ދާއިމީ ނަތީޖާ އިއުލާނުކުރުމުން އެމެރިކާ އިން އިލެކްޝަން ކޮމިޝަނަށް މަރުހަބާ ކިޔައިފި
3 އޮކްޓޯބަރު 2018 | ބުދަ 19:00އިންތިޚާބުގެ ނަތީޖާ ބަލައިގަނެ ދުނިޔެއިން ދަނީ މަރުހަބާ ކިޔަމުން
އިންތިޚާބީ ރައީސް އިބްރާހީމް މުހައްމަދު ޞާލިހާއި އިންތިޚާބީ ނާއިބު ރައީސް ފައިސަލް ނަސީމް އުފާ ފާޅުކުރުމުގެ ހަފްލާއެއްގައި
ރިޔާސީ އިންތިޚާބުގެ ދާއިމީ ނަތީޖާ އިއުލާނުކޮށް އިންތިޚާބު ކާމިޔާބު ކުރެއްވި އިބްރާހީމް މުހައްމަދު ސާލިހަށް އެކަން އެންގުމުން އެމެރިކާއިން އިލެކްޝަންސް ކޮމިޝަނަށް މަރުހަބާ ކިޔައިފިއެވެ.
އެމެރިކާގެ ބިއުރޯ އޮފް ސައުތު އެންޑް ސެންޓްރަލް އޭޝިއަން އެފެއަރޒް އިން އަންގާރަ ދުވަހު ކޮށްފައިވާ ޓްވީޓެއްގައި ވަނީ އިންތިޚާބީ ރައީސް އިބްރާހީމް މުހައްމަދު ޞާލިްހުގެ ސަރުކާރާ އެކު ޑިމޮކްރެޓިކް، ފާގަތި، މިނިވަން، އަދި ހުޅުވާލެވިފައިވާ ރާއްޖެއެއްގެ ގޮތުގައި މަސައްކަތް ކުރެވޭނެ ކަމަށް ދެކޭ ކަމަށެވެ.
އިންތިޚާބުގެ ދާއިމީ ނަތިޖާ އިއުލާނުކުރުމުގެ ކުރިން ވެސް އެމެރިކާ އިން ވަނީ ރިޔާސީ އިންތިޚާބުގައި، ގައުމުގެ މުސްތަގުބަލު ކަނޑައެޅުމަށްޓަކައި ޑިމޮކްރެޓިކް އުސޫލުން ބަސްބުނެފައި ވާތީ ދިވެހިންނަށް މަރުހަބާ ކިޔާފައެވެ.
ވަގުތީ ނަތީޖާ ރަސްމީކޮށް އިއުލާނުކުރުމުގެ ކުރިން އެމެރިކާގެ ސްޓޭޓް ޑިޕާޓްމަންޓުން ސެޕްޓެމްބަރު 23 ވަނަ ދުވަހު ނެރެފައިވާ ބަޔާނުގައި ބުނެފައި ވަނީ މީޑިއާއާއި މަދަނީ ޖަމްއިއްޔާތަކުގެ ރިޕޯޓްތަކުން އިދިކޮޅު ކެނޑިޑޭޓް އިންތިޚާބް ކާމިޔާބުކޮށްފައިވާކަން އެނގޭ ކަމަށެވެ. އަދި ރައްޔިތުންގެ ނިންމުމަށް އިހުތިރާމްކުރުމަށް ގޮވާލާ ކަމަށް އެމެރިކާ އިން ވަނީ ބުނެފައެވެ.
ދުނިޔޭގެ ސަމާލުކަން ހުއްޓިފައި އޮތް ރާއްޖޭގެ ރިޔާސީ އިންތިޚާބު ގުޅިފައިވާ ސިޔާސީ ޕާޓީތަކުގެ ފަރާތުން ވާދަކުރެއްވި އިބްރާހިމް މުހައްމަދު ސޯލިހް ކާމިޔާބުކުރެއްވީ 58.4 އިންސައްތަ ވޯޓް ހޯއްދަވައިގެންނެވެ. ދައުލަތުގެ ހުރިހާ ވަސީލަތެއް ބޭނުންކުރައްވައިގެން ކެމްޕެއިން ކުރައްވަމުން ދެވަނަ ދައުރަކަށް ނުކުންނެވި މިހާރުގެ ރައީސް އަބްދުﷲ ޔާމީން އަބްދުލް ގައްޔޫމަށް ލިބިވަޑައިގެންނެވީ 41.6 އިންސައްތަ ވޯޓެވެ.
އިންތިޚާބާ ގުޅިގެން އެމެރިކާ އިން ދެވަނަ ފަހަރަށް މަރުހަބާ ކިޔާފައިވާއިރު ރައީސް ޔާމީން މިހާރު ގެންދަވަނީ އިންތިޚާބުގެ ނަތީޖާއާ މެދު ހިތްޕުޅު ހަމަޖެހިވަޑައިނުގެން މުޒާހަރާ ކުރައްވަމުންނެވެ. އަދި އެމަނިކުފާނަށް ސަޕޯޓްކުރާ ފަރާތްތައް މުޒާހަރާކުރުމަށް ވަނީ ގޮވާލައްވާފައެވެ.
