ޗެޕްސް ފިހާރައިގެ ބިއްލޫރިގަނޑެއް ތަޅާލައިގެން ވައްކަންކުރަން އުޅެފި
ސެކިއުރިޓީ ގާޑް ނިކުުތުމުން ފިހާރައިން އެއްޗެއް ގެންދެވޭވަރެއް ނުވޭ
ޗެޕްސް ފިހާރައިގެ ބިއްލޫރިގަނޑު ރޭ ތަޅާލާފައި
"ޗެޕްސް ފިހާރަ"އިގެ ބިއްލޫރިގަނޑު ތަޅާލައިގެން ވައްކަންކުރަން އުޅެފިއެވެ.
ޖަމާލުއްދީން ކުރިމަތީގައި ހުންނަ މިފިހާރައިގެ ބިއްލޫރިގަނޑު ތަޅާލީ ބުރާސްފަތި ދުވަހުގެރޭ ދަންވަރު 3:30 ހާއިރު ކަމަށް ފިހާރައިގެ ވެރިފަރާތުން ރާއްޖެ އެމްވީއަށް ބުންޏެވެ.
ފިހާރައިގެ ވެރިފަރާތުން ބުނީ ފިހާރައިގެ ބިއްލޫރިގަނޑު ތަޅާލައިގެން ވައްކަން ކުރަން އުޅުނީ ޖީއެން ސައިކަލެއްގައި އައި ދެމީހުން ކަމަށާއި ބިއްލޫރިގަނޑު ތަޅާލާފައިވަނީ ޕޭވްމަންޓް ގަލަކުން ޖަހައިގެން ކަމަށެވެ.
އޭނާ ބުނީ ބިއްލޫރިގަނޑު ތަޅާލި އަޑު އިވިގެން ޖަމާލުއްދީން ސްކޫލުގެ ސެކިއުރީ ގާޑު ނިކުތް ކަމަށާއި އޭނާ ނުކުތުމާއެކު ބިއްލޫރިގަނޑު ތަޅާލި މީހުން ސައިކަލަށް އަރައިގެން ނައްޓާލާފައިވާ ކަމަށެވެ.
ފިހާރައިގެ ވެރިފަރާތުން ބުނީ ސެކިއުރިޓީ ގާޑު ނިކުތުމާއެކު އެމީހުން ފިހާރައަށް ވަދެފައި ނުވާ ކަމަށާއި އެހެންކަމުން އެފިހާރައިން އެއްވެސް އެއްޗެއް މަދުވެފައި ނުވާކަމަށެވެ.
އަދި އެވަގުތު މާލެތެރެ ޕެޓްރޯލް ކުރަން އުޅުނު ފުލުހުންނަށް އެސަރަހައްދަށް އާދެވި ފިހާރައިގެ ވެރިފަރާތުން އެފިހާރަދޮށަށް އާދެވެންދެން އެތަން ބަލަހައްޓައި ދީފައިވަނީ ފުލުހުން ކަމަށްވެސް ފިހާރައިގެ ވެރިފަރާތުން ބުންޏެވެ.
ޗެޕްސް ފިހާރައަކީ ދެޖިންސުގެ ޒުވާނުންނާ ގުޅޭ އެންމެފަހުގެ ބްރޭންޑްތަކުގެ އަންނައުނުގެ ބާވަތްތަކާއި ފައިވާނާއި ބޫޓް އަދި ކަރުގައި އަޅާ ފަށްފަދަ ތަކެތި ވިއްކަމުން އަންނަ ފިހާރައެކެވެ.
