އަންނަ އޮގަސްޓް މަހު ފަށާ "ވީރޭ ދި  ވެޑިން" ގެ ޝޫޓިން އަށް ތައްޔާރުވުމަށް އަދިވެސް ކަރީނާ ކަޕޫރު ހިކެން މަސައްކަތް ކުރާކަމަށް ރިޕޯޓްތައް ބުނެފިއެވެ.

ކަރީނާއަށް ވަނީ މިދިޔަ އަހަރު ޑިސެމްބަރު މަހު ދަރިއެއް ލިބިފައެވެ. އޭނާއަށް ތައިމޫރު ލިބުނު ފަހުން ގައިގައި ޖަހާފައިވާ މަސްތަކާއި ބަރުދަން ލުއިކުރުމަށް ދަނީ މަސައްކަތް ކުރަމުންނެވެ. އެގޮތުން ތައިމޫރަށް އެއް މަސްވުމާ އެކު ކަރީނާ ވަނީ ހިކުމަށް ޖިމްއަކަށް ދާން ފަށާފައެވެ. ކަރީނާގެ ޖިމް ޕާޓްނަރަކީ އަމްރިތާ އަރޯރާއެވެ. އައިސްފައިވާ ކަރީނާ ޖިމް އަށް ކޮންމެ ދުވަހަކު ވެސް ދާކަމަށްވެއެވެ. ކަރީނާގެ މި ޑައިޓް ސޯޝަލް މީޑިއާ އާއި މީޑިއާތައް ދަނީ ވަރަށް ކައިރިން ބަލަމުންނެވެ.

ކަރީނާ ދަނީ ހިކެން އޭނާއަށް ކުރެވެންހުރި ހުރިހާކަމެއް ކުރަމުންނެވެ. އެގޮތުން ބަރުތައް އުފުލުމާއި ބޮކްސިން ތެޅުމާއި މަސްތައް ވިރުވަން ކުރާ ތަފާތު އެކި ކަސްރަތު ކުރެއެވެ. މީގެ އިތުރުން ކޮންމެ ދުވަހަކު ވެސް ކަރީނާ ޔޯގާ ޖައްސައެވެ.

މީޑިއާ ރިޕޯޓްތައް ބުނާގޮތުގައި ކަރީނާ މާ ގަދައަށް ޖިމް ޖައްސާތީ އޭނާގެ ހަށިގަނޑު ވަނީ ބަލިކަށިވެފައެވެ. އެހެންކަމުން މިދިޔަ މަހުގައި ދެތިން ދުވަހަށް އަރާމު ކުރުމަށް ޑޮކްޓަރު ލަފާދިން ކަމަށް ވެއެވެ.

 އަންނަ އޮގަސްޓުމަހު ކަރީނާ އެނބުރި އަންނަ ފިލްމު "ވީރޭ ދި ވެޑިން" އަށް ތައްޔާރުވުމަށްޓަކައި ހިކެން މަސައްކަތް ކުރާއިރު އޭނާއާ އެކު މި ފިލްމުން ދެން ފެންނާނެ އެކްޓްރެސްއަކީ ސޯނަމް ކަޕޫރެވެ. އެ ފިލްމުގެ ޕްރޮޑިއުސަރަކީ ރީއާ ކަޕޫރެވެ. އަދި ޕްރޮޑީއުސަރަކީ ސުޝާންތު ގޯޝްއެވެ. ކުރިން ހަމަޖައްސާފައި އޮތީ މިއަހަރުގެ މެއި މަހުގެ ތެރޭގައި ފިލްމްގެ މަސައްކަތް ފަށާ ގޮތަށެވެ. އެހެން ނަމަވެސް ރިއާ ކަޕޫރުވަނީ ފިލްމުގެ ޝޫޓިން ފަށާނީ އޮގަސްޓުމަހުގެ ތެރޭގައި ކަމަށް ބުނެފައެވެ. އަދި "ވީރޭ ދިވެޑިން" ގެ ޝޫޓިން ޖުމްލަ 55 ދުވަހުގެ ތެރޭގައި ނިންމާލާނެ ކަމަށް ބުނެފައެވެ.  ކަރީނާ އާއި ސޯނަމްއާއެކު އިތުރަށް މި ފިލްމުން ފެނިގެންދާ މުހިއްމު ތަރިންނަކީ  ސްވަރާ ބާސްކަރާއި ޝިކާ ޓަލްސާނިޔާ އެވެ.