ރައީސް މައުމޫން ދޫކޮށްލީ ކަފާލާތުގެ ދަށުން
އިންޑިއާގެ ބޮޑު ވަޒީރު ނަރެންދުރަ މޯދީ
އިންޑިއާގެ ބޮޑު ވަޒީރު ނަރެންދުރަ މޯދީއަށް ރައީސް މައުމޫން ޝުކުރު އަދާކުރައްވައިފިއެވެ.
ރައީސް މައުމޫނު ކުރެއްވި ޓްވީޓެއްގައި ވިދާޅުވެފައިވަނީ ބޮޑުވަޒީރު ނަރެންދުރަ މޯދީ އެމަނިކުފާނަށް އަންގާރަ ދުވަހު ގުޅުއްވާފައިވާ ކަމަށެވެ.
އަދި ރާއްޖޭގެ ޑިމޮކްރަސީއަށް މޯދީ ދެއްވާ އެހީތެރިކަމަށް ޝުކުރުއަދާކުރައްވާ ކަމަށް ރައީސް މައުމޫނުގެ ޓްވީޓުގައި ވަނީ ވިދާޅުވެފައެވެ.
ބޮޑުވަޒީރު މޯދީ ރައީސް މައުމޫނަށް ގުޅުއްވާފައިވާއިރު އެމަނިކުފާނު ކަފާލާތުގެ ދަށުން ގެެއަށް ބަދަލު ކޮށްފައިވަނީ މިދިޔަ މަހު 30 ވަނަ ދުވަހުއެވެ.
ރައީސް މައުމޫން ހައްޔަރުކޮށް، ހުކުމެއް އިއްވާފައި ވަނީ ފެބްރުއަރީ 1 ގައި ސުޕްރީމް ކޯޓުން ނެރުނު އަމުރާ ގުޅިގެން ކުއްލި ނުރައްކަލުގެ ހާލަތު އިއުލާންކޮށް ހިންގި ތަހުގީގަކަށް ފަހުއެވެ. އެ އަމުރާ ގުޅިގެން އެމަނިކުފާނަށް ޓެރަރިޒަމްގެ ދައުވާ ވެސް ދައުލަތުން އުފުލިއެވެ. ކުއްލި ހާލަތު އިއުލާން ކުރުމަށް ފަހު ރައީސް މައުމޫން ހައްޔަރުކުރީ މި އަހަރުގެ ފެބްރުއަރީ މަހުގެ 5 ވަނަ ދުވަހުގެ ރެއެވެ.
އަދުލު އިންސާފަށް ހުރަސްއެޅި ކަމަށް ބުނެ ދައުލަތުން އުފުލި ދައުވާ ސާބިތުވުމާ ގުޅިގެން ރައީސް މައުމޫން ގެންދަވަނީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ.
