ބްރިޖްގައި ސަލާމަތީ ކަންކަން ވަރުގަދަ ކުރާނެ ކަމަށް ހައުސިން މިނިސްޓްރީން ބުނެފި

ސިނަމާލެ ބްރިޖް ރަސްމީކޮށް ބުރާސްފަތި ދުވަހު ހުޅުވާއިރު، ދަތުރުކުރާ ފަރާތްތަކަށް ހާއްސަކޮށް ސަލާމަތީ ފިޔަވަޅުތައް ވަރުގަދަ ކުރާނެ ކަަމަށް ހައުސިން މިނިސްޓްރީން ބުނެފިއެވެ.

ދިވެހިރާއްޖޭގެ ތާރީހަށް ބަލާއިރު މިފަދަ ބޮޑެތި މަގުތަކުގެ ސަބަބުން ނުރައްކާތެރި އެކްސިޑެންޓްތައް ގިނަވާކަން ފާހަގަކޮށް ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ހައުސިން މިނިސްޓްރީ މީޑިއާ ކޮންސަލްޓަންޓް އަހްމަދު ފަޒާލް ވިދާޅުވީ ބްރިޖްގައި ދަތުރުކުރާ ފަރާތްތަކުގެ ސަލާމަތީ ފިޔަވަޅުތައް ވަރުގަދަ ކުރުމަށް މިނިސްޓްރީން ނިންމާފައިވާ ކަމަށެވެ. އަދި ބްރިޖް އާންމުންނަށް ހުޅުވާލުމުގެ ކުރިން މި ފިޔަވަޅުތައް މިނިސްޓްރީން ހާމަކުރާނެ ކަމަށް ވެސް އޭނާ ވިދާޅުވިއެވެ. ނަމަވެސް، ފިޔަވަޅުތަކަކީ ކޮބައިކަން ފަޒާލް ރާއްޖެއެމްވީއާ ހިއްސާކުރައްވާފައެއް ނުވެއެވެ.

ބުރާސްފަތި ދުވަހުގެ ރޭ ރަސްމީކޮށް ބްރިޖް ހުޅުވި ނަމަވެސް، ބްރިޖްގައި ވެހިކަލްތަކުގައި އާންމުންނަށް ދަތުރުކުރަން ފެށޭނީ އަންނަ މަހުގެ 7 ވަނަ ދުވަހުން ފަށައިގެންނެވެ.

ޗައިނާގެ ސީސީސީސީ ސެކަންޑް ހާބަރ އިންޖިނިއަރިންގ ކުންފުންޏާ ހަވާލުކޮށްގެން ކުރިއަށް ގެންދާ މި މަސައްކަތް ކުރުމަށް 1،000 އަށް ވުރެ ގިނަ މުވައްޒަފުން މަސައްކަތް ކުރާއިރު، ބްރިޖްގެ މަސައްކަތަށް 200 މިލިއަން ޑޮލަރު ޚަރަދު ވެއެވެ. އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީއެވެ. އަދި 72 މިލިއަން ޑޮލަރަކީ ޗައިނާގެ ލޯނު އެހީއެވެ. މި މަޝްރޫއަށް ދިވެހި ދައުލަތުގެ ބަޖެޓުން 12 މިލިއަން ޑޮލަރު ހޭދަކުރެއެވެ.