ރައީސް އަބްދުﷲ ޔާމީންގެ ކެމްޕެއިން އޮފީސް ހިންގާ ވެސްޓްޕާކް ސަރައްދުގައި އެއްޗެހިތަކެއް އަންދައިފިއެވެ.
ރާއްޖެއެމްވީއަށް މައުލޫމާތު ދިން މީހަކު ބުނީ ހޯމަ ދުވަހުގެ ރޭ 12:00 ހާއިރު ވެސްޓްޕާކް ސަރަހައްދުގައި އެއްޗެހިތަކެއް އަނދަމުންދާ މަންޒަރު ފެނިފައިވާ ކަމަށެވެ. އަދި ވަރަށް ގަދައަށް ކަރުދާސް އަންދާ ވަސް އެ ސަރަހައްދުން ދުވި ކަމަށް އޭނާ ވަނީ ބުނެފައެވެ. މި ފޮޓޯތަކާއި ވީޑިއޯތައް ސޯޝަލް މީޑިއާގައި ވެސް ދަނީ ދައުރުވަމުންނެވެ.
ރައީސް ޔާމީން ގެ ކެމްޕެއިން އޮފީސް ހުންނަ ވެސްޓްޕާކް ސަރަހައްދުގައި އެއްޗެހިތަކެއް އަންދާފައިވާއިރު ހޯމަ ދުވަހު މުލިއާގެއިން ނެރުނު ބައެއް ތަކެތި ރައީސް ޔާމީން ކެމްޕެއިން އޮފީހަށް ގެންދިޔަ ކަމުގެ މައުލޫމާތު ރާއްޖެ އެމްވީއަށް ވަނީ ލިބިފައެވެ.
ނަމަވެސް އެއީ ކޮން އެއްޗެހިތަކެއް ކަމެއް އެނގިފައެއް ނުވެއެވެ.
ހޯމަ ދުވަހުގެ ރޭ ރައީސް ޔާމީންގެ ތަރުޖަމާން އިބްރާހިމް މުއާޒް އަލީ ކުރެއްވި ޓްވީޓެއްގައި ވަނީ މުލިއާގެއިން ގެންދާ ބައެއް ތަކެއްޗަކީ ރައީސްގެ އަމިއްލަފުޅު ދިރިއުޅުއްވުމުގައި ބޭނުންފުޅު ކުރައްވާ ތަކެތި ކަމަށާއި ޤާނޫނާއި ޚިލާފް އެއްވެސް އެއްޗެއް ނުހުންނާނެ ކަމަށެވެ.
ވެސްޓްޕާކް ސަރަހައްދުގައި ރޯވެ އަނދަމުންދާ ކަމުގެ މައުލޫމާތު ރާއްޖެ އެމްވީއަށް ލިބުން އެކަމާއި ގުޅޭ މައުލޫމާތު ހޯދުމަށް އެމްއެންޑީއެފަށް ގުޅުމުން އެމްއެންޑީއެފްގެ ތަރުމާން ވިދާޅުވީ އަލިފާނުގެ އެއްވެސް ހާދިސާއެއް ހިނގައިގެން އުޅޭ ކަމުގެ އެއްވެސް ރިޕޯޓެއް އެމްއެންޑީއެފަށް ލިބިފައި ނުވާ ކަމަށެވެ.
