އިބްރާހިމް މުހައްމަދު ސޯލިހް ހުވާކުރެއްވުން ނޮވެމްބަރު 11 އަށް ހަމަޖެއްސުން މުހިންމު

މި އަހަރުގެ ނޮވެމްބަރު 11 ވަނަ ދުވަހަކީ ތާރީޚީ ދުވަހެކެވެ. ދިވެހިރާއްޖޭގެ ދެ ވަނަ ޖުމްހޫރިއްޔާ އަށް 50 އަހަރު ފުރޭ އުފާވެރި މުނާސަބަތެވެ. ނަމަވެސް އެ ރަންޔޫބިލްގެ ފުރިހަމަކަމާއި ވިދުމަށް ވަނީ ހުރަހެއް އެޅިފަ އެވެ.

ދެ ވަނަ ޖުމްހޫރިއްޔާގެ ފުރަތަމަ ރައީސް އިބްރާހިމް ނާސިރު ހުވާކުރެއްވީ 11 ނޮވެމްބަރު 1968 އެެވެ. އެއަށް ފަހު ފަސް އަހަރުގެ ދައުރު ހަމަވުމަށް ފަހު ކޮންމެ ރައީސަކު ވެސް ހުވާކުރައްވާފައިވަނީ ނޮވެމްބަރު 11 ވަނަ ދުވަހު އެވެ. ނަމަވެސް، މި ތާރީޚު ބަދަލުވެެގެން ދިޔައީ، 2013 ވަނަ އަހަރުގެ އެވެ. ފުލުފުލުގައި އިންތިޚާބު ފަސްކުރަމުން ގޮސް، ދައުރު ހަމަވިއިރު އިންތިޚާބުގެ އެންމެ ފަހު ބުރެއް ނުބޭއްވުނެވެ. އެންމެ ފަހު ބުރު ބޭއްވުނީ ނޮވެމްބަރު 16 ވަނަ ދުވަހު އެވެ. އިންތިޚާބު ކާމިޔާބު ކުރެއްވި ޕީޕީއެމްގެ ކެންޑިޑޭޓް އަބްދުﷲ ޔާމީން ހުވާކުރެެއްވީ 2013 ވަނަ އަހަރު ނޮވެމްބަރު 17 ވަނަ ދުވަހު އެވެ.

މި އަހަރުގެ އިންތިޚާބު ކައިރިވެގެން އައިއިރު އެންމެ ބޮޑު ބަހުސަކަށްވެފައިވާ އެއް ކަމަކީ، އާ ރައީސް ހުވާކުރައްވާނެ ތާރީޚަކާމެދު އެވެ. 2013 ވަނަ އަހަރުގެ ދާއިމި ނަތީޖާ ހިމެނޭ އިއުލާނުގައި ބުނެފައި ވަނީ އަބްދުﷲ ޔާމީން ހޮވިވަޑައިގަތީ 11 ނޮވެމްބަރު 2013 ވަނަ އަހަރު ފެށުނު ރިޔާސީ ދައުރަށް ކަމަށެވެ.

ރައްޔިތުންގެ މަޖިލީހުގެ ޖަލީސް ހުޅުވުމަށް ބޭއްވި ރަސްމިއްޔާތަށް އަބްދުﷲ ޔާމީން ވަޑައިގަންނަވަނީ -- ފޮޓޯ: ރައީސް އޮފީސް

އިލެކްޝަންސް ކޮމިޝަންގެ އޭރުގެ ރައީސް ފުއާދު ތައުފީގު ވިދާޅުވީ އިއުލާނުގައި އެގޮތަށް ލިޔަން ނިންމީ، ދިމާވި ސަބަބުތަކަކާއެދު އާ ރައީސް ހުވާކުރެއްވުން ލަސްވި ނަމަވެސް ނޮވެމްބަރު 11 ގައި އާ ދައުރު ފެށޭނެ ކަމަށް، ކޮމިޝަންގެ މެމްބަރުންނާއި ގާނޫނީ ވަކީލުން ވެސް ލަފާ ދެއްވުމުން ކަމަށެވެ. އެހެންވެ، އެކަން އޮޅުން ނާރާނެ ވަރަށް ސާފުކޮށް ލިޔެފައި ބޭއްވުން މުހިންމުވި ކަމަށް ފުއާދު ވިދާޅުވި އެވެ.

ނަމަވެސް ރައީސުލްޖުމްހޫރިއްޔާގެ މަގާމަށް އިންތިޚާބު ކުރަނީ ފަސް އަހަރުގެ ދައުރަކަށް ކަމަށްވާތީ، ރައީސް ޔާމީންގެ ދައުރާމެދު އުފެދިފައިވާ ބަހުސްގައި އިލެކްޝަންސް ކޮމިޝަނުން، އެޓާނީ ޖެނެރަލްގެ ލަފާ ހޯއްދެވި އެވެ. އެޓާނީ ޖެނެރަލް ލަފާ ދެއްވީ ކުރީގެ ކޮމިޝަނުން ނިންމާފައިވާ ގޮތާ ހިލާފަށެވެ. މިހާރުގެ އިލެކްޝަންސް ކޮމިޝަނުން ގަބޫލުކުރާ ގޮތުގައި ރައީސް ޔާމީންގެ ދައުރު ހަމަވާނީ ނޮވެމްބަރު 17 އަށެވެ.

ދިވެހި ޖުމްހޫރިއްޔާ އަށް ރަންޔޫބިލް ފުރޭއިރު، އެކަން އެންމެ ފުރިހަމަ މުނާސަބަތެއްގެ ގޮތުގައި ފާހަގަ ކުރެވޭނީ އާ ރައީސްގެ ހުވާކުރެއްވުން ނޮވެމްބަރު 11 އަހަށް ހަމަޖައްސައިގެންނެވެ. ދިވެހި ޖުމްހޫރިއްޔާގެ ފަޚުރުވެރި މި ތާރީޚް ދެމެހެއްޓުމަށްޓަކައި، ރައީސް އަބްދުﷲ ޔާމީން ވެސް، މިކަމަށް ވިސްނަވަންޖެހެ އެވެ. އަދި ކޯޓުން ނިންމި ނިންމުމަކާއެކު ކުރީގެ ރައީސް މުހައްމަދު ވަހީދުގެ ވެރިކަމުގެ ދައުރު ހަ ދުވަހަށް އިތުރުކޮށްފައިވާއިރު، ދިވެހި ޖުމްހޫރީ ވެރިކަމުގެ ތާރީޚް އެއްގޮތެއްގައި ދެމެހެއްޓުމަށް، ކޯޓުން ވެސް ވިސްނަންޖެހެ އެވެ. ދިވެހި ގިނަ ރައްޔިތުން އެދެމުންދަނީ މި ރަންޔޫބިލް ނޮވެމްބަރު 11 ވަނަ ދުވަހު ފާހަގަކުރުމަށެވެ.

މި ފަޚުރުވެރި، ޝަރަފުވެރި ތާރީޚު ދިވެހިންނަށް ހޯދައިދިނުމަށްޓަކައި ހުރިހާ ބޭފުޅުން ވެސް ހެޔޮ ވިސްނުން އިސްކުރުން މުހިންމެވެ.