މާލެއިން އިބޫއަށް 77 އިންސައްތަ ލިބޭނެ: ރައީސް ނަޝީދު
2 ސެޕްޓެމްބަރު 2018 | އާދީއްތަ 18:59އެމްޑީޕީއިން ދޮރުންދޮރަށް ހިނގުމުން ފުރަތަމަ ނަތީޖާ ސާފުވެއްޖެ
އިބޫގެ ކެމްޕެއިންގައި ރައީސް ނަޝީދުވެސް ބައިވެރިވެވަޑައިގަންނަވާ
މާލޭގެ ރައްޔިތުންގެ 77 އިންސައްތަ ރައްޔިތުން ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އަށް ވޯޓުދޭން ވައުދުވާކަމަށް ކުރީގެ ރައީސް އަދި އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ލީޑަރު މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހުގެރޭ ރައީސް ނަޝީދު ކުރެއްވި ޓުވީޓެއްގައި ރައީސް ނަޝީދު ވިދާޅުވީ މާލޭގައި އެމްޑީޕީއިން ދޮރުންދޮރަށް ހިނގުމުން ފުރަތަމަ ނަތީޖާ ސާފުވެއްޖެކަމަށާއި، ﷲ އަށް ޙަމްދު ކުރައްވާކަމަށެވެ.
ރައީސް ނަޝީދުގެ ޓުވީޓަށް ގުޅިފައިވާ ޕާޓީތަކުގެ ސަޕޯޓަރުން މަރުހަބާ ދަންނަވައި ޓުވީޓުކުރަމުންދާއިރު، އެމަނިކުފާނާއި ޖަދަލުކޮށް، ވެރިކަންކުރާ ޕާޓީ ޕީޕީއެމްގެ ބައެއް ބޭފުޅުންނާއި ސަރުކާރުގެ އިސް ވެރިން ގެންދަވަނީ ރައްދު ދެއްވަމުންނެވެ. އެގޮތުން ރައީސް ނަޝީދުގެ ޓުވީޓަށް ރައްދު ދެއްވަމުން ސަރުކާރުގެ ދިފާޢުގައި އެންމެ އިސްކޮށް މަސައްކަތްކުރައްވާ ފިޝަރީޒް މިނިސްޓަރ ޑރ. މުހައްމަދު ޝައިނީ ވިދާޅުވީ އެބޭފުޅުންގެ ދޮރުން ދޮރަށް ކެމްޕެއިނުން ފެނިގެންދަނީ ރައީސް އަބްދުﷲ ޔާމީނަށް 85 އިންސައްތަ ވޯޓު ރައީސް ޔާމީނަށް ލިބޭނެކަން ކަމަށެވެ.
މާލެއަކީ މަލްޓިޕާޓީ ޑިމޮކްރަސީ ރާއްޖެއަށް އައި ފަހުން އަބަދުވެސް އެމްޑީޕީއިން މެޖޯރިޓީ ނަގަމުން އަންނަ ރަށެކެވެ. އަދި ރިޔާސީ އިންތިޚާބުގެ އިތުރުން މަޖިލިސް އިންތިޚާބާއި ލޯކަލް ކައުންސިލް އިންތިޚާބުގައިވެސް އެމްޑީޕީއިން އަބަދުވެސް މެޖޯރިޓީ ނަގައެވެ. މިދިޔަ އަހަރު ބޭއްވި ލޯކަލް ކައުންސިލް އިންތިޚާބުގައި މާލޭ ސިޓީ ކައުންސިލްގެ 13 ގޮނޑީގެ ތެރެއިން 12 ގޮނޑި އެމްޑީޕީއިން ކާމިޔާބުކުރިއިރު، ގެއްލުނު ހަމައެކަނި ގޮނޑި ކާމިޔާބުކުރެއްވީ ޑީއާރްޕީގެ ބޭފުޅެކެވެ.
