އަދީބުގެ އިންސާނީ ޙައްޤެއް ނޯންނާނެ ކަމަށް ރައީސް ވިދާޅުވި ވާހަކަފުޅު ތަހުޤީޤުކުރަން ހުށަހަޅައިފި
27 އޯގަސްޓު 2018 | ހޯމަ 13:56ރައީސް އެހެން ވިދާޅުވީ ތ. ގުރައިދޫގައި
ޕީޕީއެމްގެ ސިޔާސީ ޙަރަކާތެއްގައި އަދީބާއި ރައީސް ޔާމީން
ކުރީގެ ރައީސް އަހުމަދު އަދީބުގެ އިންސާނީ ޙައްޤެއް ނޯންނާނެ ކަމަށް ވިދާޅުވެ، ތ. ގުރައިދޫގައި ރައީސް އަބްދުﷲ ޔާމީން ދެއްކެވި ވާހަކަފުޅު ތަހުޤީގު ކުރުމަށް ފުލުހުންގެ އިދާރާއަށް ހުށަހަޅައިފިއެވެ.
ގުރައިދޫ ރައްޔިތުންނާ މުޚާތަބުކުރައްވައި ދެއްކެވި ވާހަކަފުޅުގައި ރައީސް ޔާމީން ވިދާޅުވީ ދައުލަތަށް ދައްކަންޖެހޭ ފައިސާއެއް އޮތް މީހެއްގެ އެއްވެސް އިންސާނީ ހައްގެއް ނޯންނާނެ ކަމަށެވެ.
އެމްއެމްޕީއާރްސީގެ ހިޔާނާތުގެ ވާހަކަތައް ދައްކަވަމުން ރައީސް ޔާމީން ވިދާޅުވީ އަދީބާއި އެމަނިކުފާނާ ދެމެދު ހިނގާފައި ވަނީ "އަމިއްލަ ކަމެއް" ކަމަށާއި އެކަން ހަނދާން ނައްތާލާފައި ބޭސްފަރުވާއަށް ފޮނުވުމަށް ތައްޔާރަށް ހުންނެވި ކަމަށެވެ. ނަމަވެސް އަދީބު ނެންގެވި ފައިސާ އަނބުރާ ދެއްކުމުން ނޫނީ ބޭސްފަރުވާއަށް ދިޔުމަށް ފުރުސަތު ދެވެން ނެތް ކަމަށް ރައީސް ވަނީ ވިދާޅުވެފައެވެ.
"އަޅުގަނޑު އާންމުން ތަންތަނުގައިވެސް ބުނަން، އޭނާ (އަހުމަދު އަދީބު) ސަރުކާރުން ނެގި ފައިސާ އަނބުރާ ސަރުކާރަށް ދެއްކިއްޔާ ނޫނީ އޭނާ ރާއްޖޭން ބޭރަށްދާކަށް ހުއްދައެއް ނުދޭނަމޭ، އަޅުގަނޑާއި ދޭތެރޭ ހިނގާފައިވާ ކަމަކީ އަމިއްލަ ކަމެއް، އެކަމަކު ދައުލަތުން ނެގި ފައިސާ ދައުލަތަށް ދޭށޭ އަޅުގަނޑު މިބުނަނީ، ދައުލަތުން ނެގި ފައިސާ އަނބުރާ ދިނިއްޔާ ނޫނިއްޔަކާ ކިތަންމެ ބަލިވިޔަސް އޭނާގެ އިންސާނީ ޙައްގެއް އޮންނާނެ ކަމަށް އަޅުގަނޑު ޤަބޫލެއް ނުކުރާނަން" ރައީސް ވިދާޅުވެފައި ވެއެވެ.
ރައީސްގެ ވާހަކަފުޅު ތަހުޤީގުކޮށް ދިނުމަށް އެދި އަދީބުގެ ޤާނޫނީ ވަކީލުންގެ ފަރާތުން، ފުލުހުންގެ އިދާރާ ހިންގެވުމާ ވަގުތީ ގޮތުން ޙަވާލުހުންނެވި އެކްޓިން ކަމިޝަނަރ އޮފް ޕޮލިސް އަބްދުﷲ ނަވާޒަށް ފޮނުވި ސިޓީއެއްގައި ބުނެފައި ވަނީ އަދީބަށް ދިމާވެފައި ސިއްޙީ ހާލަތާއި ދިމާވެފައިވާ ބަލިތަކަށް ރާއްޖޭން ބޭރުން ފަރުވާ ކުރުމަށް ޑޮކްޓަރުން ލަފާދެއްވާފައިވާ ކަމަށެވެ. ބޭސްފަރުވާގެ ޙައްޤަކީ ދިވެހިރާއްޖޭ ބައިވެރިވެފައިވާ ބައިނަލްއަޤްވާމީ މުއާހަދާތަކާއި، ދިވެހިރާއްޖޭގެ ޤާނޫނު އަސާސީއާ ޤާނޫނުތަކުން، ލިބިދިނުން ލާޒިމްކުރާ އަސާސީ ޙައްޤެއް ކަމަށާއި އެކަން ނިގުޅައިގަތުމުގެ ބާރު އެއްވެސް މީހަކަށް ލިބިގެން ނުވާ ކަމަށް ސިޓީގައި ބަޔާންކޮށްފައި ވެއެވެ.
އަދީބުގެ ވަކީލުންގެ ސިޓީގައި އިތުރަށް ބުނެފައި ވަނީ ރާއްޖޭގެ ރައީސުލްޖުމްހޫރިއްޔާ، ފާޅުކަން ބޮޑު ގޮތެއްގައި އަދީބުގެ އިންސާނީ ޙައްޤެއް ނޯންނާނެ ކަމާއި އަދީބު ޖަލަށްލެވި އެކަހެރި ކުރެވިފައި ވަނީ ޒަތީ ސަބަބަކަށް ޓަކައިކަން ފާޅުގައި ހާމަކުރައްވަމުންދާ ކަމަށެވެ. އަދި ބޭސްފަރުވާއަށް ދެވޭނީ ދައުލަތަށް ދައްކަންޖެހޭ ފައިސާ ދެއްކުމުން ކަމަށް ރައީސް ޔާމީން ވިދާޅުވި ނަމަވެސް މިހާތަނަށް އަދީބުގެ މައްޗަށް އެއްވެސް ކޯޓަކުން ދައުލަތަށް ފައިސާ ދެއްކުމަށް ހުކުމްކޮށްފައިވާ ނުވާކަން ސިޓީގައި ފާހަގަކޮށްފައި ވެއެވެ.
އަދީބުގެ ވަކީލުންގެ ސިޓީގައި އަދީބު ބޭސްފަރުވާއިން މަހުރޫމްކޮށް އިންސާނީ ޙައްޤަށް އަރައިގަތުމަކީ ޖިނާޢީ ކުށަކަށް ވާތީ އާއި އެކަންކަން ކުރެއްވުމުގައި އެންމެ އިސްކޮށް ހުންނެވީ ރައީސް ޔާމީން ކަމަށް އަމިއްލަފުޅު އިއުތިރާފުން އެގެން އޮންނަކަން ފާހަގަކޮށް އެމައްސަލަ ތަހުގީގުކޮށް ދިނުމަށް އެދިފައިވެއެވެ.
އަދީބުގެ މައްޗަށް 33 އަހަރަށް ވުރެ ގިނަ ދުވަހުގ ޖަލު ހުކުމެއް ހިންވާފައިވާ އިރު ސިއްހީ ގިނަ މައްސަލަތަކެއް އަދީބަށް ކުރިމަތިވެފައިވާ ކަމަށް އާއިލާ އާއި ވަކީލުން ފާހަގަކޮށްފައި ވެއެވެ.
