އިންތިހާބުގެ ކެމްޕެއިނަށް ރައީސް ހެއްދެވީ ވަކި އެކައުންޓެއް، ގާނޫނާ ހިލާފު ކަމެއް ނޫޅޭނެ: މުއާޒު

ރިޔާސީ އިންތިހާބުގެ ކެމްޕެއިނަށް ރައީސް އަބްދުﷲ ޔާމީން ހައްދަވާފައި ވަނީ ވަކި އެކައުންޓެއް ކަމަށާއި ކެމްޕެއިން ކުރުމުގައި ގާނޫނާ ހިލާފު އެއްވެސް ކަމެއް ނޫޅޭނެ ކަމަށް ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީ (މުއާ) ވިދާޅުވެއްޖެއެވެ.

މުއާޒު އެގޮތަށް ވިދާޅުވެފައި ވަނީ އިންތިޚާބަށް ކައިރިވެފައި ވަނިކޮށް ރައީސް ޔާމީންގެ އެކައުންޓަށް 1.5 މިލިއަން ޑޮލަރު ޖަމާވެފައިވާ ކަމަށް އަލްޖަޒީރާ އިން ބުނެފައި ވަނިކޮށެވެ.

އަލްޖަޒީރާއިން ރިޕޯޓްކޮށްފައި ވަނީ އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓުން (އެފްއައިޔޫ) ސެޕްޓެމްބަރު މަހުގެ 13 ވަނަ ދުވަހު އޭރުގެ އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ނަވާޒަށް ފޮނުވި ސިޓީއަކާ ހަވާލާދީއެވެ. އަލްޖަޒީރާ އިން ބުނީ އެ ސިޓީ އެތަނަށް ލިބިފައިވާ ކަމަށެވެ. އަދި އެ ފައިސާތައް ޖަމާކޮށްފައި ވަނީ ދެ ފަހަރެއްގެ މަތިން މޯލްޑިވްސް އިސްލާމިކް ބޭންކުގައި ހުންނަ ރައީސް ޔާމީންގެ އެކައުންޓަށެވެ. އެއީ މިދިޔަ ސެޕްޓެމްބަރު މަހުގެ ފަސް ވަނަ ދުވަހު 648،508 ޑޮލަރު އަދި ސެޕްޓެމްބަރު 10 ވަނަ ދުވަހު ޖަމާކުރި 810،635 ޑޮލަރު ކަމަށް އެފްއައިޔޫއާ ހަވާލާދީ އަލްޖަޒީރާގައި ބުނެފައި ވެއެވެ.

އެކަމާ ގުޅިގެން މުއާޒު ކުރެއްވި ޓްވީޓެއްގައި ވިދާޅުވީ އިންތިހާބުގެ ކެމްޕެއިނަށް ރައީސް ވަކި އެކައުންޓެއް ހަމަޖައްސެވި ކަމަށާއި އެ އެކައުންޓަށް ގަވާއިދުން ފައިސާ ލައްވަމުން ގެންދެވި ކަމަށެވެ. އަދި ގާނޫނާ ހިލާފު އެއްވެސް ކަމެއް އެކަމުގައި ނޫޅޭނެ ކަމުގެ ފުރިހަމަ ޔަގީންކަން އަރުވާ ކަމަށް މުއާޒު ވިދާޅުވެފައި ވެއެވެ.

އިންތިހާބުގެ ކެމްޕެއިނާ ގުޅިގެން ރައީސް ޔާމީންގެ އެކައުންޓަށް ފައިސާ ވަތް މައްސަލަ ފެންމަތިވެފައިވާއިރު، އެކަން މުއާޒު ދޮގު ކުރައްވާފައެއް ނުވެއެވެ.