ދުނިޔޭގެ އެންމެ މޮޅު ބްރޭންޑް ޓަރާންސްފޯމޭޝަންގެ އެވޯޑް 2018 ރީބްރޭންޑް 100 ގްލޯބަލް އެވޯޑްސްގައި ދިރާގު ހިމެނިއްޖެއެވެ.
މިއީ މިފަދަ ޝަރަފުވެރި ބައިނަލް އަގުވާމީ އެވޯޑެއް ދިވެހި ކުންފުންޏަކަށް ލިބުނު ފުރަތަމަ ފަހަރެވެ.
"ރީބްރޭންޑް" އަކީ ދުނިޔޭގެ ބްރޭންޑް ޓްރާންސްފޯމޭޝަންތަކާއި ބެހޭގޮތުން ދިރާސާކުރާ އެންމެ ފުންނާބު އުސް ފަރާތެވެ. އެގޮތުން "ރީބްރޭންޑް 100 ގްލޯބަލް އެވޯޑްސް" އަކީ "ރީބްރޭންޑް" އިން ދުނިޔޭގެ ބްރޭންޑް ޓްރާންސްފޯމޭޝަންތަކުގެ މެދުގައި ބާއްވާ އެންމެ ޝަރަފުވެރި އެވޯޑެވެ.
މި އެވޯޑުގެ ޖަޖިން ޕެނަލްގައި ހިމެނެނީ ކަމަށް ގާބިލު ބައިނަލްއަގުވާމީ އިންޑަސްޓްރީ އެކްސްޕަރޓުންނެވެ. އަދި މި ޕެނަލް އިން ވަނީ 42 ގައުމެއްގެ 37 އިންޑަސްޓްރީގެ ބްރޭންޑް ތަށް ދިރާސާ ކޮށްފައެވެ.
2018 ރީބްރޭންޑް 100 ގްލޯބަލް އެވޯޑްސް އިން ބުނާ ގޮތުގައި، އެވޯޑް ދިނުމުގައި ބަލާފައިވާ މައިގަނޑު ކަންތައްތަކަކީ އެންމެ ފުރިހަމައަށް ބްރޭންޑް ޓްރާންސްފޯމޭޝަންގެ ސްޓެރެޓެޖީތައް އެ ކުންފުންޏެއްގެ ސްޓްރެޓިޖިކް މަގުސަދާއި ކުންފުނީގެ އަމާޒާއި އެންމެ ގުޅޭ ގޮތަށް ކުރިއަށް ގެންގޮސްފައިވާ ވޭތޯއެވެ.
"ގިނަ ބައިނަލް އަގުވާމީ ބްރޭންޑް ތަކަކާއި އެކު މިފަދަ އެވޯޑެއްގައި ދިވެހި ކުންފުންޏެއް ހިމެނި، ދިރާގުގެ ނަން ފަވާލެވިގެން ދިއުމަކީ އަޅުގަނޑުމެންނަށް ލިބުނު ނުހަނު ބޮޑު އުފަލަކާއި ޝަރަފެއް. އަޅުގަނޑުމެންގެ ބްރޭންޑް އަށް ގެނެވުނު ބަދަލާއެކު ފާއިތުވީ އެއް އަހަރު ދުވަހުގެ ތެރޭގައި އަޅުގަނޑުމެންގެ ކަސްޓަމަރުން ބްރޭންޑަށް މި ގެނައި ބަދަލު ބަލައިގަތް ކަމީ އަޅުގަނޑުމެން ވަރަށް އުފާ ކުރާ ކަމެއް. މި ގެނައި ބަދަލަކީ ހަމައެކަނި ކުންފުނީގެ ލޯގޯ އާއި ކުލައަށް ގެނައި ބަދަލެއް ނޫން، މިއައި ބަދަލާއެކު ކުންފުނިން ދޭ ހިދުމަތްތައް ކަމަށްވާ ޕޯސްޓްޕެއިޑް، ޕްރީޕެއިޑް އަދި ފައިބަރ ބްރޯޑްބޭންޑް ފަދަ ހިދުމަތްތަކަށް ވަނީ އިންގިލާބީ ބަދަލުތައް ގެނެސްފައި. މީގެ އިތުރުން އައިޕީ ޓީވީ އަދި މޯބައިލް މަނީ ގެ ހިދުމަތް ފަދަ އައު ޑިޖިޓަލް ހިދުމަތްތައް ވަނީ ތައާރަފްކޮށްފައި. މި ބަދަލަކީ ކުންފުނީގެ ސްޓްރެޓިޖިކް މަގުސަދާއި އަމާޒަށް ފެތޭ ގޮތަށް ގެނައި ބަދަލެއް. މި އައު ބްރޭންޑިންގ އިން ހާމަވެގެން ގޮސްފައި ވަނީ ދިރާގަކީ އަބަދުވެސް ކަސްޓަމަރުންނަށް އަޅާލައި، އިތުބާރު ހިފޭ، ފެންވަރު ރަނގަޅު، ފަސޭހަ އަދި މުސްތަޤްބަލާ ރައްޓެހި ޑިޖިޓަލް ހިދުމަތް ފޯރުކޮށް ދިނުމުގައި އަބަދުވެސް ދެމިއޮންނާނެ ކުންފުންޏެއްކަން" ދިރާގުގެ ސީނިއަރ މެނޭޖަރ ބްރޭންޑް އެންޑް މާކެޓިންގ ކޮމިއުނިކޭޝަންސް މުހައްމަދު މިރްޝާން ހަސަން ވިދާޅުވިއެވެ.
ދިރާގުން ވަނީ މިދިޔަ އަހަރުގެ މޭ 24 ވަނަ ދުވަހު ކުންފުނީގެ މައިގަނޑު ކުލައަކަށް އޮރެންޖް ހިޔާރުކޮށް މުޅިން އާ ލޯގޯއެއް ތައާރަފް ކޮށްފައެވެ. ޒަމާނީ ވިސްނުމާއި، އުޖާލާ މުސްތަޤްބަލަކާއި އެކުވެރިކަން ރަމްޒުކޮށްދޭ ގޮތަށް ދިރާގުގެ މި ބްރޭންޑް ކަށަވަރުކޮށްދީފައި ވަނީ ދިރާގަކީ ޒަމާނީ ދިރިއުޅުމުގެ ވައްޓަފާޅި ކުރިއަރުވާ ނުވަތަ ލައިފްސްޓައިލް ޑްރިވަން ޑިޖިޓަލް ސާރވިސަސް ކުންފުންޏެއް ކަމެވެ.
"ޓޭކް އޮން ޓުމޯރޯ" ނުވަތަ "މުސްތަޤްބަލަށް ފުރިހަމައަށް ތައްޔާރު" މި ޝިއާރު ހިޔާރުކޮށް، މި ބްރޭންޑިންގް އަކީ ޓެކްނޮލޮޖީއަށް އަންނަ ބަދަލުތަކާއެކު ދިރިއުޅުމަށް އަންނަ ކުރިއެރުންތަކަށް ދިރާގު ތައްޔާރަށް އޮތްކަން ދޭހަކޮށްދޭ ބަދަލެކެވެ. އާ ބްރޭންޑިންގ އާއެކު ދިރާގުގެ މަޤްސަދަކަށް ވެގެން ދިޔައީ ކަސްޓަމަރުން ބާރުވެރިކޮށް ޑިޖިޓަލް މުސްތަޤްބަލުގެ ބޭނުން އެންމެ ފުރިހަމަ އަށް ފޯރުކޮށް ދިނުމެވެ.
