ހިޔާ ފްލެޓަށް ކުރިމަތިލުމުގެ މުއްދަތު ހަމަނުވަނީސް ފްލެޓް ލިބުނުކަމުގެ ލިޔުން ދޫކުރަން ފަށައިފި!

މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ އިން ދޫކުރާ "ހިޔާ" މަޝްރޫއުގެ ފްލެޓްތަކަށް ކުރިމަތިލުމުގެ މުއްދަތު ހަމަނުވަނީސް އެ ފްލެޓްތަކުގެ ޑިޕޮސިޓް ފީ ނަގައި ފްލެޓްތައް ލިބުނުކަމުގެ ލިޔުން ދޭން ފަށާފައިވާކުގެ މައުލޫމާތު ލިބިއްޖެއެވެ.

"ހިޔާ" މަޝްރޫއުގެ ދަށުން ސަރުކާރުން ދޫކުރަނީ 7،000 ފްލެޓެވެ.

Advertisement

ޑިޕޮސިޓް ފީ ނަގާފައިވާ ލިޔުންތަކާއި ފްލެޓް ލިބުނުކަމުގެ ފީ ނެގުމަށް ފަހު ފްލެޓް ލިބުނުކަން އަންގައިދޭ ލިޔުންތަކެއް ރާއްޖެއެމްވީއަށް ވަނީ ލިބިފައެވެ.

ޑިޕޮސިޓް ފައިސާގެ ގޮތުގައި 50،000ރ. ދެއްކި ކަމުގެ ލިޔުން

މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރގެ ތައްގަނޑު ޖަހާފައިވާ ލެޓަރ ހެޑްގައި އެ މިނިސްޓްރީގެ ސްޓޭޓް މިނިސްޓަރ މުހައްމަދު އިބްރާހިމް މަނިކު ސޮއިކުރައްވާ ފްލެޓް ލިބުނުކަން އަންގާ ސިޓީ ދީފައި ވަނީ މިދިޔަ އޮގަސްޓް މަހުގެ 18 ގައެވެ. އަދި ޑިޕޮސިޓް ފައިސާގެ ގޮތުގައި 50،000ރ. ވަނީ ދައްކާފައެވެ.

ފްލެޓް ލިބުނު ކަމުގެ ލިޔުން

މައުލޫމާތު ލިބިފައިވާ ގޮތުގައި ޑިޕޮސިޓް ފީގެ ގޮތުގައި 50،000ރ. ދެއްކުމުން ގާތްގަނޑަކަށް 200 އެއްހާ މީހުންނަށް ފްލެޓް ލިބުނު ކަމުގެ ލިޔުން ވަނީ ދީފައެވެ.

މިކަމާ ބެހޭ ގޮތުން ހައުސިން މިނިސްޓްރީގެ ބަހެއް ވަނީ ލިބޭނޭ ގޮތް ނުވެފައެވެ.

ރިޔާސީ އިންތިޚާބަށް ކައިރި ވެފައި ވަނިކޮށް "ހިޔާ" މަޝްރޫއަށް ފޯމު ހުށަހަޅާ އެންމެންނަށް ފްލެޓް ލިބޭނެ ކަމަށް މިމަހުގެ 20ގައި ވިލިމާލެ ދެ ވަނަ ފިޔަވަހީގެ ޕްލޭން ލޯންޗު ކުރުމަށް ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ މުއިއްޒު ވަނީ ވިދާޅުވެފައެވެ.

މުއިއްޒު ވިދާޅުވީ ހިޔާ މަޝްރޫއަށް މިހާތަނަށް ފޯމު ހުށަހެޅި މީހުންނާއި މި މަހުގެ 30 ގެ ނިޔަލަށް ފޯމު ހުށަހަޅާ އެންމެންނަށް ފްލެޓް ލިބޭނެ ކަމުގެ ޔަގީންކަން ދިނުމަށް ރައީސް ޔާމީން އެދިވަޑައިގެންފައިވާ ކަމަށެވެ. ހިޔާ މަޝްރޫއުގެ ދަށުން 7،000 ފްލެޓް ދޫކުރުމަށް ސަރުކާރުން ނިންމާފައިވާއިރު އެ ފްލެޓްތަކަށް އެދި 18،000 މީހުން ހުށަހަޅާފައިވާ ކަމަށް މުއިއްޒު ވިދާޅުވިއެވެ. މިހާރު މަސައްކަތްކުރަނީ އަދި އިއުލާނު ވެސް ކޮށްފައި ވަނީ 7000 ފްލެޓް ކަމަށްވާއިރު ބަކީ 11،000 މީހުންނާއި އަދި 30 ގެ ކުރިން ހުށަހަޅާ އިތުރު އެތައް ހާސް ބަޔަކަށް ފްލެޓް ދޭނީ ކިހިނެއް ކޮންތާކުން ކޮން ގޮތަކަށް ކަމެއް މުއިއްޒު ވިދާޅެއް ނުވެއެވެ.

މި މަޝްރޫއުގެ ތެރެއިން ޖުލައި 31 ގެ ނިޔަލަށް ފޯމު ދޫކުރުމަށް ހަމަޖެއްސުމަށް ފަހު، ފަހުން ވަނީ އޮގަސްޓް 31 އަށް ބަދަލުކޮށްފައެވެ. އަދި އޭގެ ފަހުން ފްލެޓަށް ކުރިމަތިލުމުގެ މުއްދަތު ވަނީ ސެޕްޓެމްބަރު މަހުގެ 30 އަށް އިތުރު ކޮށްފައެވެ.