ޖަލުގައި ބަންދުގައި ތިބި ފަރާތްތައް ދޫކޮށްލެއްވުމުގެ މަސައްކަތް އިންތިޚާބީ ރައީސް ފައްޓަވައިފި
24 ސެޕްޓެމްބަރު 2018 | ހޯމަ 12:48ބައެއް ފަރާތްތައް މިއަދު ވަނީ ކޯޓަށް ހާޒިރުކޮށްފައި
ކުރީގެ ރައީސް މައުމޫން އަބްދުލްޤައްޔޫމް
ރާއްޖޭގައި ބަންދުގައި ނުހައްގުން ތިއްބެވި ފަރާތްތައް ދޫކޮށްލެއްވުމުގެ މަސައްކަތް އިންތިޚާބީ ރައީސް ފައްޓަވައިފި ކަމަށް އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
އެމްޑީޕީ އޮފީހުގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެމްޑީޕީގެ ޗެއަރޕާސަން ހަސަން ލަތީފް ވިދާޅުވީ ރާއްޖޭގެ ޖަލުތަކު އާއި ނުހައްގުން ބަންދުގައި ތިބި ފަރާތްތަކަށް ދޫކޮށްލުމަށް ސަރުކާރާ އެކީގައި ދައްކަންޖެހޭ ވާހަކަތައް މިއަދު ދައްކަވައިފި ކަމަށެވެ.
"އަޅުގަނޑުމެންގެ މި ޓްރާންސްސިޝަންގެ ތެރޭގައި އެގޮތުން ރާއްޖޭން ބޭރުގައި ތިބި ހުރިހާ ފަރާތްތައް ރާއްޖެ ގެނެވޭނެ ގޮތާއި، އެ ހުރިހާ ކަމެއް ހަމަޖެހިގެންދާނެ. އަދި ބަންދުގައި ތިއްބެވި ފަރާތްތައް ދޫކޮށްލެއްވުމަށް ރައީސް ޔާމީނަށް ދަންނަވައިފިން. އެ މަސައްކަތް އިރާދަކުރެއްވިއްޔާ ފެށިއްޖެ،" ހަސަން ލަތީފް ވިދާޅުވިއެވެ.
ހަސަން ލަތީފް މިހެން ވިދާޅުވެފައިވާއިރު ރައީސް އަބްދުﷲ ޔާމީނާއި އިންތިޚާބީ ރައީސް އިބްރާހީމް މުހައްމަދު ސޯލިހް (އިބޫ) މިއަދު ހެދުނު 11 ޖެހިއިރުވަނީ ރައީސް އޮފީހުގައި ވަނީ ބައްދަލުކުރައްވާފައެވެ. ބައި ގަޑިއެއްހާއިރު ކުރިއަށް ދިޔަ މި ބައްދަލުކުރެއްވުމާ ގުޅޭ އެއްވެސް މައުލޫމާތެއް އެއްވެސް ފަރާތަކުން މިހާތަނަށް ހާމަކޮށްފައެއް ނުވެއެވެ
ރައީސް ޔާމީންގެ ސަރުކާުރުގައި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ އާއި، ޕީޕީއެމްގެ ރައީސް އަދި ކުރީގެ ރައީސް އާއި ގިނަ ސިޔާސ ބޭފުޅުން މި ވަގުތު ތިއްބެވީ ޖަލުގައެވެ. އޭގެ ތެރެއިން ބައެއް ބޭފުޅުންގެ ބަންދާ މެދު ގޮތެއް ނިންމުމުގެ ޝަރީއަތްތައް މިހާރު ވަނީ ފަށާފައެވެ.
އާދީއްތަ ދުވަހު ބޭއްވި ރިޔާސީ އިންތިހާބުގެ ވަގުތީ ނަތީޖާ ދައްކާ ގޮތުން 58 ޕަސެންޓުން އިބޫ ވަނީ އިންތިހާބު ކާމިޔާބުކުރައްވާފައެވެ.
