ރައީސް ސޯލިހްގެ ވެރިކަމަށް ހަފްތާއެއް: ރައްޔިތުންގެ ހިޔާލު ދެކަފިވެފައި!

ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހްގެ ސަރުކާރަށް މިއަދު ވަނީ ހަފްތާއެއް ފުރިފައެވެ. އެމަނިކުފާނު ރައީސްކަމުގެ ހުވާ ކުރެއްވީ ނޮވެމްބަރު މަހުގެ 17 ވަނަ ދުވަހުގެ ހަވީރު ގަލޮޅު ބޯޅަ ދަނޑުގައެވެ. އެމަނިކުފާނު ވެރިކަމާއި ހަވާލުވެ ވަޑައިގެންނެވުމަށްފަހު، ފުރަތަމަ 100 ދުވަހުގެ ތެރޭގައި ކުރެއްވާނެ ވަރަށް ގިނަ ކަންތައްތަކެއް ވަނީ ހާމަކުރައްވާފައެވެ.

އެގޮތުން އެ 100 ދުވަހުގެ ތެރޭގައި ކުރައްވާނެ ކަމަށް ވައުދުވެވަޑައިގެންނެވި ބައެއް ކަންތައްތަކަކީ މިސްކިތް ތަކުގައި ގުރުއާން ކިޔަވައިދޭން ފެށުމާއި މާލެ ސިޓީގައި ދިރިއުޅޭ ރައްޔިތުން އާއިލާއާއެކު ދަތުރު ދާނެ ރަށެއް ހާއްސަ ކުރުމާއި ދިވެހިރާއްޖެ އަލުން ކޮމަންވެލްތްގެ މެމްބަރަކަށްވުމަށް ހުށަހެޅުއްވުމާއި ސިއްހީ ޚިދުމަތް ދޭ ސަރުކާރުގެ ހުރިހާ ތަނެއް އެއް ވިޔުގައަކުން ގުޅާލުމުގެ އިތުރުން ނުހައްޤުން ވަޒީފާއިން ވަކިކޮށްފައިވާ ފަރާތްތަކަށް އަނބުރާ ވަޒީފާ ދިނުން ހިމެނެއެވެ. އަދި ކުރީގެ ރައީސް އަބްދުﷲ ޔާމީންގެ ސަރުކާރުން ނެގި ކަޅުވަކަރު މިސްކިތް އަލުން ރޭވުމަށް ވެސް ރައީސް ސޯލިހްގެ ސަރުކާރުން ވަނީ ނިންމަވާފައެވެ.

ރައީސް ސޯލިހްގެ ސަރުކާރަށް ހަފްތާއެއް ފުރުމާއި ގުޅިގެން ރާއްޖެއެމްވީއާ ވާހަކަ ދެއްކި ބައެއް އާންމުން ބުނީ އެމަނިކުފާނުގެ ސަރުކާރާމެދު އަދި އެއްޗެއް ބުނަން މާ އަވަސް ކަމަށެވެ. އަދި އަނެއް ބައި މީހުން ބުނީ އެއްވެސް ގޮތަކަށް މި ސަރުކާރުން ކަންތައްތައް ކުރާ ގޮތާމެދު ހިތްހަމަނުޖެހޭ ކަމަށެވެ.

"ވަރަށް ގޯސް ސަރުކާރު، އަހަރުމެން ވޯޓްދިނީ މި ސަރުކާރު މިހެން ހިންގާކަށް ނޫން، ޤާސިމް އިބްރާހީމް އަށް ހުރިހާ ބާރެއް ދީގެން ނުވާނެ" އާންމުންގެ މީހަކު ބުންޏެވެ.

އަނެއް ބައި ފަރާތްތަކުން ވަނީ ރައީސް ސޯލިހްގެ ސަރުކާރު ހިނގަމުންދާ ގޮތާއި މެދު ހިތްހަމަޖެހޭ ކަމަށް ވެސް ބުނެފައެވެ. ކޮންމެޔަކަސް އެކި މީހުންގެ ހިޔާލު ރައީސް ސޯލިހްގެ ސަރުކާރާ ދޭތެރޭގައި ހުރީ ވަރަށް ތަފާތު ކޮށެވެ.

"ސަރުކާރު އަދި ދާގޮތް ރަނގަޅު. ދެން މި ސަރުކާރާމެދު ގޮތެއް ނިންމަން އިނގޭނީ 100 ދުވަސް ފަހުން، އަޅުގަނޑު އެދެނީ ރައީސް ސޯލިހްގެ ސަރުކާރު މާތްﷲ ގެ ރަހުމަތްފުޅާއެކީގައި ކުރިއަށް ދިޔުން" ރައީސް ސޯލިހްގެ ސަރުކާރަށް ހަފްތާއެއް ވުމާއި ގުޅިގެން ރާއްޖެއެމްވީއަށް އިންޓަވިއު ދިން އާންމުންގެ މީހަކު ބުންޏެވެ.

އެހެންނަމަވެސް ގިނަ ފަރާތްތަކުން މައިގަނޑު ގޮތެއްގައި ފާހަގަކޮށްފައިވާ ކަންތައްތަކަކީ އެންމެ ބޮޑެތި މައްސަލަތައް ގޮތުގައި އޮތް ބޯހިޔާވަހިކަމުގެ މައްސަލައާ ބިދޭސީން ރާއްޖޭގައި ޤަވާދާއި ހިލާފަށް އުޅޭ މައްސަލައިގެ އިތުރުން މަސް މާރުކޭޓު ކުރިމަތީގައި އޮންނަ ފަޅުގައި ދޯނިތައް ބެހެއްޓުމަށް ދަތިވުމުގެ މައްސަލަ އެވެ. އަދި މީގެ އިތުރުން ރައީސް ސޯލިހްގެ ސަރުކާރުގެ ކެބިނެޓް އެކުލަވާލައްވާފައިވާ ގޮތާއި ދެތޭރެ ވަރަށް ބޮޑަށް ހިތްހަމަނުޖެހިގެން ވަރަށް ގިނަ އާންމުން ވަނީ އެކަމުގެ ކަންބޮޑުވުން ފާޅުކޮށްފައެވެ.

ރައީސް ސޯލިހްގެ ވެރިކަމަށް ހަފްތާއެއް ވެފައިވާއިރު އެމަނިކުފާނު ވެވަޑައިގެންނެވި ބައެއް ވައުދުތައް ވަނީ ފުއްދަވާފައެވެ. އެގޮތުން އިންސާފު ޤާއިމްކުރުމުގެ މަސައްކަތް ފައްޓަވައި ސިޔާސީ ހައްޔަރީންނަށް އާއިލާގެ ގާތަށް ދެވުމާއި، ދައުލަތުން ގެއްލިފައިވާ ފައިސާ ހޯދުމުގެ މަސައްކަތް ފެއްޓެވުމުގެ އިތުރުން އަނިޔާވެރި ގޮތަކަށް މަރާލާފައިވާ އަދި ވީނުވީއެއް ނޭނގި ގެއްލިފައިވާ ފަރާތްތަކަށް ވީނުވީ ހޯދައި، މަރުތަކުގެ ހަޤީޤަތް ހޯދުމުގެ މަސައްކަތް އެމަނިކުފާނު ވަނީ ފައްޓަވާފައެވެ. އަދި މީގެ އިތުރުން ޓްރާންސްޕޯޓް މިނިސްޓްރީން ވަނީ ޓެކްސީ ބޯޑުގެ ފީ ކަނޑާލާ، ގަވައިދާއި ހިލާފަށް ޕާކުކޮށް، އަދި ގިނަ ދުވަސްވީ އުނޅަދުތަށް ޓޯ ކުރުމުގެ މަސައްކަތް ފެށުމުގެ އިތުރުން ސަރުކާރުގެ ބޭނުމަށް މާލޭގެ ފަޅުތެރެއިން ނަގާފައިވާ ބައެއް ތަންތަން އާންމުންނަށް ބޭނުންކުރެވޭ ގޮތަށް ހުޅުވާލައިފައެވެ.

ރައީސް ސޯލިހްގެ ސަރުކާރަށް ހަފްތާއެއް ފުރިފައިވާއިރު ޝައްކެއް ވެސް ނެތް ގޮތުގައި ސަރުކާރެއްގެ ހިންގުން އެންމެ އެދެވޭ ގޮތުގައި ފެންނާނީ ކުންފުނިތަކަށް މީހުން އައްޔަންކޮށް، ސަރުކާރުގެ މުއައްސަސާތަކަށް ޤާބިލް ފަންނީ އަދި ނަޒާހަތްތެރި ފަރާތްތައް އައްޔަންކޮށްގެންނެވެ. ކުންފުނިތަކުގެ އިސް މަޤާމުތައް ހުސްކޮށްވާއިރު، ރައްޔިތުން އުއްމީދުކުރަނީ އެ ކުންފުނިތަކަށް ނަޒާހަތްތެރި ފަރާތްތައް އައްޔަންކުރާނެ ކަމަށެވެ.

ރަނގަޅު ސަރުކާރެއްގެ ފަރާތުން ރައްޔިތުން އެދޭނީ ހަމަހަމަކަމާއެކީ އިންސާފުގެ މަގުން ކަންތައްތައް ކުރިއަށް ގެންގޮސް ރައްޔިތުންނާއި ގާތުން ހިދުމަތްދޭނެ ވެރިއެކެވެ. ރައީސް ސޯލިހްގެ ވައުދަކީވެސް އެއީއެވެ. ރައްޔިތުންގެ ވެރިކަމެއް ޤާއިމްކޮށްދޭނެކަމުގެ ވައުދުއެވެ. އައު ސަރުކާރަށް އަދި ހަފްތާއެއްވީއިރު، ރައީސް ސޯލިހްގެ ވައުދުތައް ފުއްދުމަށް އެމަނިކުފާނަށް އިތުރު ވަގުތާއި ފުރުސަތު ރައްޔިތުން ދެއްވަންޖެހެއެވެ. އެމަނިކުފާނަކީ ރައްޔިތުންނަށް ހިދުމަތްކޮށްދޭ، ރައްޔިތުންގެ ވެރިއެއްކަން ސާބިތުކޮށްދިނުމަށް ފުރުސަތު ދެއްވަންޖެހެއެވެ.