ގެއްލުނު ދެލައްކަ އަށް ވުރެ ގިނަ ފައިސާ ފުލުހުން ހޯދާ ވެރިފަރާތާ ހަވާލު ކޮށްފި
ފައިސާ ދަބަސް ވަގަށް ނަގައިގެން ދިޔައީ ބިދޭސީއެއް
މަގުމައްޗަށް ވެއްޓި ގެއްލުނު ފައިސާ ދަބަސް
ދެލައްކައަށް ވުރެ ގިނަ ރުފިޔާއާ އެކު މީހެއްގެ އަތުން މަގުއްމައްޗަށް ވެއްޓުނު ފައިސާ ދަބަހެއް ފުލުހުން ހޯދައި، އޭގެ ވެރިފަރާތާ ޙަވާލުކޮށްފިއެވެ.
ފުލުހުން މައުލޫމާތު ދިން ގޮތުގައި އެފައިސާ ދަބަސް މަގުމައްޗަށް ވެއްޓުނު ކަމަށް މަޢުލޫމާތު ލިބިފައި ވަނީ މި އޭޕްރީލް މަހުގެ 12 ވަނަ ދުވަހުގެ ހެނދުނު 7:55 ހާއިރު ކެންގަރޫ ކިޑްސް ސްކޫލް ކައިރިއަށް ކާރެއްގައި ދިޔަ މީހަކު އޭނާގެ ދަރިފުޅު ސްކޫލަށް ލުމަށް ފަހު ކާރަށް އެރި ވަގުތު ދަބަސް އަތުން ދޫވެގެންނެވެ.
ފުލުހުންގެ މީޑިއާއިން މައުލޫމާތު ދިން ގޮތުގައި މިމައްސަލަ ހުށަހެޅުމާ ގުޅިގެން ފުލުހުން ކުރި މަސައްކަތުން އެސަރަހައްދުގެ ސީސީޓީވީ ކެމެރާތަކުގެ އެހީގައި އެދަބަސް މަގުމަތިން ހޮވިކަމަށް ތުހުމަތުކުރެވޭ ބިދޭސީ މީހަކު ހޯދުނެވެ. އަދި މާލޭގެ އެކި ސަރަހައްދުތަކުގައި ހުރި ސީސީޓީވީ ފުޓޭޖްގެ އެހީގައި އެމީހާ އުޅޭ ކަމަށް ބެލެވޭ ސަރަހައްދަށް ފުލުހުން ގޮސް އެމީހާގެ އެއްބާރުލުމާ އެކު އޭނާ ދިރިއުޅޭ ތަން ބަލައި ފާސްކުރިއިރު ގެއްލުނު ދަބަހާއި ބައެއް ފައިސާ ފެނިފައިވާ ކަަމށް ފުލުހުންގެ މީޑިއާއިން ބުނެފައި ވެއެވެ.
އޭގެތެރެއިން ސާޅީސް ފަސް ހާސް ރުފިޔާ ރާއްޖެއިން ބޭރުގައި އުޅޭ އެމީހާގެ ޢާއިލާއަށް ފޮނުވުމަށް ތަނަކާ ހަވާލުކޮށްފައި ވަނިކޮށް ފުލުހުން ވަނީ އެކަން ހުއްޓުވައި، އެފައިސާތައް ވެސް ހޯދާފައެވެ.
އެގޮތުން ފުލުހުން ކުރި މަސައްކަތުން ވަނީ ދެލައްކަ ދެހާސް ރުފިޔާ ހޯދައި އޭގެ ވެރިފަރާތާއި ހަވާލުކޮށްފައެވެ. އަދި ނުފެނިވާ ތިންހާހަށްވުރެ ގިނަ ފައިސާ ހޯދުމުގެ މަސައްކަތް ފުލުހުން ދަނީ ކުރަމުންނެވެ.
