ރަށްރަށަށް ވަޑައިގެން އެރަށް ރަށުގެ ހާލަތު އެނގިވަޑައިގެންނެވުން ހައިރާންވެވަޑައިގަންނަވާ ކަމަށާއި ފާއިތުވި ހަތަރު ވަރަކަށް އަހަރުގެ ތެރޭގައި އަސާސީ ހިދުމަތްތައް އޮތީ ވަޅުޖެހިފައި ކަމަށް އިއްތިހާދުގެ ކެންޑިޑޭޓް، އިބްރާހިމް މުހައްމަދު ސޯލިހްގެ ރަނިންމޭޓް ފައިސަލް ނަސީމް  ވިދާޅުވެއްޖެ އެވެ.

ށ.ކަނޑިތީމަށް ވަޑައިގެން އެރަށުގައި ތިބި ސަޕޯޓަރުންނާއެކު ބޭއްވި ބައްދަލު ކުރެއްވުމުގައި ފައިސަލް ވިދާޅުވީ ކަނޑިތީމް ރައްޔިތުންނަށް ވެސް ބޭސް ފަރުވާ ލިބެން ޖެހޭނެ ކަމަށާއި ކޯލިޝަނުގެ މެނިފެސްޓޯގައި އަސާސީ ޚިދުމަތްތައް ފުއްދަދޭން ހިމަނާފައިވާނެ ކަމަށެވެ.

 "ދިވެހި ރައްޔިތުން ނުޖެހޭނެ ތާ އަބަދު ސަލާން ޖަހައި މީހުންގެ މުށުތެރެއަށް ވެއްޓެން ޖެހޭނެ ބައެއް ނޫން. އަޅުގަނޑުމެން ލަދުގަނޭ، ހަގީގަތުގައި ވެސް ކޮން ކަމެއް ބާއޭ ކޮށް ދެވުނީ،" ފައިސަލް ވިދާޅުވި އެވެ.

އަދި އެހެންމެ އަނިޔާވެރި ކަމަކީ އަލަށް އުފެދޭ ސަރުކާރުގައި ފެނިގެންދާނެ ކަމެއް ނޫން ކަމަށް ތަކުރާރުކޮށް ވިދާޅުވި އެވެ. ކުރީގެ ރައީސް މައުމޫނު އަބްދުލް ގައްޔޫމް އުޅުއްވަނީ އާލާސްކަން ފުޅެއްގައި ކަމަށް ފާހަގަ ކުރައްވައި، ވިދާޅުވީ މައުމޫނުގެ ކުށަކަށް ވެގެން އުޅެނީ ހެޔޮ ބަސް ވިދާޅުވުން ކަމަށެވެ. އަދި އެމަނިކުފާނަށް ވެސް ބޭސްފަރުވާ ލިބެންޖެހޭނެ ކަމަށާއި ބޭސްފަރުވާގެ ހައްގަކީ ކޮންމެ މީހަކަށް ލިބެންޖެހޭ ހައްގެއް ކަމަށެވެ. 

ބޮޑު ސްކީރުން 20 ވަރަކަށް ދަނޑު އެއްކޮށް ހުޅުވާފައި ދަނޑު ހުޅުވީ ކަމަށް ބުންޏަސް އެއީ އެކަން ކުރެއްވުން ނޫން ކަމަށް ފައިސަލް ވިދާޅުވި އެވެ. ބަނދަރެއް ހުޅުވައިފިއްޔާ އެކަށީގެންވާ ގޮތެއްގައި އެ ބަނދަރު ބޭނުން ކުރެވެން ޖެހޭނެ ކަމަށާއި އެކަން ކަމަކީ މީހުންގެ ލޮލުގައި އަނދުން އަޅުވަން ކުރާ ކަމަކަށް ވެގެން ނުވާނެ ކަމަށް ވެސް ފައިސަލް ފާހަގަ ކުރެއްވި އެވެ.  

ގޯސް ހަދަމުން ހަދަމުން ގޮސް މިހާރު  ރައްޔިތުންނަށް ބިރު ދައްކާފައި އޮތް މިންވަރުން ރައްޔިތުން ލާ ވޯޓުގެ ނަތީޖާ ނިކުންނާނެ ތޯ ސުވާލު އުފެދޭ މިންވަރަށް ކަންކަން ހިނގައްޖެ ކަމަށް ފައިސަލް ވިދާޅުވިއެވެ.