އެމްއެންޔޫގެ ގްރެޖުއޭޝަން މިރޭ ބްރިޖްމަތީގައި
ބްރިޖް މަތީގައި ގްރެޖުއޭޝަން ބޭއްވުމަށް ހުއްދަ ދިނީ އެމްއެންޔޫއިން އެގޮތަށް އެދުމުން
ސިނަމާލެ ބްރިޖް. މިރޭ އެމްއެންޔޫގެ ގްރެޖުއޭޝަން ބާއްވަން ހަމަޖެހިފައިވަނީ ބްރިޖް މަތީ
ދިވެހިރާއްޖޭގެ ގައުމީ ޔުނިވާސިޓީގެ(އެމްއެންޔޫ) ގްރެޖުއޭޝަން ހަފުލާ، މިރޭ ސިނަމާލެ ބްރިޖް މަތީގައި ބާއްވާނެއެވެ.
ހައުސިން މިނިސްޓަރ ޑރ. މުހައްމަދު މުއިއްޒު މީގެ ކުރިން ވިދާޅުވެފައިވަނީ އެމްއެންޔޫގެ އެދުމާއެކު ޔުނިވަރުސިޓީގެ ގްރެޖުއޭޝަން ބުރިޖުގައި ބޭއްވުމުގެ ހުއްދަ ރައީސް އަބްދުﷲ ޔާމީން ދެއްވައިފައިވާ ކަމަށެވެ. އެކަމަށްޓަކައި ހުރިހާ ދަސްވެނިންނާއި އެ ކުދިންގެ ބެލެނިވެރިންނަށް މަރުހަބާ ދަންނަވާ ކަމަށް މިނިސްޓަރ ވިދާޅުވެފައިވެއެވެ.
ސިނަމާލެ ބްރިޖް ހުޅުވާފައިވަނީ އޮގަސްޓް 30 ވަނަ ދުވަހުގެ ރޭ އެވެ.
ޗައިނާގެ އެހީގައި ބްރިޖު އެޅުމުގެ މަސައްކަތް ފެށީ 2015 އަހަރުއެވެ. ބްރިޖްގެ މަޝްރޫއަށް 200 މިލިއަން ޑޮލަރު ޚަރަދުވިއިރު އޭގެތެރެއިން 116 މިލިއަން ޑޮލަރަކީ ޗައިނާގެ ލޯނުއެހިއެވެ. އަދި 72 މިލިއަން ޑޮލަރަކީ އެގައުމުގެ ހިލޭ އެހިއެވެ. އަދި މި މަޝްރޫއަށް ދައުލަތުގެ ބަޖެޓުން 12 މިލިއަން ޑޮލަރު ވަނީ ޚަރަދުކޮށްފައެވެ.
ޗައިނާގެ ސީސީސީސީ ސެކަންޑް ހާބަ އިންޖިނިއަރިން ކުންފުންޏާ ހަވާލުކޮށްގެން ހެދީ މި ބްރިޖްގެ މަސައްކަތް ކުރުމަށް1000 އަށް ވުރެ ގިނަ މުވައްޒަފުން މަސައްކަތް ކުރިއެވެ.
ބްރިޖް ރަސްމީކޮށް އާއްމުންނަށް ހުޅުވާލާނީ ސެޕްޓެމްބަރު މަހުގެ 7 ވަނަ ދުވަހުއެވެ.
