އެންމެ ފަހުން ރާއްޖޭގައި ބޭއްވި ރިޔާސީ އިންތިޚާބުގައި އިލެކްޝަން ކޮމިޝަންގެ ސާރވާ ހެކްކުރަން އުޅުނު މީހުންނަކީ މިހާރު އިލެކްޝަން ކޮމިޝަންގެ ގާތް ރަހުމަތްތެރިން ކަމަށާއި، ކޮމިޝަންގެ ސާރވާ ހެކްކުރުމުގެ ފުރުސަތު ބޮޑު ކަމަށް އިލެކްޝަން ކޮމިޝަންގެ ކުރީގެ ރައީސް ފުވާދު ތައުފީގު ވިދާޅުވެއްޖެއެވެ.

ރާއްޓެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން ފުވާދު ވިދާޅުވީ 2013 ވަނަ އަހަރު ބޭއްވި ރިޔާސީ އިންތިޚާބު އޮޅުވާލުމަށް ގިނަ ބަޔަކު މަސައްކަތް ކުރި ކަމަށާއި، އޭރުގެ އިލެކްޝަން ސާރވާ ހެކް ކުރުމަށް މަސައްކަތް ކުރި ކަމަށެވެ. ހެކް ކުރުމަށް ބަޔަކު މީހަކު މަސައްކަތް ކުރާކަން އެނގުނު ހިސާބުން އިލެކްޝަންގެ މުއައްޒަފުން ވަރަށް ބޮޑަށް ފާރަވެރިވެ ކުރިމަތިވި ހުރިހާ ހަމަލާތަކުން ސާރވާ ސަލާމަތް ކުރި ކަމަށް ފުވާދު ވިދާޅުވިއެވެ. ފުވާދު ވިދާޅުވީ ސާރވާ ހެކް ނުކުރެވުމުން އޭރު ބައެއް ފަރާތްތަކުން އިލެކްޝަން ކޮމިޝަންގެ އިދާރާއަށް ވަދެ ހަމަނުޖެހުން ހިންގުމަށް ވެސް މަސައްކަތްކުރި ކަމަށެވެ.

ނަމަވެސް މިއަދު ފަރާތްތަކަކީ ރައީސް ޔާމިން ސަރުކާރުގެ އިސް ބޭފުޅުން ކަމަށާއި، އެއީ މިއަދުގެ އިލެކްޝަން ކޮމިޝަންގެ ގާތް އެކުވެރިން ކަމަށެވެ. އެހެންކަމުން މިއަދު ކޮމިޝަންގެ ސާރވާ ހެކްކުރުމުގެ ފުރުސަތު ބޮޑު ކަމަށް އޭނާ ވިދާޅުވިއެވެ.

ފުވާދު ވިދާޅުވީ އިލެކްޝަން ކޮމިޝަނުގައި މަސައްކަތް ކުރާ މުވައްޒަފުންނަކީ ވަރަށް ގާބިލް މުވައްޒަފުން ކަމަށާއި، ސާރވާ ހެކްކުރާ ނަމަ އެނގޭނެ ކަމަށެވެ. ނަމަވެސް ދެލޯ މަރައިގެން ތިބޭ ނަމަ ނޭނގި ހިގައިދާނެ ކަމަށް އޭނާ ވިދާޅުވިއެވެ.

އިލެކްޝަން ކޮމިޝަނަށް ހުށަހަޅާ ފޯމުތައް ރައީސް ޔާމީންގެ ކެންޕޭން އޮފީހަށް ދާކަން ފާހަގަކުރައްވައި ފުވާދު ވިދާޅުވީ އިލެކްޝަނުން ކުރާ މަސައްކަތްތަކީ މިހާރު އަރަތެއް ކަހަލަ މަސައްކަތްތަކެއް ކަމަށެވެ. ރީ-ރަޖިސްޓްރޭޝަން ހުށަހެޅި ގިނަ ފޯމްތައް ބާތިލް ވެގެންދިއުން އެއީ އަރަތެއް ކަމަށެވެ.

"5526 ފޯމު އެބޭފުޅުން އެރިޖެކްޓް ކުރެއްވީ ޝައްކުވާތީއޭ ނުނިއްޔާ އެބޭފުޅުން އެބައްލަވާ ގޮތަކަށް ބެއްލެވީމަ ކޮލިފައި ނުވެގެން. އެހެން ކަމަށް ވަންޏާ ދެން އެބޭފުޅުން ޕްރޮސަސް ކުރައްވާނީ ސައްހަ ކަމަށް ބައްލަވާ ފޯމޭ. އެހެންވީމަ އެގޮތަށް ބައްލަވައިގެން ރަޖިސްޓްރީކުރީމަ ތިނަދޫގައި ހުންނަ މީހަކު ކުޅުދުއްފުއްޓަށް ކުޅުދުއްފުށީގައި ހުންނަ މީހަކު ހިތަދޫއަށް ހިތަދޫގައި ހުންނަ މީހަކު ލަންޑަނަށް މިކަހަލަ ގޮތަކަށް މީހުން ބަދަލުވަމުން މިދަނީ،" ފުވާދު ވިދާޅުވިއެވެ.

ފުވާދު ވިދާޅުވީ ރައީސް ޔާމިންގެ ސަރުކާރުގެ ގިނަ ކަންކަމަކީ އަރަތަކަށް ބަދަލުވާ ކަންކަން ކަމަށާއި، ރިޔާސީ އިންތިޚާބު ވެސް އަރަތަކަށް ބަދަލުވުމުގެ ފުރުސަތު ބޮޑު ކަމަށެވެ.

މިއަހަރުގެ ރިޔާސީ އިންތިޚާބު ފަސްކޮށްފާނެ ކަމުގެ ބިރު އެބަ އޮތްކަން ފާހަގަކުރައްވައި ފުވާދު ވިދާޅުވީ ރައީސް ޔާމިން ބޮޑަށް ބޭނުންފުޅު ވަނީ އިންތިޚާބު ނުބާއްވައި އިންތިޚާބު ލަސް ކުރަން ކަމަށާއި، މިއަދުގެ އިލެކްޝަން ކޮމިޝަނުން މަސައްކަތް ކުރަނީ ރައީސް ޔާމީން އަންގަވާ ގޮތަށް ކަމަށެވެ.

މީގެ އިތުރަށް ފުވާދު ވިދާޅުވީ ގާނޫނާއި ގަވާއިދު އޮންނަނީ ފޮތުގައި ކަމަށާއި، މިނިވަން އިންސާފުވެރި އިންތިޚާބެއް ބޭއްވޭނެ ކަމަށް ގަބޫލުނުކުރައްވާ ކަމަށެވެ.

"މަކަރު ހައްދަވާ އޮޅުވާލައި، ގަޑުބަޑު ކުރެއްވުމުގެ ފުރުސަތު ކުޑަ ކުރެވޭނެ އޮޕަޒިޝަންގައި ތިބި މީހުން ރަނގަޅަށް ފާރަވެރިވެއްޖެއްޔާ. އެބޭފުޅުން ހިފަންޖެހޭ ތަންތަނުގައި ހިފަންޖެހޭނެ. ގުނަން ޖެހޭނީ އެވޯޓު ކަރުދާސް މޮނިޓަރުންނަށް ދައްކަން ޖެހޭނެ. ރަނގަޅަށް ފާރަވެރިވެއްޖެއްޔާ ރަނގަޅު ނަތީޖާ ހަމަ ނެރެވޭނެ. އެކަމަކު ދެން ވަރަށް ދަތިކަމަކަށް ވަނީ އިލެކްޝަން ކޮމިޝަނުން މިހާރު އެތިއްބެވި ގޮތުގައި ތިއްބަވަނިކޮށް އިންތިޚާބު ރަނގަޅަށް ބޭއްވުން،" ފުވާދު ވިދާޅުވިއެވެ.

ފުވާދު ވިދާޅުވީ މިހާރު އޮތް އިލެކްޝަން ކޮމިޝަނުން ކުރާނެ ނުކުރާނެ ކަމެއް ބުނަން ނޭނގޭ ކަމަށާއި، އިންތިޚާބުގައި އައިޕެޑް ބޭނުން ކުރަން ޖެހޭ އެއްވެސް ސަބަބެއް ވެސް ނެތް ކަމަށެވެ.

އިލެކްޝަން ކޮމިޝަނަކީ އުފެދުމުގައި ބާތިލް ކޮމިޝަނެއް ކަމަށާއި، ރައީސް ޔާމިން ބޭނުންފުޅުވާ މީހުން މަގާމްތަކަށް އައްޔަންކުރެއްވި ނަމަވެސް ދިވެހި ރައްޔިތުން އެކަން ބަލައި ނުގަންނާނެ ކަން މިއަދު ހާމަވަމުން އަންނަ ކަމަށް ފުވާދު ވިދާޅުވިއެވެ.