެރަމެޑިކްއަކާއި ނޫސްވެރިއަކު ހިމެނެއެވެ. އޭގެ ތެރެއިން ހަތް މީހެއްގެ ހާލު ސީރިއަސްކަމަށް އޭނާ ވިދާޅުވިއެވެ.

މީގެ 70 އަހަރު ކުރިން ފަލަސްތީނުން ނެރެލެވުނު އެ ގައުމުގެ ރައްޔިތުން އަނބުރާ ގައުމަށް އައުމުގެ ހައްގު ދިނުމަށް ގޮވާލައި އިސްރާއީލާއި ފަލަސްތީނުގެ ޣައްޒާ ގުޅޭ ސަރަހައްދީ އިމުގައި ފަލަސްތީނުގެ ރައްޔިތުން މުޒާހަރާ ކުރަމުންދާތާ ފަސް މަސް ދުވަސް ވަނީ ވެފައެވެ.

މާޗް މަހުގެ 30 ވަަނަ ދުވަހު ފެށި ދެމިގެންދާ މުޒާހަރާތައް ގުޅިފައި ވަނީ މެއި މަހުގެ 15 ވަނަ ދުވަހު ފަލަސްތީނުން ފާހަގަކުރާ ނަކްބާ ދުވަހާއެެވެ. އެއީ 1948 ވަނަ އަހަރު އިސްރާއީލް އުފެއްދުމަށްޓަކައި ފަލަސްތީނުގެ ބިމުން އެ ގައުމުގެ 750،000 ރައްޔިތުން ނެރެލެވުނު ދުވަހެވެ.

ކޮންމެ ހުކުރު ދުވަހަކީ މުޒާހަރާތައް ވަރުގަދަ ދުވަހަކަށްވާއިރު މި މުޒާހަރާތައް ފެށުނު ފަހުން އިސްރާއީލް ސިފައިން ވަނީ މިހާތަނަށް ފަލަސްތީނުގެ މަދުވެގެން 180 އަށް ވުރެ ގިނަ މީހުން މަރާލައި 18،000 އަށްވުރެ ގިނަ މީހުން ޒަޚަމް ކޮށްލާފައެވެ