ޕީޕީއެމްގެ ގިނަ އަދަދެއްގެ ބަޔަކު މިހަފުތާގެ ތެރޭގައި ރައީސް ޢަބްދުﷲ ޔާމީނާ ދެކޮޅަށް ނިކުންނަތަން ފެނިގެންދާނެ ކަމަށް ޕީޕީއެމްގެ ރައީސް މައުމޫން ފެކްޝަންގެ ނާއިބު ލީޑަރ އަދި މައުމޫން ރިފޯމް މޫވްމެންޓް (އެމްއާރއެމް)ގެ މެމްބަރު އާމިނަތު ނާދިރާ ވިދާޅުވެއްޖެއެވެ.

ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހަށް ތާއީދު ހޯއްދެވުމަށް އެމްއާރުއެމްގެ ޓީމް އަތޮޅުތަކަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެން ނޫސްވެރިންނަށް މައުލޫމާތު ދެއްވަމުން ނާދިރާ ވިދާޅުވީ މިހާރު އަތޮޅުތަކަށް ކުރަމުންދާ ދަތުރުތަކަކީ ޕީޕީއެމްގައި ތިބި ރައީސް މައުމޫނަށް ތާއީދު ކުރާ ފަރާތްތަކާ ބައްދަލު ކުރުމަށް ކުރަމުންދާ ދަތުރުތަކެއް ކަމަށާއި މިދަތުރުން ފެނިގެންދަނީ ރައީސް މައުމޫނަށް ތާއީދު ކުރާ މީހުން އެއްގޮތަކަށް ވެސް ރައީސް ޔާމީނަށް ތާއީދު ނުކުރާތަން ކަމަށެވެ. ތާއީދު ނުކުރާ ސަބަބަކީ އަނިޔާވެރިކަން ކަމަށާއި ޕާޓީގެ ތެރޭގައި ހިނގާފައިވާ ކަންކަން އެފަރާތްތަކަށް މިހާރު ސާފުވެގެން ދިއުން ކަމަށެވެ.

"ރައީސް މައުމޫނާ ނުލައި ރައީސް ޔާމީނަށް އިންތިޚާބު ކާމިޔާބު ނުކުރެއްވޭނެކަން ވަރަށް ސާފުކޮށް މިފަހަރު ރައީސް ޔާމީނަށް އަޅުގަނޑުމެން ދައްކާލާނަން" ނާދިރާ ވިދާޅުވިއެވެ.

ނާދިރާ ވިދާޅުވީ ޕީޕީއެމްގެ އަސާސީ ޤަވާއިދު ބުނާގޮތުން އަދިވެސް ޕީޕީއެމްގެ ރައީސަކީ ރައީސް މައުމޫން ކަމަށާއި ކިތައްމެ ވަރެއް އަރުވާ ރައީސް މައުމޫން ޕާޓީން ބޭރު ކުރެއްވި ކަމުގައިވީ ނަމަވެސް ޕީޕީއެމްގެ ރައީސެއް ބަދަލު ނުވާ ކަމަށެވެ.

ނާދިރާ ވިދާޅުވީ އިރާދަކުރެއްވިއްޔާ 17 ނޮވެމްބަރަކީ ރައީސް މައުމޫނަށް ދިން އަނިޔާގެ ބަދަލުގައި އެމަނިކުފާނާއި އެމަނިކުފާނުގެ އާއިލާ އަދި ހައްޔަރުކޮށްފައިވާ އެހެނިހެން ސިޔާސީ ބޭފުޅުން މިނިވަންވެގެންދާނެ ދުވަސް ކަމަށެވެ. އެކަން މުޅި ރާއްޖެއިން ފެންނަމުން ދާކަމަށާއި ރައީސް ޔާމީނަށް ރައީސް ޔާމީންގެ ސައިޒް މިހާރު ވަރަށް ރަނގަޅަށް އެނގިގެންދާނޭ ކަމަށް ނާދިރާ ވިދާޅުވިއެވެ.

ރާއްޖެއެމްވީން ދެންނެވި ސުވާލަކަށް ޖަވާބު ދެއްވަމުން ނާދިރާ ވިދާޅުވީ މިފެށުނު ހަފްތާއަކީ ޕީޕީއެމްގައި ތިބި ރައީސް މައުމޫނަށް ތާއީދުކުރާ ވަރަށް ގިނަ ފަރާތްތައް ވަރަށް ހަރަކާތްތެރިކަމާއެކު ފެނިގެންދާނެ ހަފުތާއެއް ކަމަށެވެ.

"ވަރަށް ގިނަ ބޭފުޅުން މިހާރުވެސް ނުކުމެވަޑައިގެންފި. ލ އަތޮޅަކީ އޭގެ ނަމޫނާ އަތޮޅެއް. ހަމަ އެގޮތަށް އެހެން ރަށްރަށުގައި ވެސް. އަޅުގަނޑުމެން މިކުރި ދަތުރުތަކުގައި އަޅުގަނޑުމެންނާ ބައްދަލުކުރޭ. އެ އެކްޓިވްނެސް މިހަފުތާގެ ތެރޭގައި ވަރަށް ބޮޑަށް ފެނިގެންދާނެ. އިރާދަކުރެއްވިއްޔާ މިއީ ވަރަށް ރަނގަޅު ބަދަލެއް. މިބަދަލު ފެނިގެންދާނީ ދިވެހިރައްޔިތުންގެ އުއްމީދާ ގުޅިގެން ދިވެހި ރައްޔިތުންނަށްޓަކައި މިއަންނަން އުޅޭ ސަރުކާރާއެކު ވާކަން" ނާދިރާ ވިދާޅުވިއެވެ.

މިހާތަނަށް އެމްއާރއެމްގެ ޓީމްތައް ވަނީ ށ، ނ، ރ، ބ އއ، އދ، ވ، މ، ފ، ދ، ތ، ލ އަދި ގދ އަތޮޅަށް ވަޑައިގެންފައެވެ. މީގެއިތުރުން އިންތިހާބުގެ ކުރިން ގއ އަދި އައްޑޫ އަތޮޅާއި ފުވައްމުލަކަށް ވަޑައިގަތުމަށް ވަނީ ހަމަޖެހިފައެވެ.