ހަލާކު ހޯއްދެވީ އަމިއްލަފުޅަށެވެ.

ވެރިކަމަށް ވަޑައިގަތުމަށް ފަހު ފެއްޓެވީ 2018 ވަނަ އަހަރުގެ ކެމްޕެއިންނެވެ. މަހާސިންތާތައް ބާއްވަން ފެށިއެވެ. އެއާއެކު ޕާޓީތެރޭގައި ބައިބައިވުން ބޮޑުވަމުންދިޔަ އެވެ. ރިޔާސީ އިންތިޚާބަށް ހަރަދުކުރަން އެކި މީހުން އަތުން ފައިސާ ލިބިވަޑައިގަންނަވާ ކަމަށް ވިދާޅުވަމުން ގެންދެވި އެވެ. އެ ފައިސާ މެނޭޖުކުރެއްވީ ކާކުކަން ވިދާޅުވި އެވެ. އެ ފައިސާއެއް މިފައިސާއެއް ނޭނގޭ މިންވަރަށް ނުހައްގު މުއްސަނދިކަން އެ މީހާ ހޯދި އެވެ.

ރައްޔިތުންގެ މަޖިލީހުގެ މެމްބަރުން ހޮވުމަށް އެ ފައިސާ ހަރަދުކުރިކަން އަށް އޭރުވެސް އެނގިވަޑައިގެންނެވި އެވެ. މަގާމަށް އައްޔަން ކުރެއްވިއިރު، އާދައިގެ ގޮތަކަށް އުޅުއްވަމުން ގެންދެވި އިންސާނާ، މުއްސަނދިކަން ހޯއްދެވި ގޮތެއް، މެމްބަރުންނަށް ހަރުދުކުރައްވަން އެހާ ފައިސާ ހޯއްދެވީ ކިހިނެއްތޯ ބެއްލެވުމުގެ ވިސްނުން ވަލިއްޔުލްއަމުރުގެ ނެތީ ކީއްވެގެންތޯ އެވެ؟

ދައުލަތް ހަރާބުވުމުގެ ފެށުމަކީ އެއީ އެވެ. ނާޖާއިޒު ގޮތުގައި ހޯދި ފައިސާއިން ޝާހީ އާއިލާއަށާއި ރައްޔިތުންގެ މަޖިލީހުގެ މެމްބަރުންނަށް ހަރަދުކުރިކަން ތުހްމަތުކުރެވެ އެވެ. ބައެއް ހެކި ފެންނަން އެބަ ހުއްޓެވެ. ނަމަވެސް މައްސަލަ ގޯހުން ގޯހަށް ދިޔައީ އެކަންކަން ބެލުމުގެ ބަދަލުގައި ކަންކަން ކުރަން ހިތްވަރު ލިބޭ ގޮތަށް ހިންގުން ބައްޓަންވެގެން ދިއުމެވެ. ތިމާގެ އަމިއްލަ ފައިދާއަށް ގާނޫނުތައް ބަދަލުކުރުމާއި މަގާމުތަކުގައި ތިބި ބޭފުޅުން ބަދަލުކުރުމާއި މުއައްސަސާތަކުގެ ދުވަސް ދުއްވާލުން އެއީ އުސޫލަކަށްވި އެވެ. ދައުލަތުގެ މަގާމުތަކުގައި ތިއްބަވާ ބޭފުޅުންނަށް އެކި އެކި ނުފޫޒު ފޯރުވައި، ބިރުވެރިކަމުގައި ބެހެއްޓުމަކީ ހިންގުމުގެ އުސޫލް ކަމަށް ވެގެންދިޔަ އެވެ. މި ދަރަޖައަށް ގޯސްވުމުން، އެބައެއްގެ ހަލާކު އެ ބައެއްގެ ތެރެއިން ނުކުންނާނެކަން އެއީ ޠަބިޢީ އުސޫލުކަން ދަންނަންޖެހެ އެވެ. މިއަދު ދަނީ އެ މަންޒަރު ފެންނަމުންނެވެ.

އިންތިޚާބުގެ ކުރިން ވިދާޅުވަމުން ގެންދެވީ ކޮންމެ ގޮތަކުން ވިޔަސް ވެރިކަމުގައި ހުންނަވާނީ އެމަނިކުފާނު ކަމަށެވެ. އެކަމަށް މަގުފަހިކުރުމަށްޓަކައި ގިނަ ކަންކަންތައްތަކެއް ކުރި ކަމަށް ތުހްމަތު ކުރެވުނެވެ. އިލެކްޝަންސްގެ އޮފިޝަލުން ކަނޑައެޅީ ރިޔާސީ ގަނޑުވަރުން ކަަމަށާއި، ސަރުކާރުގެ އޮފިސްތަކާއި ކުންފުނިތަކުގެ މުވައްޒަފުންގެ ރިރެޖިސްޓްރޭޝަން ފޯމްތަކުގެ ބައެއް ތަންތަން ފުރިހަމަ ނުކޮށް ގެންދިޔައީ ރިޔާސީ ގަނޑުވަރަށް ގެންދިޔަ ކަމަށް ތުހްމަތުކޮށް ވާހަކަ ފެތުރިގެންދިޔަ އެވެ. އެގޮތަށް ފޯމްތައް އަންނަ ކަމަށް އެއްބަސްވާ ވީޑިއޯއެއް ވެސް ދައުރުވި އެވެ. ކެމްޕެއިން އޮފީހުންކަމަށް ބުނެ ދައުރުވަމުންދިޔަ ފޯންކޯލްތަކުގެ މައްސަލަ ވެސް ހޫނިވި އެވެ. މި ނޫން ވެސް އެތައް ބައިވަރު މައްސަލައެކެވެ.

އިންތިޚާބުގެ ސައްހަކަމާމެދު ރައީސް ޔާމީނާއި ޕީޕީއެމްއިން މިހާރު ސުވާލު އުފެއްދި ނަމަވެސް، އެ ދައްކަވާ ވާހަކަތަކާމެދު ކުރިން އެ ބޭފުޅުންގެ ކަންބޮޑުވުމެއް ނެތެވެ. ކަންބޮޑުވުން ތިލަވީ އިންތިޚާބުގެ ބޮޑު ނާކާމިޔާބީ ގަބޫކުކުރެއްވި ފަހުންނެވެ. އިންތިޚާބުގެ ނަތީޖާ ގަބޫލު ކުރިކަންް އިއުލާނު ކުރެއްވި ނަމަވެސް، ހަގީގަތުގައި އިންތިޚާބު ބަލިވާނެ އެއްވެސް ގޮތެއް އޭރު ފެނިވަޑައިގެންފައި ނެތުމުން، އިންތިޚާބުގެ ނަތީޖާއާމެދު ސުވާލު އުފައްދައި، މުޒާހަރާ ފެއްޓެވި އެވެ. ވަރަށް ވެސް ހުތުރު ވެގެންވާ މަންޒަރެކެވެ.

މާލޭގައި މުޒާހަރާނުކުރެވޭ ގޮތަށް ހެދި ގާނޫނާ ޚިލާފަށް މުޒާހަރާކުރާ ރައީސް ޔާމީން ހިތްވަރު ދެއްވި އެވެ. އެމްޑީޕީން މުޒާހަރާ ކުރާ ހިތްވަންޏާ ހައްޖަށް ދިއުމަށާއި، ކަށްވަޅުގައި ވެސް އެމްޑީޕީން ކުރާނީ މުޒާހަރާ ކަމަށް އެމަނިކުފާނު ވިދާޅުވިއިރު، މިއޮތީ ފޭއްސި އިލޮށިގަނޑު އަމިއްލަ ލޮލަށް ހެރިފަ އެވެ. މި ހާލަތަށް ދިޔައީ ކީއްވެގެންތޯ ވިސްނާލަން ހިނގާށެވެ.

އެއްވެސް ކަމެއްގައި އިހްލާސްތެރިކަމެއް ނެތީ އެވެ. ފުރަތަމަ ދުއްވާލީ، ވެރިކަމަށް ގެނައި ބޭފުޅުންނެވެ. އެކުވެރިންނެވެ. އިދިކޮޅު ލީޑަރުން ތިބުމަށް ނޭދުނެވެ. ވާދަވެރިން ޖަލުގަ އެވެ. އާއިލާ ބޭފުޅުންނަށް ވެސް އޮތީ ކުޑަކޮޅި އެވެ. ޕާޓީގެ އިސް ބޭފުޅުންނަށް ވެސް އޮތީ ބިރުވެރިކަމެވެ. ދައުލަތުގެ މަގާމުތަކުގައި ދެމެހުރުމަށް ބަލަންޖެހެނީ ވެރިޔާގެ ރުހުން ހޯދުމަށެވެ. ރައްޔިތުންގެ ބާރެއް ނޯންނާނެ ކަމަށް ވިސްނި ކަންކަން ކުރި ނަމަވެސް، މިއަދު މިވަނީ ރައްޔިތުންގެ ބާރު ދައްކައިފަ އެވެ. ދެން ވެސް ހެޔޮ ގޮތަށް އަމަލުކުރާށެވެ. ނޫނީ ބީވެގެންދާނީ ތިމާގެ ނަފުސެވެ. ތިމާގެ ބާރުވެރިކަމުގައި ހުންނައިރު، ފަނިފޮކުސަ ކައި އުޅުނު ނަމަވެސް، ބާރުދާ ހިސާބުން، އެ ފަނިފަކުސަ ތިމާ ސިކާރަކޮށްލަ އެވެ. މިއީ ފިތުރަތުގެ އުސޫލެވެ.