އިންތިޚާބުގެ ވޯޓާ ކުޅެން އުޅުމަކީ އަޅާނެ އެންމެ ބޮޑު ޅަ އެތި: އަމީން
27 ސެޕްޓެމްބަރު 2018 | ބުރާސްފަތި 02:33ރިޔާސީ އިންތިޚާބުގެ ހުރިހާ ކަމެއް ދިޔައީ ރަނގަޅަށް ކަމަށް އިލެކްޝަން ކޮމިޝަނުން ވަނީ ނިންމާފައި
ޖުމްހޫރީ ޕާޓީގެ ކުރީގެ ޑެޕިއުޓީ ލީޑަރު އަމީން އިބްރާހީމް
ރިޔާސީ އިންތިޚާބުގެ ވޯޓާ ކުޅެން އުޅުމަކީ އަޅާނެ އެންމެ ބޮޑު ޅަ އެތި ކަމަށް ޖުމްހޫރީ ޕާޓީގެ ނާއިބު ލީޑަރު އަމީން އިބްރާހިމް ވިދާޅުވެއްޖެއެވެ.
ދާއިމީ ނަތީޖާ ނެރުން ފަސްކޮށްދިނުމަށް ޕީޕީއެމުން އިލެކްޝަން ކޮމިޝަނުގައި އެދިފައިވާތީ ކަންބޮޑުވުން ފާޅުކުރައްވައި އަމީން ކުރެއްވި ޓްވީޓެއްގައި ވިދާޅުވީ ރިޔާސީ އިންތިޚާބުގެ ހުރިހާ ކަމެއް ދިޔައީ ރަނގަޅަށް ކަމަށް އެ ކޮމިޝަނުން ނިންމާފައިވާ ކަމަށެވެ.
އަމީން ވިދާޅުވީ ވަގުތީ ނަތީޖާ މުޅި ދުނިޔެއިން ބަލައިގަނެފައިވާއިރު ވޯޓޭ ކިޔައިގެން ހަމަނުޖެހުން ހިންގުމަށް މަސައްކަތް ނުކުރުމަށް އެދޭ ކަމަށާއި، ރީތިކޮށް މިކަން ނިންމާލުމަށް ފަހު ރައީސް ޔާމީން ގެއަށް ވަޑައިގަންތުމަށް އެދޭ ކަމަށެވެ. އަދި އެއީ ރައްޔިތުން މިއަދު ބޭނުންވާ ގޮތް ކަމަށް ވެސް އަމީން ވިދާޅުވިއެވެ.
ރައްޔިތުން ރުޅިނޭރުވުމަށް ނަސޭހަތްތެރިވަމުން އަމީން ވިދާޅުވީ ރައީސް ޔާމީނަށް ވަރަށް ގިނަ ޅަ އެއްޗެހި އެޅިފައިވާ ކަމަށާއި، އަޅުއްވަން ދެން އެ އުޅުއްވަނީ އެންމެ ބޮޑު ޅަ އެތި ކަމަށެވެ.
އާދީއްތަ ދުވަހު ކުރިއަށް ދިޔަ ރިޔާސީ އިންތިހާބުގައި 233،877 ފަރާތަކުން ވަނީ ނިކުމެ ވޯޓްލާފައެވެ. އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހަށް 134،616 ވޯޓް ލިބުނު އިރު، އެމަނިކުފާނާ ވާދަކުރެއްވި ރައީސް އަބްދުﷲ ޔާމީނަށް ލިބިފައި ވަނީ 96،132 ވޯޓެވެ.
