ގުޅިފައިވާ ސިޔާސީ ޕާޓީތަކާއެކު މަސައްކަތްކުރައްވާ ކުރީގެ ރައީސް މައުމޫން އަބްދުލް ޤައްޔޫމް އެދިލައްވާ ސިޔާސަތުތަކެއް ހިމެނޭ ގޮތަށް ގިނަ ވައުދުތަކަކާއެކު މެނިފެސްޓޯއެއް ނެރެ ރަސްމީ ވެބްސައިޓެއް ތައާރަފް ކޮށްފިއެވެ.
ގުޅިފައިވާ ސިޔާސީ ޕާޓީތަކާއެކު ރައީސް މައުމޫން މަސައްކަތް ކުރައްވަމުން ގެންދަވަނީ " މައުމޫން ރީފޯމް މޫވްމަންޓު (އެމްއާރްއެމް)" ގެ ނަމުގައެވެ.
އެމްއާރްއެމް އިން މެނިފެސްޓޯއެއް ނެރުނު އިރު އެއީ ސިޔާސީ ޕާޓީއެއް ނޫން ކަމަށް އެ މޫވްމަންޓުގެ އިސް ބޭފުޅުން ވިދާޅުވެފައިވެއެވެ. އަދި މެނިފެސްޓޯއެއް ނެރުނީ ގުޅިފައިވާ ސިޔާސީ ޕާޓީތަކުގެ އިއްތިހާދުގައި ރައީސް މައުމޫން ހިމެނިވަޑައިގަންނަވާތީއާ އެމަނިކުފާނު ތަމްސީލުވުން ހިމެނުމުގެ ގޮތުންނެވެ.
ރައީސް މައުމޫނުގެ މެނިފެސްޓޯގައި މައިގަނޑު 16 ކަމަށް އިސްކަންދީފައިވެއެވެ. އެގޮތުން އިސްލާމީ ވެރިކަމެއް ގާއިމްވެފައިވާ ގައުމެއްގެ ގޮތުގައި ރާއްޖެ ދެމެހެއްޓުމާއި ގައުމުގެ މިނިވަންކަމާއި ސިޔާދަތު ދެމެހެއްޓުން ހިމެނެއެވެ.
ރިޔާސީ ނިޒާމެއްގެ ތެރެއިން ދައުލަތް ބައްޓަން ކުރުމާއި ރައްޔިތުން ބިންވެރި ކުރުން އަދި ޒުވާނުންގެ ރައުސްމާލް ތަނަވަސް ކުރުން ވެސް ރައީސް މައުމޫނުގެ މެނިފެސްޓޯގައި ހިމެނެއެވެ.
މީގެ އިތުރުން އިންސާފުގެ އަސާސްތައް ޤާއިމްކުރުމާއި، ރައްޔިތުންގެ މަޖްލީހަކީ ދެ ގެ އެކުލެވޭ މަޖްލީހުގެ ނިޒާމަކަށް ބަދަލުކުރުން ފަދަ ކަންކަން މެނިފެސްޓޯގައި ހިމެނިފައިވެއެވެ.
ޤައުމީ ތަރިކަ ހިމާޔަތްކޮށް ބެލެހެއްޓުމާއި ޤުދުރަތީ މާހައުލު ހިމާޔަތްކޮށް ދެމެހެއްޓުމުގެ އިތުރުން އަންހެނުން ބާރުވެރިކުރުވުމުގެ އިތުރުން އިޖްތިމާޢީ އަދާލަތު ޤާއިމް ކުރުން ހިމެނެއެވެ.
ރައީސް މައުމޫންގެ ފަރާތުން މެނިފެސްޓޯއެއް ނެރެފައިވާ އިރު އަދާލަތު ޕާޓީ އާއި އެމްޑީޕީ އިން ވެސް ވަނީ ވަކިވަކިން މެނިފެސްޓޯއެއް ނެރެފަ އެވެ. އިދިކޮޅު އިއްތިހާދުން ބުނި ގޮތުގައި އެ އިއްތިހާދުގެ ސަރުކާރުން ތަންފީޒު ކުރާނީ ހުރިހާ ޕާޓީތަކުން އެއްބަސްވާ އެއް މެނިފެސްޓޯއެކެވެ.
