ތެޔޮ ފީފާއެއްގެ އަގު 80.13 ޑޮލަރަށް އަރައިފިއެވެ.

ތެޔޮ ފީފާއެއްގެ އަގު ބޮޑުވެފައި ވަނީ އެމެރިކާއިން އީރާނަށް ދަތިކުރުމުގެ ފިޔަވަޅުތަކެއް އެޅުމުގެ ސަބަބުންނެވެ. އަދި ކުރިއަށް އޮތް ދުވަސްތަކުގައި އަގު އިތުރަށް އުފުލިގެންދާނެ ކަމަށް ދިރާސާ ކުރާ ފަރާތްތަކުން ބުނެއެވެ.

އިރާނާ އެކު ދުނިޔޭގެ ބާރުތަކުން ވެފައިވާ ނިއުކްލިއަރ އެއްބަސްވުން އުވާލައި ދަތިކުރުމުގެ އިތުރު ފިޔަވަޅުތަކެއް އެގައުމަށް އެޅުމާ މެދު އެމެރިކާ އިން އޭޕްރިލް މަހު ގޮތެއް ނިންމާފައެވެ. މިއީ ދުނިޔޭގައި ތިންވަނައަށް އެންމެ ގިނައިން ތެޔޮ އުފައްދާ ގައުމުގެ ސަޕްލައި ދަށްވެގެންދާނެ ކަމަކަށެވެ.

ތެލުގެ އަގު މަތިވާން ފަށާފައި ވަނީ އޯޕެކްގެ 14 ގައުމާއި އޭގެ އިތުރުން ރަޝިއާ ފަދަ އިތުރު ބައެއް ގައުމުތަކުން ވެސް ތެޔޮ އުފައްދާ މިންވަރު ދަށް ކުރުމުންނެވެ.

އެ ގައުމުތަކުން ވަނީ ތެޔޮ އުފައްދާ މިންވަރު މަދުކޮށްފައި އޮތް އޮތުން ނޮވެމްބަރު މަހުގެ ނިޔަލަށް ދިގު ދެންމުމަށް އެއްބަސްވެފައެވެ.