މިސަރުކާރުން ވައްކަން ކުރުމުގައި ވަކިއެއްޗެއް ވަކިވަސީލަތެއް ވަކިދާއިރާއެއް ނެތް: އަލީ ޒާހިރު
23 އޯގަސްޓު 2018 | ބުރާސްފަތި 20:00މީހުންގެ ފިކުރީ މުދަލުންނާއި މީހުންގެ ވިސްނުމުން ވެސް މިސަރުކާރުން ވައްކަން ކުރުމަށް ދަނީ މަސައްކަތް ކުރަމުން
ރ.އަލިފުށީގައި ބޭއްވި ޖަލްސާގެ ތެރެއިން އަލީ ޒާހިރު
މިސަރުކާރުން ވައްކަން ކުރުމުގައި ވަކިއެއްޗެއް ވަކި ވަސީލަތެއް ވަކި ދާއިރާއެއް ނެތް ކަމަށް އަދާލަތު ޕާޓީގެ ނާއިބް ރައީސް އަލްއުސްތާޒު އަލީ ޒާހިރު ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން ރ.އަލިފުށީގައި ބޭއްވި ޖަލްސާގައި އަލީ ޒާހިރު ވިދާޅުވީ މިސަރުކާރުން ވައްކަން ކުރުމުގައި ވަކި އެއްޗެއް ނެތް ކަމަށާއި، މީހުންގެ ފިކުރީ މުދަލުންނާއި މީހުންގެ ވިސްނުމުން ވެސް މިސަރުކާރުން ވައްކަން ކުރުމަށް މަސައްކަތް ކުރަމުންދާ ކަމަށެވެ.
އަލީ ޒާހިރު ވިދާޅުވީ ސެޕްޓެމްބަރު 23ގައި ބޭއްވޭ ރިޔާސީ އިންތިޚާބުގެ ވޯޓު ފޭރިގަތުމަށް ވެސް މިސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން އިލެކްޝަން ކޮމިޝަނަށް ރީރަޖިސްޓްރީ ކުރުމަށް ހުށަހަޅި ފޯމުތަކުގައި ހުރި މައުލޫމާތުތައް ޔާމިންގެ ކެމްޕޭން އޮފީހަށް ލިބިފައިވާ ކަމަށެވެ. މިސަބަބާއި އިލެކްޝަން ކޮމިޝަން މެމްބަރުންގެ އިހްލާސްތެރިކަމާ މެދު ސުވާލު އުފެދޭ ކަމަށް އޭނަ ވިދާޅުވިއެވެ.
"އަޅުގަނޑުމެން މިދަނީ މިފަދަ ހުރިހާ ކަމެއް ހޯދަމުން. ބަލަމުން އަޅުގަނޑުމެން މިތިބީ ހޭލާ. އިލެކްޝަން ކޮމިޝަންއާ އެކޮމިޝަންގެ މެމްބަރުންނަށް އަޅުގަނޑު ގޮވާލަން ބޭނުންވަނީ ދިވެހިރައްޔިތުންގެ ހައްގުތަކުން ވައްކަން ކުރުން ހުއްޓާލާށޭ." އަލީ ޒާހިރު ވިދާޅުވިއެވެ.
މިސަރުކާރަކީ އަނިޔާވެރިކަމުން ހައްދުފަހަނައަޅާފައިވާ ސަރުކާރެއްކަން ފާހަގަކުރައްވައި އަލީ ޒާހިރު ވިދާޅުވީ ރައްޔިތުން ދަރަނިވެރިކުރުވައި ރައްޔިތުންގެ މުދާ މިސަރުކާރުން ފޭރެމުން އަންނަ ކަމަށެވެ.
"ދެން މިބުނަނީ އޭ ސާބިތުކޮށްދޭށޭ. ސާބިތުކޮށްދީފައި ގޮވަންވީއޭ. އަމިއްލައަށް އިއުތިރާފްވި އަމިއްލަގެއަށް މިވަންނަނީ ހަރާން ފައިސާއޭ. ހަލާލު ނޫން ފައިސާއޭ. ވައްކަމުގެ ފައިސާއޭ. އެއްފަހަރު ވެސް ނުބުނޭ ބޭނުން ނުކުރާކަމަކަށް. އަޅުގަނޑުމެންނަށް އެނގޭ އޭސީސީގައި އެބަހުރި މޯލްޑިވްސް އިސްލާމިކް ބޭންކުގެ ސްޓޭޓްމަންޓްތައް އަބްދުﷲ ޔާމިންގެ އެކައުންޓަށް ވަތް އެއްމިލިއަން ޑޮލަރު. ނަގާ ހުސްކޮށްފައިވާކަން ދޭހަކޮށްދޭ ސްޓޭޓްމަންޓްތައް އެގެން އެބަހުރި. ދެން ކޮންއެއްޗެއްތޯ އަޅުގަނޑުމެން ސާބިތުކޮށްދޭންވީ" އަލީ ޒާހިރު ވިދާޅުވިއެވެ.
އަލީ ޒާހިރު ވިދާޅުވީ ވައްކަން ކުރުމަށް އިތުރު ފުރުސަތެއް ނުދޭނެ ކަމަށާއި، ގައުމު ސަލާމަތް ކުރުމަށް ކުރެވެންހުރި ހުރިހާ މަސައްކަތެއް ކުރާނެ ކަމަށެވެ. އޭނަ ވިދާޅުވީ ކޮންމެ ހާލެއްގައިވެސް ރައްޔިތުން ލީ ވޯޓްގެ ސައްހަ ނަތީޖާތައް ހޯދާނެކަމަށާ އޮޅުވާލަން އެއްވެސް ފުރުސަތެއް ނުދޭނެކަމަށެވެ.
