މިއަހަރު ނިމޭ އިރު ސްޓެލްކޯގެ ދަރަނި ފަސް ބިލިއަނަށް އަރާނެ ކަމަށް އެކުންފުނިން ބުނެފިއެވެ.
ސްޓެލްކޯގެ އަހަރީ އާންމު ޖަލްސާގައި ވާހަކަ ދައްކަވަމުން ސްޓެލްކޯގެ ސީއީއޯ އަހުމަދު ޒުހޫރު ވިދާޅުވީ، އެކުންފުންޏަށް ދިމާވެފައިވާ އެންމެ ބޮޑު ގޮންޖެހުމަކީ އެކުންފުނީގެ ދަރަނި ކަމަށެވެ. އަދި ކުންފުނީގެ ގައިގަނޑަކަށް 81 ޕަސެންޓްއަކީ އެ ކުންފުނީގެ ލައިބިލިޓީ ކަމަށާއި މިކަމަށް ހައްލެއް ހޯދުމަށް ތަފާތު ވިސްނުމަކުން ވިސްނަންޖެހޭ ކަމަށް އޭނާ ވިދާޅުވި އެވެ. ކުންފުނީގެ ހާލަތު ރަނގަޅު ކުރުމަށް އަވަސް މަސައްކަތްތަކެއް ކުރަންޖެހޭ ކަމަށްވެސް އޭނާ ވިދާޅުވިއެވެ.
ޒުހޫރު ވިދާޅުވީ، ކުންފުނީގެ ދަރަނި ކުޑަ ކުރުމަށްޓަކައި އާމްދަނީ އިތުރު ކުރާނެ ފްލޭންތަކެއް ރޭވިފައިވާ ކަމަށެވެ. އެގޮތުން ގްރޭޓަރ މާލޭ ނެޓްވޯކު ޕްރޮޖެކްޓާއި އިންޑަސްޓްރިއަލް ވިލޭޖުގައި އިންޖީނު ގެއެއް ތަރައްގީ ކުރުމުގެ މަސައްކަތްތަކާއި އަތޮޅު ތެރޭގައި ހިދުމަތް ދޭ، އިންޖީނުގެ ތައް ރީ ޑިޒައިން ކުރުމަށް ހަމަޖެހިފައިވާ ކަމަށް އޭނާ ވިދާޅުވިއެވެ.
"މީގެ އިތުރުން ކުންފުނީގެ މުވައްޒަފުންނަށް އިތުރަށް ތަމްރީނުތައް ދެވެންޖެހޭ. މަތީ ތައުލީމުގެ ފުރުސަތު ވަނީ ގިނަ މުވައްޒަފުންނަށް ފަހިކޮށްދީފައި. ސްޓެލްކޯގެ ފައިނޭންޝިއަލް ސްޓެބިލިބިޓީ އާއި އެކު ކުންފުނީގެ މުސާރަ އިތުރު ކުރާނެ ގޮތްތަކާ ގުޅޭ ގޮތުން ވަނީ ބޯޑާވެސް މަޝްވަރާ ކުރެވިފައި." ޒުހޫރު ވިދާޅުވިއެވެ.
ކުންފުނީގެ ސްޓްރަކްޗަރ އެފިޝިއެންޓް ކުރުމަށްޓަކައި ވެސް މުހިއްމު ގިނަ މަސައްކަތްތަކެއް ރޭވިފައިވާ ކަމަށް އޭނާ ވިދާޅުވިއެވެ.
