އިބޫގެ ސާބަސް ގައުމީ ޓީމަށް، އުއްމީދު ދިރުވައިފި
15 ސެޕްޓެމްބަރު 2018 | ހޮނިހިރު 17:16ފުޓްބޯޅަ ކުރިއެރުވުމަށް އިބޫ ގެންދަވަނީ ވައުދުތަކެއް ވެވަޑައިގަންނަވަމުން
ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)
ސާފް ސުޒުކީ ކަޕްގެ ޗެމްޕިއަންކަން ގައުމީ ޓީމުން ހޯދުމާއެކު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) މަރުހަބާ ދަންނަވައިފިއެވެ.
އިބޫ ކުރެއްވި ޓްވީޓެއްގައި އެމަނިކުފާނު ވިދާޅުވީ ގައުމީ ޓީމުން ރާއްޖެ ފަހުރުވެރި ކުރުވައިފި ކަމަށެވެ. ގައުމީ ޓީމުން އުއްމީދު ދިރުވައި އެންމެން އުފަލުން ފޮޅުވައިފިކަން ފާހަގަކުރަމުން އިބޫ ވަނީ ގައުމީ ޓީމަށް އައްސަރިބަހާއި ސާބަސް ދަންނަވާފައެވެ.
ގައުމީ ޓީމަށް އިބޫ ސާބަސް ދަންނަވާފައިވާއިރު އެމަނިކުފާނު ކުރައްވަމުން ގެންދަވާ ކެމްޕޭނުގެ ތެރެއިން އަންނަނީ ރާއްޖޭގެ ފުޓްބޯޅަ ކުރިއެރުވުމަށް ވައުދުތަކެއް ވަމުންނެވެ. އެގޮތުން ފުޓްބޯޅަ ދަނޑުތައް ފުރާލާނެ ކަމަށާއި ރާއްޖޭގެ ރަށްތަކުގައި ފެންވަރު ރަނގަޅު ފުޓްބޯޅަ ދަނޑުތަކެއް އެޅުއްވުމަށް އެމަނިކުފާނުގެ ކެމްޕޭނުގެ ތެރެއިން ވަނީ ވައުދުވެވަޑައިގެންފައެވެ.
ރާއްޖޭގެ ގައުމީ ޓީމުން 10 އަހަރަށްފަހު ދެކުނު އޭޝިއާގެ ޗެމްޕިއަންކަން ހޯދީ ބަންގްލަދޭޝްގައި ކުޅުނު ފައިނަލްގައި 2-1 އިން އިންޑިއާ ބަލިކޮށްގެންނެވެ. މިއީ ރާއްޖެއިން ސަރަހައްދުގެ ޗެމްޕިއަންކަން ހޯދި ދެވަނަ ފަހަރެވެ.
