އިސްލާމްދީނާ ހިލާފު ފިކުރުތަކުގެ އަހުލުވެރިން މުސްލިމުންގެ ހިތްތަކަށް ވެރިވެގަތުމަށް ގިނަ އަދަދެއްގެ ފައިސާ އާއި ސިޔާސީ ނުފޫޒު ބޭނުންކުރާ ކަމަށް ހުކުރު ޚުތުބާގައި ބުނެފިއެވެ.
"އިސްލާމް ދީނަށް ނަސްރު ދިނުން" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އިސްލާމްދީނާ ހިލާފު ފިކުރުގެ މީހުން އެ މީހުންގެ މިނިވަންކަމުގެ ޝިއާރުތައް ބޭނުންކޮށް އެ މީހުންގެ ދީނަކީ ވަރަށް އޯގާތެރި ދީނެއްކަން މުސްލިމުންނަށް ދެއްކުމަށް މަސައްކަތްކުރާ ކަމަށެވެ.
ޚުތުބާގައި ބުނީ މުސްލިމުން ދީނުން ބޭރުކުރުމަށް ތަފާތު ގައުމުތަކުން އެއްބައިވެގެން ވެސް ގިނަގުނަ މަސައްކަތްތަކެއް ކުރާ ކަމަށެވެ. ނަމަވެސް އެ މީހުންގެ ހަރުކަށިކަން އިސްލާމީ ބައެއް ގައުމުތަކުން ފެންނަމުންދާ ކަމަށެވެ. އަދި ފަލަސްތީނުގެ މީހުން ދިރިއުޅޭ ދަތިހާލު ޚުތުބާގައި ވަނީ ފާހަގަކޮށްފައެވެ.
ޚުތުބާގައި ބުނީ މި ވަތަނުގައި އިސްލާމްދީން ދެމެހެއްޓުމަށް ގިނަ މަސައްކަތް ކުރަން ޖެހިފައިވާ ކަމަށެވެ. ދަރިންނަށް އިސްލާމްދީން އޭގެ ފުރިހަމަ ގޮތުގައި އުނގަންނައިދޭން ސަރުކާރުންނާއި ބެލެނިވެރިން މަސައްކަތް ކުރަންޖެހޭ ކަމަށާއި، އިސްލާމްދީން ހިމާޔަތް ކުރުމަށްޓަކައި، އެދީން އުނގެނުމާއި އެދީނާ އެއްގޮތަށް އަމަލުކުރުމަކީ ކޮންމެ މުސްލިމަކަށް ލާޒިމު ކަމެއް ކަމަށެވެ. ޚުތުބާގައި ބުނީ ޤުރުއާން ކިޔަވަން ދަސްކޮށްދީ ހަތިމްކޮށްދީ ޤުރުއާނުގެ މިންވަރެއް ހިތުދަސްކޮދިނުން ބެލެނިވެރިންނާއި، ކަމާބެހޭ މުއައްސަސާތަކަށް ލާޒިމުވާ ކަމަށެވެ.
މާތްﷲ ވަހީކުރައްވާފައިވާ ބަސްފުޅެއްގެ މާނައިގައިވޭ "އަދި ޔަހޫދީން ވެސް ނަސާރާއިން ވެސް އެއުރެންގެ ދީނަށް ކަލޭގެފާނު ތަބާވެ ވަޑައިގެންފުމަށް ދާންދެން ކަލޭގެފާނަކާ ނުރުހޭނެތެވެ. ކަލޭގެފާނު ވިދާޅުވާށެވެ. ހަމަކަށަވަރުން މާތްﷲގެ މަގު އެއީ ތެދުމަގެވެ. އަދި ކަށަވަރުން ވެސް ކަލޭގެފާނުގެ އަރިހަށް އިލްމުގެ ތެރެއިން އައި ކަންތަކަށް ފަހު އެއުރެންގެ އެދުންތަކަށް ކަލޭގެފާނަށް އެއްވެސް އެހީތެރިޔަކު އަދި ނަސްރުދޭނޭ މީހަކު ވެސް ނުވާނެއެވެ"
ދިވެހިރާއްޖެ އިސްލާމްވުމާ އެކު ރާއްޖޭގެ ރައްޔިތުން އިސްލާމްދީނުން ބޭރަށް ނެރެވޭތޯ އެކި ދުވަސްވަރު ތަފާތު އެތަކެއް މަސައްކަތް ކޮށްފައިވާކަން ތާރީހުން ހެކިދޭކަން ފާހަގަކޮށް ޚުތުބާގައި ބުނީ އެންމެ ފާޅުކަންބޮޑު ގޮތެއްގައި މިކަން ކޮށްފައި ވަނީ ޕޯޗުގީޒު އިސްތުމާރުގެ ޒަމާނުގައި ކަމަށެވެ. އަދި އިސްތިއުމާރަކީ ގައުމުތަކުން އެކި ގައުމުތަކަށް އަރައި އެގައުމުތަކުގެ މީހުން އެމީހުންގެ ދީނުން ބޭރުކަމުން އައި ކަމަށާއި، ރާއްޖޭން ވެސް ގަދަކަމުން އެމީހުންގެ ދީނަށް ވެއްދޭތޯ ގިނަގުނަ މަސައްކަތް ކޮށްފައިވާ ކަމަށެވެ. ނަމަވެސް އެމީހުންގެ މަސައްކަތް ނާކާމިޔާބުވެ، ރާއްޖެ އިސްލާމް ދީންމަތީ ދެމިއޮތީ މާތް ﷲގެ ފަޟްލުވަންތަކަމާއި ބޮޑުތަކުރުފާނުގެ އަގުހުރި ޖިހާދާއި މިންނެތް މަސައްކަތްފުޅުގެ ސަބަބުން ކަމަށް ވެސް ޚުތުބާގައި ވަނީ ބުނެފައެވެ.
މާތްﷲ ވަހީ ކުރައްވާފައިވާ ބަސްފުޅެއްގެ މާނައިގައިވޭ "އެއުރެން އެދެނީ ﷲގެ ނޫރުފުޅު (އެބަހީ: އިސްލާމްދީން) އެއުރެންގެ އަނގަތަކުން ފުމެ، ނިއްވާލުމަށެވެ. ނަމަވެސް ކާފިރުން ކިތަންމެ ނުރުހުނަސް ﷲ، އެކަލާނގެ ނޫރުފުޅު ފުރިހަމަ ކުރެއްވުމަށް މެނުވީ އެކަލާނގެ އިރާދައެއް ނުކުރައްވަތެވެ."
ޚުތުބާގައި ބުނީ މީސްތަކުން އިސްލާމްދީނާ ދުރުހެލިވަމުން ދިޔަވަރަކަށް އެ މީހުންގެ ސުލޫކާއި އުޅުންތައް ނުބައިވެ އެބަޔަކު ހަލާކުވެދާނެ ކަމަށާއި، ސިޔާސީ އިޖްތިމާއީ އަދި އިގްތިސާދީ ކުރިއެރުމުގެ ލަގަން އޮތީ ﷲ ރުއްސަވާ އިސްލާމްދީނުގައި އަޅަމެން ހިފެހެއްޓި މިންވަރެއްގެ މަތީގައި ކަމަށެވެ.
