ކަރީނާ ރޭޑިއޯ ޝޯއެއް ހުށަހަޅަނީ

ބޮލީވުޑްގެ ތަރި ކަރީނާ ކަޕޫރު ރޭޑިއޯ ޝޯއެއް ހޯސްޓް ކުރުމަށް ތައްޔާރު ވަމުންދާ ކަމަށް ރިޕޯޓްތައް ބުނެފިއެވެ.

ކަރީނާ ގެ މި ޝޯ ވެގެން ދާނީ ކަރަން ޖޯހަރު ހޯސްޓް ކުރާ ރޭޑިއޯ ޝޯ "ކޯލިން ކަރަން" ފަދަ ޝޯއަކަށެވެ.

މި ޝޯގައި އަޑުއެހުންތެރިންނަށް ޝޯގައި ބައިވެރިވެ ކަރީނާ އާއި ވާހަކަ ދައްކަން ފުރުސަތު ލިބިގެން ދާނެއެވެ.

މި ޝޯ އޮންއެއަރ ކުރުމަށް ހަމަޖެހިފައިވަނީ މިއަހަރުގެ ޑިސެމްބަރުގައި ކަމަށް މުމްބާއީ މިރޯގައި ވަނީ ބުނެފައެވެ.

އާތަޖުރިބާއެއް ކޮށްލުމަށް ކަރީނާވެސް ހުރީ އެކްސައިޓް ވެފައި ކަމަށާއި މި ޝޯގެ ރެކޯޑިން ވަރަށް އަވަހަށް ފަށާނެ ކަމަށް ޚަބަރުތައް ބުނެއެވެ.

މިއީ ކަރީނާގެ ފުރަތަމަ ރޭޑިއޯ ޝޯ ކަމަށާއި އެންމެންނަށް އެނާގެ އަޑު އިވިގެންދާނެ ދުވަހަށް ކެތްމަދުވެފައި ހުރިކަމަށް ކަރީނާ ވަނީ ބުނެފައެވެ.

ވިހެއުމަށް ފަހު ކުޑަ ދުވަސް ކޮޅެއްގެ ތެރޭގައި ކަރީނާ ބޮލީވުޑަށް އެނބުރި އައިސްފައިވަނީ "ވީރޭދި ވެޑިން" އިންނެވެ. މި ފިލްމް ވެގެން ގޮސްފައިވަނީ ބޮލީވުޑްގައި ކާމިޔާބު ފިލްމަކަށެވެ.