ފުވައްމުލަކު ސިޓީއަށް ބޯކޮށް ވާރޭވެހުމުގެ ސަބަބުން ގޭގޭގައި ވެލި ބަސްތާ ޖަހަން ޖެހިއްޖެ
13 ގެއެއްގެ ދޮރުމަތީ ގައި ވެލިބަސްތާ ޖަހާފައި ވޭ.
ފުވައްމުލަކު މަގެއް
ފުވައްމުލަކު ސިޓީގައި ހޮނިހިރު ދުވަހު މެންދުރުފަހުން ފެށިގެން ބޯކޮށް ވާރޭވެހި މަގުތަކުގައި ފެންބޮޑުވުމާއި ގުޅިގެން ގޭގެއަށް ފެން ވަންނަމުންދާތީ ވެލި ބަސްތާ ޖަހައިފި އެވެ.
އެމްއެންޑީއެފްގެ އިންފޮމޭޝަން އޮފިސަރ ކެޕްޓަން އިބްރާހީމް އާޒިމް ވިދާޅުވީ ހޮނިހިރު ދުވަހުގެ މެންދުރުފަހުން ފެށިގެން ފުވައްމުލަކު ސިޓީއަށް ކުރި ވިއްސާރައާއި ގުޅިގެން ފެންބޮޑުވުމުގެ ސަބަބުން އެރަށުގެ 13 ގެއެއްގެ ދޮރުމަތީގައި ވެލިބަސްތާ ޖެހުމުގެ މަސައްކަތް އެމްއެންޑީއެފްގެ ސަދާރން އޭރިއާގެ ފަޔާރ ސްޓޭޝަނުން ކޮށްފައިވާ ކަމަށެވެ.
މިކަމާ ގުޅޭގޮތުން ފުވައްމުލަކު ސިޓީގެ މޭޔަރ އަބްދުﷲ ފަލާހު ޝަރީފް "ރާއްޖެއެމްވީ"އަށް ވިދާޅުވީ ހޮނިހިރު ދުވަހު މެންދުރުފަހުން ފެށިގެން ފުވައްމުލަކަށް ކުރި ވިއްސާރައިގައި މަގުތަކުގައި ފެންބޮޑުވެ، ގޭގެއަށް ފެންގަނޑު ވަންނަން ފެށުމުން ފުވައްމުލަކު ސިޓީ ކައުންސިލާއި ސިފައިން ގުޅިގެން ވެލިބަސްތާ ޖެހުމުގެ މަސައްކަތް ކޮށްފައިވާ ކަމަށެވެ. އަދި މަގުތަކުން ފެން ހިންދުމުގެ މަސައްކަތް ކުރަމުންދާ ކަމަށްވެސް ފަލާހު ވިދާޅުވި އެވެ.
ފަލާހު ވިދާޅުވީ އާދިއްތަ ދުވަހު މޫސުން ކޮންމެވެސް ވަރަހަކަށް ރަނގަޅު ކަމަށެވެ. އެހާ ބޯކޮށް ވާރޭ ވެހެމުންނުދާ ކަމަށްވެސް ފަލާހު ވިދާޅުވި އެވެ.
މީގެއިތުރުން ފަލާހު ވިދާޅުވީ ކުރި މި ވިއްސާރައިގައި ރައްޔިތުންނަށް ލިބުނު ގެއްލުން ބަލަމުންދާ ކަމަށެވެ.
