ފަތިހުން ފެށިގެން މީހުން އެއްވަމުން ދިޔައީ އިންތިޚާބީ ރައީސް ހުވާކުރާ ރަސްމިއްޔާތު ބާއްވާ ސަރަހައްދަށެވެ. ދަރިން ވެސް ގޮވައިގެންނެވެ. ބުރިޖް ހުރަސްކޮށް ހުޅުމާލެއިން މާލެއަށް މީހުން އަންނަމުންދިޔައީ އުފަލާއެކު އެވެ. ކައިރި ރަށްރަށުންނާއި ދުރު ރަށްރަށުގެ ރައްޔިތުން ވެސް ތިއްބެވެ. މައިދާނުގެ އިރުމަތީ ފަރާތުގައި ހަދާފައިވާ ބިޔަ ސްޓޭޖްގައި އާ ރައީސް ހުވާކުރުމުގެ ރަސްމިއްޔާތު ކުރިއަށްދާ މަންޒަރު ނުފެންނަ މީހުންނަށް، އެ މަންޒަރު ދެއްކުމަށްޓަކައި މުޅި ސަރަހައްދުގައި އަދި އެ ސަރަހައްދުގެ މަގުތަކުގެ ބައެއް ހިސާބުތަކުގައި ވެސް ލެޑް ވޯލް ބަހައްޓައިފައިވެ އެވެ. ފެއްސާއި ރަތާއި ހުދުން މުޅި ސަރަހައްދު ޒީނަތްތެރިކޮށްފައިވާއިރު، އެއްވެފައިވާ މީހުން ލައިގެން ތިބީ އާ ރައީސްގެ ފޮޓޯ ޖެހި ޓީޝާޓެވެ. ބައެއް މީހުން ސަގާފީ ހެދުމުގަ އެވެ.
ދައުލަތުގެ ވެރިންނާއި އާ ސަރުކާރުގެ އިސް ވެރިންނާއި އެ ބޭފުޅުންގެ އަނބިންނާއި ދަރިން ސްޓޭޖްމަތީގައި އިށީނދެވަޑައިގަންނަވަމުން ގެންދެވި އެވެ. އިންތިޚާބީ ރައީސްގެ ދަރިކަލުންނާއި ދަރިކަނބަލުން ފެނިގެންދިޔައީ މި ރަސްމިއްޔާތުންނެވެ. އެ ދެ ބޭފުޅުން ސްޓޭޖް މައްޗަށް އަރައިވަޑައިގެންނެވިއިރު ވެސް މީހުންނަށް ނޭނގެ އެވެ. މުޅި ތަން ގުގުމައިގެން ދިޔައީސް އިންތިޚާބީ ރައީސްގެ ދަރިކަލުންނާއި ދަރިކަނބަލުންގެ ކްލޯޒަޕް މަންޒަރާއެކު، ޕްރެޒެންޓަރު އެކަން ފާހަގަ ކުރުމުންނެވެ.
މުޅި މައިދާން އެއްކޮށް ފުރިއްޖެ އެވެ. ކައިރި މަގުތައް ވެސް ފުރިއްޖެ އެވެ. މުޅި ސަރަހައްދުގައި ޖަހާފައި ހުރި ހިތްގައިމު ދިވެހި މިއުޒިކާއެކު ގައުމީ ރޫހު އާކޮށްދެ އެވެ. ބައެއް ފަހަރު ގައުމީ ލަވަ ވެސް ގެނެސްދެ އެވެ. ޖޯޝުން ފުރިގެންވާ ލަވަތައް ވެސް ގެނެސްދެ އެވެ.
ރަސްމިއްޔާތު ފެށުމަށް ކުޑަ ހިނދުކޮޅަކަށް ވެއްޖެ އެވެ. އިންތިޚާބީ ނައިބު ރައީސް އާއި އަނބިކަނބަލުން ސްޓޭޖަށް ވަޑައިގެންފި އެވެ. އިންތިޚާބީ ރައީސް ސްޓޭޖަށް ވަޑައިގަންނަވާ މަންޒަރު ބޮޑެތި ސްކްރީންތަކުން ފެންނަން ފެށުމާއެކު، އެއްވެފައިވާ އެންމެންގެ ތަރުހީބުން މުޅި މައިދާން ގުގުމަންފެށި އެވެ. މެދުކެނޑުމެން ނެތި އެތައް މިނެޓަކަށް ދެމިގެން ދިޔަ ތަރުހީބުގެ އަޑު ކެނޑުނީ، ގުރުއާނުގެ ބަރަކާތުން ރަސްމިއްޔާތު ފެށުމުންނެވެ. ހުވާކުރުމުގެ ރަސްމިއްޔާތު ބާއްވަންޖެހެނީ ރައްޔިތުންގެ މަޖިލީހުގެ ޖަލްސާއެއްގައި ކަމަށްވާތީ، މިފަހަރު އެ ރަސްމިއްޔާތު އޮތީ މުޅިން ތަފާތު ގޮތަކަށެވެ. މަޖިލީހުގެ ރައީސް ރަސްމީކޮށް ޖަލްސާ ފެއްޓެވި އެވެ.
މިއީ އަޅުގަނޑުގެ ޚިޔާލެވެ. "ޖަޒީރާ ރާއްޖެއެއް" ދަމަހައްޓައިދެއްވާނެ ކަމުގެ ވައުދާއެކު ވަޑައިގެންނެވި، އަތޮޅުތަކަށް ނިސްބަތްވާ ފުރަތަމަ ރައީސް އިބްރާހިމް މުހައްމަދު ސޯލިހް (އިބޫ) ރައީސްކަމުގެ ހުވާ ކުރެއްވުމުގެ ރަސްމިއްޔާތު މިފަހަރު ތަފާތުކޮށްލަން ފެނެ އެވެ. ދަރުބާރުގޭގެ ރަންނަބަނޑޭރި މާލަމުގައި، "އިއްޒަތްތެރިންގެ ރަސްމިއްޔާތެއް"ގެ ގޮތުގައި ހުވާކުރެއްވުމުގެ ރަސްމިއްޔާތު ބޭއްވުމުގެ ބަދަލުގައި، ޖުމްހޫރީ މައިދާނުގައި ޖަޒީރާވަންތަ ގޮތަކަށް، "ރައްޔިތުންގެ ދަރުބާރެއް" ބާއްވަން ފެނެ އެވެ.
ގާނޫނު އަސާސީގެ އިއްފަތް ގެއްލި، ދިވެހި ދައުލަތް ހަރާބުވެގެން ގޮސް، އިންސާފަކީ ބޭއިންސާފު ކަމަށްވެ، ހައްގުތައް ކަންފަތިވެފައިވާ މިދަނޑިވަޅުގައި ދިވެހިންނަށް އުއްމީދެއް ގެނެސްދެއްވީ "އެންމެންގެ ރައީސް"ގެ ގޮތުގައި ހުންނަވާނެ ކަމަށް ވިދާޅުވެފައިވާ އިންތިޚާބީ ރައީސް އިބްރާހިމް މުހައްމަދު ސޯލިހެވެ. އެހެންވެ، އެމަނިކުފާނުގެ ވެރިކަމުގެ ފުރަތަމަ ހިނދުކޮޅުން ވެސް އެ މިސާލު ދެއްކުން މުހިންމެވެ.
