ބުލީގެ ޝިކާރައަކަށްވި ގެއްލުނު ކުޑަކުއްޖާއަކީ ގދ. ތިނަދޫއަށް ނިސްބަތްވާ ކުއްޖެއް
24 އޯގަސްޓު 2018 | ހުކުރު 21:01އޯގަސްޓް 19 ވަނަ ދުވަހުން ފެށިގެން އާއިލާގެ ފަރާތުން މިކުއްޖާ ހޯދުމުގެ މަސައްކަތް ދަނީ ކުރަމުން
ނަޝްފާ ޙަސަން (15އ)
ސޯޝަލް މީޑިއާގައި އާންމުވެފައިވާ ވީޑިއޯގައި އަންހެން ކުދިންތަކެއްގެ ބުލީގެ ޝިކާރައަކަށްވި ގެއްލުނު ކުއްޖާއަކީ ގދ. ތިނަދޫއަށް ނިސްބަތްވާ ކުއްޖެއްކަމަށް ފުލުހުން ހާމަކޮށްފިއެވެ.
ގެއްލިގެން ހޯދަމުންދާ އަންހެން ކުއްޖަކީ ގދ.ތިނަދޫ / އާބާދުވާދީ، ނަޝްފާ ޙަސަން (15އ) އެވެ.
ފުލުހުން ބުނީ އޮގަސްޓް 24 ވަނަ ދުވަހު މީސްމީޑިއާ “ފޭސްބުކް” ގައި އަންހެން ކުދިންތަކެއް ބައިވެރިވެގެން ކުޑަ އަންހެން ކުއްޖެއްގެ ގައިގާ ތަޅާ މާރާމާރީ ހިންގާ މަންޒަރު ފެންނަ ވީޑިއޯގައި އަނިޔާ ލިބުނު ކުއްޖާ ހޯދުމުގެ މަސައްކަތް ފުލުހުން ދަނީ ކުރަމުންކަމަށެވެ.
މި މައްސަލައާ ގުޅިގެން އެ ވީޑިއޯ އެނަލައިޒްކޮށް ކުއްޖާ ދެނެގަނެވި އެކުއްޖާގެ އާއިލާއާ ވާހަކަ ދެއްކުމުން، އޯގަސްޓް 19 ވަނަ ދުވަހުން ފެށިގެން އާއިލާގެ ފަރާތުން މިކުއްޖާ ހޯދުމުގެ މަސައްކަތް ކުރަމުންދާކަމުގެ މަޢްލޫމާތު ފުލުހުންނަށް ލިބިފައިވާކަމަށް ފުލުހުން ބުނެއެވެ. ނަމަވެސް ފުލުހުންނަށް މި ކުއްޖާ ގެއްލިގެން އެއްވެސް ފަރާތަކުން ރިޕޯރޓްކޮށްފައިނުވާކަމަށް ފުލުހުން ބުނެއެވެ.
މި ކުއްޖާ އާބެހޭ އެއްވެސް މަޢުލޫމާތެއް ލިބިފައިވާނަމަ އެމަޢުލޫމާތެއް ފުލުހުންގެ ފެމެލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓްގެ ޑިއުޓީ ނަންބަރ 3000600 އަދި 9790163 އަށް ގުޅުމަށް ފުލުހުން އެދެއެވެ.
ބައެއް ނޫސްތަކުން ރިޕޯޓްކޮށްފައި ވާ ގޮތުގައި އާންމު ވެފައިވާ ވީޑިއޯ އެއީ މީގެ ހަފުތާއެއް ކުރިން ހިނގި ކަމެއްކަމަށް ބެލެވޭކަމަށެވެ. އެހެން ނަމަވެސް ފުލުހުން އެކަމާމެދު އަދި ވަކި އެއްޗެއް ބުނެފައެއް ނުވެއެވެ.
ސޯޝަލް މީޑިއާގައި ބުރާސްފަތި ދުވަހު އާންމުވި ވީޑިއޯގައި ފެންނަނީ ތިން އަންހެން ކުދިން ވެގެން އެއް އަންހެން ކުއްޖެއް ގޮވައިގެން ވަކި ހިސާބަކަށްދާތަނެއެވެ. އެއަށްފަހު މޫނުމަތީ ޖަހައި، ކޮއްޕައި އަދި ހުތުރު ބަހުން އެއްޗެހި ކިޔާ ހަދައެވެ. ނަމަވެސް އެކުދިންގެ މެދުގައި މައްސަލަ ޖެހުނު ސަބަބު ސާފުވާ ގޮތް ވަނީ ނުވެފަ އެވެ.
