ގެއްލުނު ކޮޅުވެއްޓި މާލެ ގެނައުމަށް ދަނީ މަސައްކަތްކުރަމުން: އެމްއެންޑީއެފް
21 މެއި 2017 | އާދީއްތަ 11:11ކޮޅުވެއްޓި ގެނައުމަށް މަސައްކަތް ކުރަނީ އިންޑިއާގެ މަނަވަރުގެ އެހީގައި
ގެއްލުނު ކޮޅުވެއްޓި، މާރިޔާ 3: މި އުޅަނދުގައި ތިބި ހަ މީހުންގެ ހާލުވެސް ރަނގަޅު
ހަ މީހުންނާއެކު ގެއްލިގެން ހޯދަމުން ދަނިކޮށް، ރާއްޖެއާ 130 ނޯޓިކަލް މޭލް ބޭރުން ފެނުނު ކޮޅުވެއްޓި، މާލެ ގެނައުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހިމް އާޒިމް ވިދާޅުވީ ކޮޅުވެއްޓި މާލެ ގެނައުމުގެ މަސައްކަތް ކުރަމުންދަނީ، އެ އުޅަނދު ހޯދުމުގެ މަސައްކަތުގައި ހަރަކާތްތެރިވި އިންޑިއާގެ މަނަވަރުގެ އެހީގައި ކަމަށެވެ. ނަމަވެސް ކޮޅުވެއްޓި ނިސްބަތްވާ ކުންފުނިން ޓަގެއް ފޮނުވުމުގެ މަސައްކަތް ވެސް ކުރަމުން އަންނަ ކަމަށް އޭނާ ވިދާޅުވިއެވެ.
މޫސުން ގޯސްވުމާއެކު، ކޮޅުވެއްޓި މާލެ ގެނެވޭނެ ގަޑިއެއް ނޭނގޭ ކަމަށް ވެސް އޭނާ ވިދާޅުވިއެވެ. ލ. އިސްދޫ މުއްޔާ 130 ނޯޓިކަލް މޭލް ބޭރުން ފެނުނު މި ކޮޅުވެއްޓި އަދިވެސް އޮތީ ފޯނު ގުޅޭ ސަރަހައްދަށް ވުރެ ބޭރުގައި ކަމަށް ވެސް އާޒިމް ވިދާޅުވިއެވެ.
މިމަހުގެ 16 ވަނަ ދުވަހު ގެއްލުނު ކޮޅުވެއްޓި ފެނިފައިވަނީ ހޮނިހިރު ދުވަހު ރޭގެ ވަގުތެއްގައި އިންޑިއާގެ ނޭވީ މަތިންދާ ބޯޓަށެވެ.
"މާރިޔާ-3" ނަމަކަށް ކިޔާ މި ކޮޅުވެއްޓި ފެނުނު އިރު އޭގައި ތިބި 6 މީހުންގެ ހާލުވެސް ރަނގަޅު ކަމަށާއި އެއްވެސް މީހަކަށް ގެއްލުމެއް ލިބިފައެއް ނެތް ކަމަށް އެމްއެންޑީއެފުން ބުނެއެވެ. މި ކޮޅުވެއްޓީގައި ތިބީ 2 ދިވެހިންނާއި 4 ބިދޭސީނެވެ. ދެ ދިވެހިންނަކީ ކޮޅުވެއްޓީގެ ކެޕްޓަން، ތ.ވިލިފުށީ ފިނިހިޔާގެ އާދަމް ނައީމްއާއި އޭނާގެ އަންހެނުން އެ ރަށު ކޮށިބިއްލޫރިގޭ ޒުލައިޚާ އުސްމާނެވެ.
"މާރިޔާ-3" ކޮޅުވެއްޓީގެ ޚަބަރެއް ނުވެގެން އެމްއެންޑީއެފަށް ރިޕޯޓްކުރީ މިމަހު 18 ވަނަ ދުވަހުއެވެ. އެ ހިސާބުން ފެށިގެން ވައިގެ މަގުންނާއި ކަނޑުގެ މަގުން ކޮޅުވެއްޓި ހޯދުމަށް އެމްއެންޑީއެފް ކޯސްޓްގާޑުގެ އުޅަނދުތައް ވަނީ ހުއްޓުމެއް ނެތި މަސައްކަތްކޮށްފައެވެ. އަދި މި އޮޕަރޭޝަނަށް އިންޑިއަން ނޭވީންވެސް ވަނީ އެހީތެރިކަން ފޯރުކޮށްދީފައެވެ.
