ރިޔާސީ އިންތިޚާބާ ގުޅޭގޮތުން ސާބިތުނުހިފޭ ދޮގު ވާހަކަ ފަތުރާނަމަ ފިޔަވަޅު އަޅާނެ ކަމުގެ އިންޒާރު ބްރޯޑްކާސްޓިންގ ކޮމިޝަނުން ދީފިއެވެ.
ބްރޯޑްކޮމްއިން އާންމުކޮށްފައިވާ ސަރކިއުލަރގައި ބުނެފައި ވަނީ ހޮނިހިރު ދުވަހުގެ ހަވީރު 6:00 ގެ ނިޔަލަށް ރިޔާސީ އިންތިޚާބުގެ ކެންޕެއިން ކުރުމަށް ގާނޫނީ ގޮތުން ލިބިފައިވާ މުއްދަތު ހަމަވެފައިވުމާ އެކު ވެސް، ބައެއް ބްރޯޑްކާސްޓަރުން އިންތިޚާބާ ގުޅޭގޮތުން ސާބިތު ނުހިފޭ ދޮގު ވާހަކަ ފަތުރަމުން ދާކަމަށް ވަނީ ފާހަގަކުރެވިފައި ކަމަށެވެ. އަދި މި ކަމަކީ ގާނޫނުތަކުން މަނާކޮށްފައިވާ ކަމެއްކަމަށާއި، މި ފަދަ ކޮންޓެންޓް ބްރޯޑްކާސްޓް ނުކުރުމަށް އިލްތިމާސްކުރާ ކަމަށެވެ.
ބްރޯޑްކޮމް. އިން ބުނެފައި ވަނީ ގާނޫނު ނަންބަރު 2016/15 (އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ގާނޫނު) އާއި ގާނޫނު ނަންބަރު: 2010/16 (ބްރޯޑްކާސްޓް ކުރުމުގެ ގާނޫނު) އާއި ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސް އާ އެއްގޮތްވާގޮތުގެ މަތިން ބްރޯޑްކާސްޓް ކުރުމަށް ހުރިހާ ބްރޯޑްކާސްޓަރުންނަށް އަންގާ ކަމަށެވެ.
އަދި ގާނޫނާއި ގަވާއިދާ ތަޢާރުޒުވާ ކޮންޓެންޓް ބްރޯޑްކާސްޓް ކޮށްފިނަމަ، އެފަދަ ކޮންޓެންޓް ގެނެސްދޭ ފަރާތްތަކާމެދު ގާނޫނާއި ގަވާއިދާ އެއްގޮތްވާ ގޮތުގެމަތިން ފިޔަވަޅު އަޅާނެކަމަށް ބްރޯޑްކޮމްއިން ނެރުނު ސާކިއުލާގައި ވަނީ ބުނެފައެވެ.