"ޓިއުބްލައިޓް" ގެ ރޭޑިއޯ ލަވަ ރިލީޒްކޮށްފި

އަހަރުގެ ޖޫންމަހުގެ 23 ވަނަ ދުވަހު ރިލީޒްކުރަން ހަމަޖައްސާފައިވާ ސަލްމާން ޚާންގެ "ޓިއުބްލައިޓް"ގެ ފުރަތަމަ ލަވަ ކަމަށްވާ "ރޭޑިއޯ ސޯންގް" ރިލީޒްކޮށްފިއެވެ.

މި ލަވަ ރިލީޒް ކުރުމަށް ދުބާއީގައި ބޭއްވި ހަފްލާގައި ސަލްމާން ބުނީ މި ލަވައަށް "ރޭޑިއޯ ސޯންގް" ގެ ނަން ދެވުނީ މިއީ މި ފިލްމުގައި އަންނަ އުފާވެރި ޚަބަރަކާއި ގުޅިގެން އަންނަ ލަވައަކަށް ވާތީ ކަމަށެވެ.

ސަލްމާން ބުނީ މިފިލްމުގައި އުޅޭ ކޮއްކޮ ދުނިޔޭގއި ހުރިކަމުގެ އުފާވެރި ޚަބަރު ލިބެނީ ރޭޑިއޯގެ ޒަރީއާއިން ކަމަށާއި އެހެން ކަމުން އެކަމުގެ އުފަލުގައި ލަވައެއް އަންނާތީ މި ލަވައަށް "ރޭޑިއޯ ސޯންގް" ގެ ނަން ދިނީ ކަމަށެވެ. "ރޭޑިއޯ ސޯންގް" ރިލީޒް ކޮށްފައިވަނީ އެކަމަށް ދުބާއީގައި އޮތް ހާއްސަ ރަސްމިއްޔާތުގައި ސަލްމާން ޚާނާއި ޑައިރެކްޓަރ ކަބީރު ޚާނެވެ. މި ލަވައިގެ މިއުޒިކް ތައްޔާރު ކޮށްފައިވަނީ ޕްރީތަމްއެވެ.

މިލަވަ ނެރުމާއެކު ސޯޝަލް މީޑިއާގައި ދަނީ މި ލަވައަށް ތައުރީފު އޮހެމުންނެވެ. ޔޫޓިއުބްގައި މި ލަވަ ބަލާފައިވާ މީހުންގެ އަދަދު ވަނީ 5.7 މިލިއަނަށް ވަނީ އަރާފައެވެ. "ޓިއުބުލައިޓް"ގައި ހިމެނެނީ ތިން ލަވަ އެވެ.

އިންޑިއާ އާއި ޗައިނާއާ ދެމެދު ހިމާލިޔާ ބޯޑަރާ ހެދި 1962 އަހަރު ކުރިއަށް ދިޔަ ހަނގުރާމައިގެ ދުވަސްވަރު، އިންޑިއާގެ ޒުވާން ފިރިހެނަކާ ޗައިނާގެ ޒުވާން އަންހެން ކުއްޖަކާ ބައްދަލުވެ، އެ ދެމީހުންނަށް އެކަކު އަނެކަކު ދެކެ ލޯބިވެވި، ބޯޑަރުގެ މައްސަލަގައި ދެގައުމުގެ ދެމެދުގައި ބޮޑު ހަނގުރާމައެއް ކުރިއަށް ދިޔަ ދަނޑިވަޅުގައި ދެމީހުންގެ ދެމެދުގައި އޮތް ލޯބީގެ ވާހަކައިގެ އަސްލަކަށް ބަލައިގެން އުފައްދާފައިވާ މި ފިލްމުގައި ވަރަށް ގިނަ ވިޝުއަލް އިފެކްޓްސް މަންޒަރުތައް ފެނިގެންދާނެ އެވެ.

"ރޭޑިއޯ ސޯންގް" ގައި 1000 އަށް ވުރެ ގިނަ ނެށުންތެރިން ހިމެނޭ ކަމަށް ވަރަށް ފަހުން ރޭމޯ ދީފައިވާ އިންޓަވިއުއެއްގައި ބުނެފައިވެ އެވެ.